“Қишлоқ жойларни барқарор ривожлантириш” лойиҳаси – амалда

Мамлакатимизда аҳоли фаровонлигини таъминлаш, инсонларнинг турмуш шароитларини тубдан ўзгартириш, қишлоқларда ҳам шаҳардан қолишмайдиган замонавий шароитларни яратиш борасида кенг кўламли ислоҳотлар амалга оширилмоқда. Қишлоқ аҳоли пунктларининг меъморий қиёфасини тубдан янгилаш, ҳудудларни комплекс ривожлантириш, йўл-транспорт инфратузилмаси, муҳандислик-коммуникация тармоқлари ва ижтимоий соҳа объектларини барпо этиш орқали аҳолининг турмуш маданиятини юксалтириш мақсадида 2021 йилнинг 18 сентябрда имзоланган Ўзбекистон Республикаси Президентининг “Ислом тараққиёт банки ва OPEK халқаро тараққиёт жамғармаси иштирокида “Қишлоқ жойларни барқарор ривожлантириш” лойиҳасини амалга ошириш чора-тадбирлари тўғрисида”ги қарори бу борадаги ишларда муҳим дастуруламал бўлиб хизмат қилмоқда.

Ушбу лойиҳа асосида Амударё туманида ҳам кенг кўламли бунёдкорлик ишлар олиб борилмоқда. Лойиҳа билан туманимизда жами 12 та янги замонавий объектларни қуриш ва ишга тушириш белгиланган. Хусусан, Фаровон маҳалласи марказида 90 ўринли мактабгача таълим ташкилоти, Олмазор маҳалласи ҳудудидаги Бирдамлик ва Янгибоғ кўчалари туташган ўринда 120 ўринли мактабгача таълим ташкилоти, Арна бўйи маҳалласи Покизалик кўчасида 150 ўринга мўлжалланган янги мактабгача таълим ташкилоти бинолари янгидан барпо этилмоқда. “Zamin qurilish trans servis” МЧЖ пудратчи ташкилоти томонидан ушбу объектларнинг қурилиш ишлари жадал суръатлар билан олиб борилмоқда.

Шунингдек, Дўстлик маҳалласи Чаманзор кўчасида 240 ўринли янги мактабгача таълим ташкилоти, Ўрта қалъа ҳамда Тошёп овуллари ҳудудларида 3 қаватдан иборат маиший хизмат кўрсатиш маркази, шунингдек, Тош ёп овули ҳудудида кунига 50 та ташрифга мўлжалланган янги қишлоқ врачлик пункти биноларини қуриш режалаштирилган бўлиб, қурилиш ишлари бошлаб юборилган.

Маълумот ўрнида айтиш жоизки, Президент қарорида Ислом тараққиёт банки ва OPEK халқаро тараққиёт жамғармасидан  20 йил муддатга, 5 йиллик имтиёзли давр билан 75 млн АҚШ доллари миқдорида қарз жалб қилиниши кўзда тутилган.

Шунингдек, қарорда “Қишлоқ жойларни барқарор ривожлантириш” лойиҳасининг амалга оширилишида Бирлашган миллатлар ташкилоти Тараққиёт дастурининг Ўзбекистондаги ваколатхонаси лойиҳани амалга ошириш даврида масъул ижро этувчи органнинг ҳамкори сифатида фаолият кўрсатиши ва у томонидан лойиҳа учун 3,05 млн АҚШ доллари миқдорида грант маблағи ажратилиши, лойиҳани амалга оширишда Ўзбекистон Республикасининг улуши 59,95 млн АҚШ доллари миқдоридаги маблағлардан иборат бўлиши қайд этилган.

“Қишлоқ жойларни барқарор ривожлантириш” лойиҳаси Қорақалпоғистон Республикаси, Бухоро, Навоий ва Хоразм вилоятларининг 20та туманидаги 170та қишлоқ ва маҳалла, шундан 40та марказий, 130та ёндош маҳаллаларни қамраб олиши белгиланган бўлиб, лойиҳа 2021-2025 йилларда амалга оширилади.

Чарос Арслонова, туман ҳокимлигининг Ахборот хизмати раҳбари.