Yangi yil bayrami arafasida “Yolgʻiz keksa” reyestriga kiritilgan hamda nogironligi boʻlgan yurtdoshlarimiz ishtirokida bayram tadbiri tashkil etildi

Oʻzbekiston Respublikasi Prezidentining 2023-yil 27-dekabr kungi “Oʻzgalar parvarishiga muhtoj keksalar va nogironligi boʻlgan shaxslarga ijtimoiy xizmat koʻrsatish tizimini takomillashtirish chora-tadbirlari toʻgʻrisida”gi Qarorida belgilangan “Ijtimoiy himoyaga muhtoj keksa va nogironligi boʻlgan shaxslarni qoʻllab-quvvatlash tizimini yanada takomillashtirish boʻyicha “Yoʻl xaritasi”ning ijrosi” hamda Oʻzbekiston Respublikasi Vazirlar Mahkamasining 2024-yil 11-mart kungi “Oʻzgalar parvarishiga muhtoj shaxslarga ijtimoiy xizmat va yordam koʻrsatishning sifat jihatidan yangi tizimini joriy etish toʻgʻrisida”gi Qarori ijrosini taʼminlash maqsadida Amudaryo tumanida tizimli ishlar amalga oshirilmoqda.

Tumandagi “Yolgʻiz keksa” reyestriga kiritilgan oʻzgalar parvarishiga muhtoj yolgʻiz va bir oʻzi yashovchi keksalar hamda nogironligi boʻlgan shaxslarning holidan xabar olish, ijtimoiy xizmatlar koʻrsatishdan tashqari, ularning hayotdan rozi yashashlarini taʼminlashga qaratilgan maʼnaviy-maʼrifiy koʻngilochar tadbirlar oʻtkazishga ham alohida eʼtibor qaratilmoqda.

Xususan, turli bayram sanalari munosabati bilan saxovatpesha tadbirkorlarni jalb qilgan holda ularning madaniy tadbirlarda ishtirokini tashkil qilish, jumladan musiqa va sanʼat maktablarining hisobot kontsertlari, teatrlardagi spektakllar, turli xil davra suhbatlari, uchrashuvlar va treninglarda qatnashishi uchun sharoit yaratish, ular ishtirokida samimiy muloqot va adabiy-musiqiy dam olish kechalarini tashkil etishga qaratilgan saʼy-harakatlar tizimli ravishda amalga oshirib kelinmoqda.

Ana shunday tadbirlardan biri joriy yilning 21-dekabr sanasida Amudaryo tumani “Inson” ijtimoiy xizmatlar markazi, tuman Madaniyat boʻlimi, “Ravshanbek Yulduzxon” firmasi hamda “Diamond” restorani hamkorligida tashkil etildi.

Tadbirda “Nuroniylar” jamgʻarmasi jamoatchilik Kengashi Amudaryo tumani boʻlimi raisi Bekman Allaberganov, Oʻzbekiston Mahallalari uyushmasi Amudaryo tumani boʻlimi boshligʻi Alisher Yuldashev, “Inson” ijtimoiy xizmatlar markazi direktori Gʻulomjon Duysenboyev hamda mahalla tizimi faollari ishtirok etdilar.

Tadbirni nuroniy Bekman Allaberganov ochib berdi va yurtimizda amalga oshirilayotgan islohotlar, keksalarga koʻrsatilayotgan eʼtibor va gʻamxoʻrliklar haqida soʻzlab, barchani yaqinlashib kelayotgan yangi – 2025-yil bilan muborakbod etdi.

Shundan soʻng Oʻzbekiston mahallalari uyushmasi Amudaryo tuman boʻlimi boshligʻi Alisher Yuldashev, “Inson” ijtimoiy xizmatlar markazi direktori Gʻulomjon Duysenboyevlar ham tadbir ishtirokchilariga oʻzlarining samimiy tilaklarini bildirishib, oʻtkazilayotgan tadbirdan maqsad “Yolgʻiz keksa” reyestriga kiritilgan, oʻzgalar parvarishiga muhtoj yolgʻiz va yolgʻiz yashovchi keksalar hamda nogironligi boʻlgan shaxslarning ijtimoiylashuvini taʼminlash, ularning jamiyatdagi oʻrnini mustahkamlash va ijtimoiy jabhalardagi faolligini oshirishdan iborat ekanini, bu borada yana yangi islohotlarni amalga oshirish hamda koʻngilochar tadbirlarni tashkil etish rejalashtirilganligini alohida taʼkidlab oʻtdilar.

Tadbir davomida tuman madaniyat boʻlimi xodimlari tomonidan qiziqarli tomoshalar namoyish etildi. Ayniqsa, Qudrat Matsafoyev boshchiligidagi illyuzion chiqishlar, koʻzboylagʻich va masxarabozlik sanʼatiga oid tomoshalar, biri-biridan yoqimli kuy va qoʻshiqlar, dilrabo raqslar ijro etilib, barchaga bayramona kayfiyat baxsh etdi.

Tadbir yakunida ishtirokchi keksalar ham soʻzga chiqib, davlatimiz tomonidan koʻrsatilayotgan eʼtibor, gʻamxoʻrlik, insonni hayotdan zavq olib yashashga ragʻbatlantiruvchi xizmatlar hamda olib borilayotgan barcha ishlardan mamnunliklarini bildirishib, tadbir tashkilotchilariga oʻz minnatdorchiliklarini izhor etdilar va barchani kirib kelayotgan bayram munosabati bilan muborakbod qildilar.

Yangi yil bayrami arafasida, fayzli dasturxon atrofida oʻtkazilgan tadbir mamlakatimizda inson qadri hamma narsadan ulugʻ ekani, hech kim davlatimiz gʻamxoʻrligi va eʼtiboridan chetda qolmasligi hamda xalqimiz uchun oʻzaro mehr-oqibat, saxovatpeshalik azaliy qadriyat ekanligining amaliy ifodasi boʻldi.

Robiya Yoʻldosheva.