“Инсонга хизмат – олий қадрият” шиори остида коучинг дастури ташкил этилди

2024 йил 6 ноябрь куни Амударё туманидаги 82-сонли умумий ўрта таълим мактабининг мажлислар залида аҳолининг ҳуқуқий саводхонлигини оширишга қаратилган “Инсонга хизмат – олий қадрият” шиори остида коучинг дастури ташкил этилди. Тадбир Амударё тумани “Инсон” ижтимоий хизматлар маркази томонидан ўтказилди ва унда тумани ҳокимининг ўринбосари Гўзал Собурова, марказ директори Ғуломжон Дуйсенбаев ҳамда марказ ходимлари иштирок этди.

Тадбирда ташкилотлчилар томонидан марказнинг асосий вазифалари ва ижтимоий ходимлар томонидан кўрсатиладиган хизматлар ҳақида маълумотлар тақдим этилди. Шунингдек, фуқароларни қийнаб келаётган ижтимоий муаммоларга ҳуқуқий ечимлар таклиф қилинди.

Тадбир давомида туманда яшовчи фуқаролар ўзларини қизиқтирган саволлар билан масъулларга мурожаат қилиб, жавоблар олиш имконига эга бўлдилар. Улар марказнинг асосий йўналишлари ва амалга оширадиган ишлари ҳақида маълумотлар билан танишдилар.

Тадбир давомида марказнинг маҳаллада ижтимоий хизматларни ташкил этиш шўъбаси мудири, бош ижтимоий ходим Баҳриддин Турабаев маҳаллада аҳолига қулай шароит яратиш, ижтимоий ёрдамни ташкил этиш бўйича олиб борилаётган ишлар ҳақида маълумотлар берди.

Катта ёшдагилар ва оғир ижтимоий вазиятга тушган оилалар билан ишлаш шўъбаси мудири Ҳамиджон Нарбаев эса аҳолининг заиф қатламларига ёрдам бериш, уларни қўллаб-қувватлаш борасида амалга оширилган ҳамда келгусида режалаштирилган ишлари ҳақида батафсил маълумотлар берди.

Иштирокчилар марказнинг ижтимоий тўловлар шўъбаси бўйича бош мутахассис Сирожиддин Жумабаевнинг ижтимоий тўловлар тартиби, уларни тўлаш жараёни ва аҳолини қўллаб-қувватлашдаги роли ҳақидаги тақдимотини ҳам қизиқиб тингладилар.

Марказнинг болаларни ижтимоий ҳимоя қилиш шўъбаси мудири Жаҳонгир Холмуродов эса коучинг иштирокчиларига болаларнинг ижтимоий ҳимояси, уларнинг ҳуқуқларини таъминлаш ва қийинчиликларга дуч келган оилалар билан ишлаш жараёни ҳақида маълумотлар берди.

“Инсон” ижтимоий хизматлар марказининг ногиронлиги бўлган шахслар билан ишлаш шўъбаси мудири Муроджон Болтаев эса имконияти чекланган шахсларни қўллаб-қувватлаш, улар учун қулай муҳит яратиш ҳамда уларнинг жамиятда ўз ўрнини топишлари учун амалга оширилаётган ишлар ҳақида тўхталиб ўтди.

Тадбир давомида иштирокчиларга марказнинг турли фаолият йўналишлари, жумладан, аҳолининг ижтимоий ҳимояси ва ёрдам бериш механизмлари ҳақида кенг турда маълумотлар берилди. Шунингдек, фуқароларнинг кундалик ҳаётида дуч келадиган ижтимоий муаммоларга ечим топиш мақсадида иштирокчиларга ҳуқуқий маслаҳатлар ҳам берилди. Бу хизматлар аҳолининг турли гуруҳлари, жумладан, болалар, кекса ёшдаги шахслар ва ногиронлиги бор кишиларни қўллаб-қувватлашга йўналтирилгани билан ниҳоятда муҳим аҳамият касб этди.

Тадбир сўнгида иштирокчиларга марказ директори Ғуломжон Дуйсенбаев томонидан фуқароларнинг ҳуқуқий ва ижтимоий масалаларга қизиқиши учун миннатдорлик билдирилди. Шунингдек, 10 нафар фуқарога эсдалик совғалари топширилди, бу эса марказнинг фуқароларга нисбатан эътибори ва эҳтиромини амалда намоён қилди.

“Инсонга хизмат – олий қадрият” шиори остидаги ташкил қилинган коучинг аҳолининг ижтимоий ҳимояга бўлган эҳтиёжини қондиришда ва бу борадаги билимларини оширишда муҳим аҳамият касб этиб, жамиятда ижтимоий барқарорликни мустаҳкамлашга хизмат қилиши шубҳасиз.