"Миллий тикланиш" демократик партиясидан депутатликка номзодлар сайловчилар билан учрашди
2024 йил 27 октябрь куни мамлакатимиз тарихида муҳим сиёсий жараён — Олий Мажлис Қонунчилик палатаси ва маҳаллий Кенгашларга сайловлар бўлиб ўтади. Жорий йилги сайловлар янги демократик ислоҳотлар шароитида ўтказилаётгани билан аҳамиятлидир. Ўтган йиллардаги сиёсий ўзгаришлар ва қонунчилик соҳасидаги ислоҳотлар сайлов жараёнининг янада очиқ ва шаффоф ўтишини таъминлашга хизмат қилиши шубҳасиз.
Айни кунларда мамлакатимиз бўйлаб давом этаётган сайловолди ташвиқотида барча сиёсий партиялар ва депутатликка номзодлар фаол иштирок этиб, ҳар бир партия ўз сайловолди дастурларини илгари суриб, ҳар бир номзод мамлакатни ривожлантириш борасидаги ўз қарашларини тақдим этмоқда. Сайловолди кампанияси давомида партиялар турли йўналишлардаги масалаларга аҳамият қаратмоқда: иқтисодий ривожланиш, ижтимоий адолат, таълим ва соғлиқни сақлаш тизимини ислоҳ қиилиш каби муҳим масалалар сайловчиларнинг диққат марказида.
8 октябрь куни сайловолди ташвиқоти доирасида Амударё туманидаги 9-сонли болалар мусиқа ва санъат мактаби биносида ҳам “Миллий тикланиш” демократик партиясидан депутатликка номзодларнинг сайловчилар билан учрашуви бўлиб ўтди. Учрашувда Ўзбекистон Республикаси Олий Мажлиси Қонунчилик палатаси, Қорақалпоғистон Республикаси Жўқорғи Кенгеси ва халқ депутатлари Амударё туман Кенгаши депутатлигига “Миллий тикланиш” демократик партиясидан номзодлар, уларнинг ишончли вакиллари, партия фаоллари ва сайловчилар вакиллари иштирок этишди.
Депутатликка номзодлар ўз нутқларида таъкидлаганларидек, партиянинг бош мақсади – қудратли давлатга таянган, қонунлари миллий ва умуминсоний қадриятларга уйғун, инсон қадри баланд бўлган фаровон жамият қуришдир. Етти йўналишдан иборат 2025 – 2029 йилларга мўлжалланган Сайловолди дастурнинг асосий шиори – “Қадриятларга таянган тараққиёт”дир.
Шу билан бирга, партия учун энг муҳим масалалардан яна бири ёш авлодни тарбиялашдир. Учрашув давомида бу йилги сайловолди дастурда бош ғоя саналган “Инсон ўзгарса, жамият ўзгаради” ғояси асосида таълим йўналишини янада ривожлантириш, мактабгача таълим жараёнидан бошлаб мактабларда, олий таълим муассасаларида фақат сифатли кадрлар тайёрлаш масаласига алоҳида эътибор қаратиш, хотин-қизлар учун жамиятда муносиб иш ўринлари ва меҳнат шароитини яратиш, фарзанд тарбиясига алоҳида эътибор қаратиш, миллий кадрлар тайёрлаш сифатини яхшилаш ва ёшлар билан ишлашда уларнинг хоҳиш-истакларини инобатга олган ҳолда касбга тайёрлаш ёки таълим соҳаси бўйича йўналишларни белгилаб бериш каби тармоқларни ўз ичига олган дастур ҳақида батафсил маълумотлар берилди.
Партия янги сайловолди дастурида миллий қадриятларни сақлаш ва тараққиётни таъминлаш мақсадида миллий маданият ва маънавиятни ривожлантириш, қадриятларни сақлаш ва бойитишга алоҳида эътибор қаратиш билан бирга маданий мерос муҳофазаси, ундан фойдаланишнинг ташкилий-ҳуқуқий асосларини яратишни асосий вазифа сифатида белгилаб олган.
Бир сўз билан айтганда, “Миллий тикланиш” демократик партиясининг 2025-2029 йилларга мўлжалланган сайловолди дастури мамлакатни миллий қадриятлар асосида ривожлантиришга қаратилган қатор таклиф ва ташаббусларни ўз ичига олади. Партия мамлакатимизнинг барқарор ривожланишини ва халқ фаровонлигини таъминлаш учун турли соҳаларда кенг кўламли ислоҳотларни амалга оширишни ўз олдига мақсад қилиб қўйган.
Депутатликка номзодлар, агар сайловларда ғалаба қозонса, партиянинг сайловолди дастурида белгиланган устувор вазифаларни рўёбга чиқариш учун тегишли тартибда Қонунчилик палатаси, Жўқорғи Кенгес ва халқ депутатлари Амударё туман Кенгаши ишида фаол иштирок этишларини маълум қилиб, сайловчиларни яқинлашиб келаётган муҳим сиёсий тадбирда партиядан кўрсатилган номзодларга овоз беришга чақирдилар.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
