"Milliy tiklanish" demokratik partiyasidan deputatlikka nomzodlar saylovchilar bilan uchrashdi

2024-yil 27-oktyabr kuni mamlakatimiz tarixida muhim siyosiy jarayon — Oliy Majlis Qonunchilik palatasi va mahalliy Kengashlarga saylovlar boʻlib oʻtadi. Joriy yilgi saylovlar yangi demokratik islohotlar sharoitida oʻtkazilayotgani bilan ahamiyatlidir. Oʻtgan yillardagi siyosiy oʻzgarishlar va qonunchilik sohasidagi islohotlar saylov jarayonining yanada ochiq va shaffof oʻtishini taʼminlashga xizmat qilishi shubhasiz.

Ayni kunlarda mamlakatimiz boʻylab davom etayotgan saylovoldi tashviqotida barcha siyosiy partiyalar va deputatlikka nomzodlar faol ishtirok etib, har bir partiya oʻz saylovoldi dasturlarini ilgari surib, har bir nomzod mamlakatni rivojlantirish borasidagi oʻz qarashlarini taqdim etmoqda. Saylovoldi kampaniyasi davomida partiyalar turli yoʻnalishlardagi masalalarga ahamiyat qaratmoqda: iqtisodiy rivojlanish, ijtimoiy adolat, taʼlim va sogʻliqni saqlash tizimini isloh qiilish kabi muhim masalalar saylovchilarning diqqat markazida.

8-oktyabr kuni saylovoldi tashviqoti doirasida Amudaryo tumanidagi 9-sonli bolalar musiqa va sanʼat maktabi binosida ham “Milliy tiklanish” demokratik partiyasidan deputatlikka nomzodlarning saylovchilar bilan uchrashuvi boʻlib oʻtdi. Uchrashuvda Oʻzbekiston Respublikasi Oliy Majlisi Qonunchilik palatasi, Qoraqalpogʻiston Respublikasi Joʻqorgʻi Kengesi va xalq deputatlari Amudaryo tuman Kengashi deputatligiga “Milliy tiklanish” demokratik partiyasidan nomzodlar, ularning ishonchli vakillari, partiya faollari va saylovchilar vakillari ishtirok etishdi.

Deputatlikka nomzodlar oʻz nutqlarida taʼkidlaganlaridek, partiyaning bosh maqsadi – qudratli davlatga tayangan, qonunlari milliy va umuminsoniy qadriyatlarga uygʻun, inson qadri baland boʻlgan farovon jamiyat qurishdir. Yetti yoʻnalishdan iborat 2025 – 2029-yillarga moʻljallangan Saylovoldi dasturning asosiy shiori – “Qadriyatlarga tayangan taraqqiyot”dir.

Shu bilan birga, partiya uchun eng muhim masalalardan yana biri yosh avlodni tarbiyalashdir. Uchrashuv davomida  bu yilgi  saylovoldi dasturda bosh gʻoya sanalgan “Inson oʻzgarsa, jamiyat oʻzgaradi” gʻoyasi asosida taʼlim yoʻnalishini yanada rivojlantirish, maktabgacha taʼlim jarayonidan boshlab maktablarda, oliy taʼlim muassasalarida faqat sifatli kadrlar tayyorlash masalasiga alohida eʼtibor qaratish, xotin-qizlar uchun  jamiyatda munosib ish oʻrinlari  va mehnat sharoitini  yaratish, farzand tarbiyasiga alohida eʼtibor  qaratish, milliy kadrlar tayyorlash  sifatini  yaxshilash  va yoshlar bilan ishlashda  ularning xohish-istaklarini  inobatga olgan holda  kasbga tayyorlash  yoki taʼlim sohasi boʻyicha yoʻnalishlarni belgilab berish kabi tarmoqlarni oʻz ichiga olgan dastur haqida batafsil maʼlumotlar berildi. 

Partiya yangi saylovoldi dasturida milliy qadriyatlarni saqlash va taraqqiyotni taʼminlash maqsadida milliy madaniyat va maʼnaviyatni rivojlantirish, qadriyatlarni saqlash va boyitishga alohida eʼtibor qaratish bilan birga madaniy meros muhofazasi, undan foydalanishning tashkiliy-huquqiy asoslarini yaratishni asosiy vazifa sifatida belgilab olgan.

Bir soʻz bilan aytganda, “Milliy tiklanish” demokratik partiyasining 2025-2029-yillarga moʻljallangan saylovoldi dasturi mamlakatni milliy qadriyatlar asosida rivojlantirishga qaratilgan qator taklif va tashabbuslarni oʻz ichiga oladi. Partiya mamlakatimizning barqaror rivojlanishini va xalq farovonligini taʼminlash uchun turli sohalarda keng koʻlamli islohotlarni amalga oshirishni oʻz oldiga maqsad qilib qoʻygan.

Deputatlikka nomzodlar, agar saylovlarda gʻalaba qozonsa, partiyaning saylovoldi dasturida belgilangan ustuvor vazifalarni roʻyobga chiqarish uchun tegishli tartibda Qonunchilik palatasi, Joʻqorgʻi Kenges va xalq deputatlari Amudaryo tuman Kengashi ishida faol ishtirok etishlarini maʼlum qilib, saylovchilarni yaqinlashib kelayotgan muhim siyosiy tadbirda partiyadan koʻrsatilgan nomzodlarga ovoz berishga chaqirdilar.