“Insonga xizmat – oliy qadriyat” shiori ostida kouching dasturi tashkil etildi

2024-yil 6-noyabr kuni Amudaryo tumanidagi 82-sonli umumiy oʻrta taʼlim maktabining majlislar zalida aholining huquqiy savodxonligini oshirishga qaratilgan “Insonga xizmat – oliy qadriyat” shiori ostida kouching dasturi tashkil etildi. Tadbir Amudaryo tumani “Inson” ijtimoiy xizmatlar markazi tomonidan oʻtkazildi va unda tumani hokimining oʻrinbosari Goʻzal Soburova, markaz direktori Gʻulomjon Duysenbayev hamda markaz xodimlari ishtirok etdi.

Tadbirda tashkilotlchilar tomonidan markazning asosiy vazifalari va ijtimoiy xodimlar tomonidan koʻrsatiladigan xizmatlar haqida maʼlumotlar taqdim etildi. Shuningdek, fuqarolarni qiynab kelayotgan ijtimoiy muammolarga huquqiy yechimlar taklif qilindi.

Tadbir davomida tumanda yashovchi fuqarolar oʻzlarini qiziqtirgan savollar bilan masʼullarga murojaat qilib, javoblar olish imkoniga ega boʻldilar. Ular markazning asosiy yoʻnalishlari va amalga oshiradigan ishlari haqida maʼlumotlar bilan tanishdilar.

Tadbir davomida markazning mahallada ijtimoiy xizmatlarni tashkil etish shoʻʼbasi mudiri, bosh ijtimoiy xodim Bahriddin Turabayev mahallada aholiga qulay sharoit yaratish, ijtimoiy yordamni tashkil etish boʻyicha olib borilayotgan ishlar haqida maʼlumotlar berdi.

Katta yoshdagilar va ogʻir ijtimoiy vaziyatga tushgan oilalar bilan ishlash shoʻʼbasi mudiri Hamidjon Narbayev esa aholining zaif qatlamlariga yordam berish, ularni qoʻllab-quvvatlash borasida amalga oshirilgan hamda kelgusida rejalashtirilgan ishlari haqida batafsil maʼlumotlar berdi.

Ishtirokchilar markazning ijtimoiy toʻlovlar shoʻʼbasi boʻyicha bosh mutaxassis Sirojiddin Jumabayevning ijtimoiy toʻlovlar tartibi, ularni toʻlash jarayoni va aholini qoʻllab-quvvatlashdagi roli haqidagi taqdimotini ham qiziqib tingladilar.

Markazning bolalarni ijtimoiy himoya qilish shoʻʼbasi mudiri Jahongir Xolmurodov esa kouching ishtirokchilariga bolalarning ijtimoiy himoyasi, ularning huquqlarini taʼminlash va qiyinchiliklarga duch kelgan oilalar bilan ishlash jarayoni haqida maʼlumotlar berdi.

“Inson” ijtimoiy xizmatlar markazining nogironligi boʻlgan shaxslar bilan ishlash shoʻʼbasi mudiri Murodjon Boltayev esa imkoniyati cheklangan shaxslarni qoʻllab-quvvatlash, ular uchun qulay muhit yaratish hamda ularning jamiyatda oʻz oʻrnini topishlari uchun amalga oshirilayotgan ishlar haqida toʻxtalib oʻtdi.

Tadbir davomida ishtirokchilarga markazning turli faoliyat yoʻnalishlari, jumladan, aholining ijtimoiy himoyasi va yordam berish mexanizmlari haqida keng turda maʼlumotlar berildi. Shuningdek, fuqarolarning kundalik hayotida duch keladigan ijtimoiy muammolarga yechim topish maqsadida ishtirokchilarga huquqiy maslahatlar ham berildi. Bu xizmatlar aholining turli guruhlari, jumladan, bolalar, keksa yoshdagi shaxslar va nogironligi bor kishilarni qoʻllab-quvvatlashga yoʻnaltirilgani bilan nihoyatda muhim ahamiyat kasb etdi.

Tadbir soʻngida ishtirokchilarga markaz direktori Gʻulomjon Duysenbayev tomonidan fuqarolarning huquqiy va ijtimoiy masalalarga qiziqishi uchun minnatdorlik bildirildi. Shuningdek, 10 nafar fuqaroga esdalik sovgʻalari topshirildi, bu esa markazning fuqarolarga nisbatan eʼtibori va ehtiromini amalda namoyon qildi.

“Insonga xizmat – oliy qadriyat” shiori ostidagi tashkil qilingan kouching aholining ijtimoiy himoyaga boʻlgan ehtiyojini qondirishda va bu boradagi bilimlarini oshirishda muhim ahamiyat kasb etib, jamiyatda ijtimoiy barqarorlikni mustahkamlashga xizmat qilishi shubhasiz.