Туман Прокуратураси ходимлари Аёқчи ва Арна бўйи маҳаллаларида бўлиб, оталиққа олинган ёшлар муаммоларини ўрганди

Ўзбекистон Республикаси Президенти, Қуроллик Кучлар Олий Бош қўмондони Шавкат Мирзиёев томонидан 2024 йил 12 январь куни ўтказилган Хафсизлик кенгашининг кенгайтирилган йиғилишидаги белгиланган вазифалардан келиб чиқиб, ҳуқуқ-тартибот ва мудофаа органларига республика миқёсида 4 миллион нафар ёшлар оталиққа бирикирилган эди. Жумладан, ҳудудлардаги 1-сектор бўйича Мудофаа вазирлиги, 2-сектор бўйича Фавқулодда вазиятлар вазирлиги ҳамда Прокуратура органлари, 3-сектор бўйича Ички ишлар вазирлиги ҳамда 4-сектор бўйича Адлия вазирлиги ва Миллий гвардия масъулларига ўзларига бириктирилган уюшмаган ёшлар ўртасида самарали профилактик ишларни ташкил этиш, уларни ижтимоий ҳаётга мослаштириш, соғлом турмуш тарзида ҳаёт кечиришига кўмаклашиш ҳамда ватанпарварлик руҳида тарбиялаш бўйича қўшимча вазифалар юклатилган эди.

Амударё тумани Прокуратураси томонидан туманнинг 2-сектори ҳудудидаги 9та маҳаллаларда яшовчи 3 минг 313 нафар ёшлар оталиққа олинган бўлиб, шулардан оғир тоифадаги ёшлар 84 нафарни, ишсиз ёшлар эса  303 нафарни ташкил қилади.

Оталиққа олинган ишсиз ёшларнинг бандлигини таъминлаш мақсадида прокуратура ходимлари тегишли ташкилотлар мутасаддилари билан биргаликда амалий чора-тадбирларни кўрмоқдалар. Жумладан, субсидиялар ажратиш орқали ёшлар учун даромад манбаини яратиш, меҳнат ярмаркалари ўтказиш орқали уларнинг бандлигини таъминлаш, касб-ҳунарга ўқиш бўйича тизимли ишлар амалга оширилмоқда.

Яқинда прокуратура ходимлари Аёқчи ва Арна бўйи маҳаллаларида бўлиб, оталиққа олинган ёшлар билан яқиндан суҳбатлашди. Ер бериш орқали бандлиги таъминланган ёшлар билан учрашув чоғида уларни қийнаб келаётган муаммолар жойида ҳал қилиниб, самарали фаолият юритишлари учун шароитлар яратиш масаласига алоҳида эътибор қаратилди.

Таъкидлаш керакки, ушбу тизимни йўлга қўйишдан асосий мақсад ёшларни Ватанга садоқат руҳида тарбиялаш, уларнинг ҳуқуқий саводхонлигини ва қонунга итоаткорлик ҳиссини ошириш, ижтимоий-маиший муаммоларини ҳал этиш мақсадида таълим муассалари ҳамда жамоатчилик вакиллари билан ҳамкорликда профилактик ишларни ташкил этишдир.

Шу мақсадда туман Прокуратураси масъуллари маҳаллаларда ёшлар томонидан содир этилаётган ҳуқуқбузарликларни аниқлаш ва барвақт олдини олишда профилактика инспекторлари, маҳалла раиси, ёшлар етакчиси, ҳоким ёрдамчиси, хотин-қизлар фаоли, ижтимоий ходим, солиқ инспектори ва бошқа мутассади ташкилотлар билан ҳамкорликни йўлга қўйган ҳолда жамиятда ёшларнинг ролини ошириш ишларига муносиб ҳисса қўшиб келмоқдалар.

Амалдаги тартиб бўйича оталиққа оладиган ҳуқуқ-тартибот ва мудофаа органлари масъуллари ўзларига бириктирилган секторлардаги маҳаллалар кесимида 7та тоифадаги ёшлар билан ишлашга жавобгар ҳисобланадилар. Амударё тумани Прокуратураси масъуллари ҳам ёшлар билан 6та босқич бўйича яқиндан ишлашиб, самарали натижаларга эришмоқдалар. Жумладан, ёшлар рўйхатини шакллантириш, бириктирилган масъул раҳбарлар, профилактика инспекторлари ва ёшлар етакчиларининг ёшлар билан якка тартибда суҳбатлар ўтказишларини таъминлаш орқали аниқланган муаммолар тизимлаштирилмоқда.

Кейинчалик бириктирилган ёшларнинг муаммоларини ҳал қилиш бўйича “Чора-тадбирлар режаси” ишлаб чиқилиб, уларнинг муаммоларини ҳал этиш бўйича аниқ, манзилли ишлар амалга оширилмоқда.

Бир сўз билан айтганда, ушбу тизим оталиққа олинган ёшларнинг ватан равнақи ва юрт тараққиётига муносиб ҳисса қўшадиган улкан куч бўлиб майдонга чиқишларига пухта замин яратмоқда.