Туманнинг иқтисодий салоҳиятини ошириш йўлида

Мамлакат иқтисодиётини юксалтириш ва аҳоли турмуш фаровонлигини янада яхшилашда янги ишлаб чиқариш қувватлари ташкил қилишнинг аҳамияти ниҳоятда катта. Амударё туманида ҳам бу борада салмоқли ишлар амалга оширилмоқда.

“NUKUS DILISHA” МЧЖ томонидан амалга оширилаётган ун ишлаб чиқариш заводи лойиҳаси Қорақалпоғистон Республикасидаги муҳим саноат ташаббусларидан бири бўлиб, унинг натижасида маҳаллий ун маҳсулотларига бўлган талабни қондириш, янги иш ўринлари яратиш ва аҳоли фаровонлигини ошириш мақсад қилинган. Корхона учун Президент фармони асосида қишлоқ хўжалигига мўлжалланмаган 1,5 гектар ва қишлоқ хўжалигига мўлжалланган 40,6 гектар ер майдонлари тўғридан-тўғри ажратилган. Лойиҳанинг умумий қиймати 11 миллиард сўмни ташкил этади, шундан 7,9 миллиард сўми банк кредитидир.

Лойиҳа тўлиқ амалга оширилгач, заводнинг ишлаб чиқариш қуввати йилига 2 минг тонна унни ташкил этиши режалаштирилган бўлиб, бу ҳажм маҳаллий эҳтиёжларни қондириш учун тўлиқ етарли даражада. Шунингдек, заводда 30 нафар янги иш ўринлари яратилиши кутилмоқда. Бу эса аҳоли бандлигига ижобий таъсир кўрсатади.

Айни пайтда завод қурилиш ишларининг 80 фоизи бажарилган. Ғалла қабул қилиш пунктлари тўлиқ қурилиб, ишлаб чиқариш цехини тайёрлаш ишлари олиб борилмоқда. Зарур асбоб-ускуналар учун кредит маблағлари ажратилган бўлиб, уларни олиб келиш бўйича тегишли чоралар кўрилмоқда. Лойиҳани муваффақиятли амалга ошириш учун Туркиядан тажрибали мутахассислар жалб қилинган ва 2024 йил 20 декабрь санасигача заводни тўлиқ ишга тушириш режалаштирилмоқда.

Туманнинг иқтисодий салоҳиятини янада ошириш мақсадида амалга оширилаётган йирик лойиҳалардан яна бири “AMUDARYOTEX” МЧЖга қарашли ўсимлик ёғини ишлаб чиқариш лойиҳасидир. Ушбу лойиҳа маҳаллий бозорда ўсимлик ёғига бўлган талабни қондиришга ҳисса қўшиш билан бирга, туман аҳолиси учун қўшимча иш ўринларини яратишга ҳам хизмат қилади.

Лойиҳанинг умумий қиймати 102 миллиард сўмни ташкил қилади, бундан 3,5 миллион доллар миқдоридаги маблағ хорижий инвестиция сифатида киритилган. Корхона тўла қувватда йилига 10 минг тонна ўсимлик ёғини ишлаб чиқаришга мўлжалланган. Корхона ишга тушса, 85 нафар юртдошларимиз доимий иш ўрни ва барқарор даромадга эга бўладилар.

Корхонага ускуналар асосан Хитой Халқ Республикасидан келтирилган бўлиб, ишлаб чиқариш жараёнларини самарали ташкил этиш мақсадида корхонага “Агро банк” томонидан молиявий хизматлар кўрсатиб келинмоқда.

Лойиҳанинг қурилиши 2020 йил март ойида бошланган бўлиб, 2024 йил декабрь ойида тўлиқ фойдаланишга топширилиши режалаштирилган. Мазкур корхона 2,5 гектар майдонда жойлашган ва унинг 10,3 минг квадрат метрини ёпиқ иншоотлар ташкил этади. Бу ердаги ишлаб чиқариш жараёни нафақат ички бозор талабини қондириш, балки экспорт салоҳиятини оширишга ҳам хизмат қилади.

Корхона томонидан йилига 12 миллиард сўм миқдорида солиқ тўланиши ҳисоб-китоб қилинган. Шу сабабли ҳам лойиҳанинг ишга тушиши натижасида туманнинг иқтисодий ва ижтимоий ривожланиши янада тезлашади.

Мазкур лойиҳалар туман учун муҳим иқтисодий аҳамиятга эга бўлиб, улар маҳаллий ишлаб чиқарувчиларни қўллаб-қувватлаш ҳамда янги иш ўринлари яратиш орқали аҳоли турмуш фаровонлигини оширишга хизмат қилади.