ФАРОВОН МАҲАЛЛАСИ “ЕТТИЛИГИ” “КАМБАҒАЛЛИКДАН — ФАРОВОНЛИК САРИ” ҒОЯСИ АСОСИДА АҲОЛИГА МУРОЖААТ ҚИЛДИ

Муҳтарам Президентимиз мамлакатимизда камбағалликка қарши самарали курашиш мақсадида ўзининг 2022 йил 20 декабрдаги Олий Мажлис ва Ўзбекистон халқига Мурожаатномасида “Янги Ўзбекистонни ижтимоий давлат тамойили асосида қуриш” деган устувор мақсадни белгилаб, “Камбағалликдан – фаровонлик сари” ғоясини илгари сурган эди. Бугунги кунда мамлакатимизда камбағалликни қисқартириш, одамлар турмуш даражасини ошириш умуммиллий ҳаракатга айланди. Юртбошимиз айтганидек, ижтимоий давлат, бу — энг аввало, инсон салоҳиятини рўёбга чиқариш учун тенг имкониятлар, одамлар муносиб ҳаёт кечиришига зарур шароитлар яратиш, камбағалликни қисқартириш, демакдир.

Жорий йилнинг 26 сентябрь санасида Амударё туманининг Фаровон маҳалла фуқаролар йиғини “еттилиги” аъзолари – фуқаролар йиғини раиси Мадамин Казаков, ҳоким ёрдамчиси Муқаддас Бекназарова, маҳалла хотин-қизлар фаоли Сайёра Карабаева, ёшлар етакчиси Шоҳруҳ Рўзметов, профилактика инспектори Пирбой Ауезов, ижтимоий ходим Мавлуда Қаландарова ҳамда солиқ инспектори Равшан Ариковлар кенг аҳоли вакиллари билан учрашиб, маҳалла ҳудудида камбағалликни қисқартириш, одамлар турмуш даражасини ошириш мақсадида “Камбағалликдан ­– фаровонлик сари” ғоясини ҳар бир фуқарога, ҳар бир хонадонга ҳамда оилага етказиш мақсадида мурожаат билан чиқдилар.

Тумандаги 40-сонли умумтаълим мактабининг фаоллар залида бўлиб ўтган учрашув тадбирида маҳалла фуқаролар йиғини раиси Мадамин Казаков раҳбарлигидаги “маҳалла еттилиги” аъзолари ўз мурожаатларида сўнгги йилларда маҳалла ҳудудида истиқомат қилувчи оғир турмуш шароитида кун кечираётган, ўзгалар кўмагига муҳтож аҳоли вакилларининг турмушига фаровонлик олиб киришга қаратилган кенг кўламли ислоҳотлар натижаси амалда намоён бўлаётганини алоҳида таъкидладилар.

Аввало шуни алоҳида қайд этиш жоизки, “маҳалла еттилиги” аъзолари томонидан аҳолининг турмуш шароитлари уйма-уй кириб бориб, муфассал ўрганилиб, хатловдан ўтказилди. Ушбу хатлов асосида ижтимоий ҳимояга муҳтож аҳоли рўйхати шакллантирилди. Эндиликда маҳалладаги камбағал оилалар, ким нимага муҳтож, уларга қандай ёрдам турларини кўрсатиш мумкин, барча-барчаси билан манзилли ишлаш имконияти яратилди. Бу эса ҳар бир муаммоли хонадон, оила ва фуқаро билан алоҳида дастур асосида манзилли ишлаш орқали муаммоларни маҳалланинг ўзида ҳал қилиш имкониятини янада оширди.

Шунингдек, “маҳалла еттилиги” аъзоларининг аҳолига мурожаатида маҳаллада ишсизликни бартараф этиш, ёшлар муаммоларини манзилли ўрганиш ва ҳал этишга қаратилган вазифалар кўлами, тадбиркорликни янада ривожлантириш, камбағал оилаларнинг уй-жойларини таъмирлаш, уй-жойга муҳтож аҳоли вакилларига янгидан иморат қуриб бериш, ҳудуддаги хонадонлар атрофини, бутун маҳалла ҳудудини кўкаламзор гўшага айлантириш масалалари илгари сурилди.

Бундан ташқари, аҳолининг ободонлаштириш ва тозалик билан боғлиқ муаммоларини жойида бартараф этиш “маҳалла еттилиги”нинг доимий диққат-марказида туриши, йил бошидаги хатловга кўра аниқланган, чет элга ишлашга кетган маҳалланинг 45 нафар фуқароси билан “маҳалла еттилиги”нинг доимий алоқаси йўлга қўйилгани боис, уларнинг 18 нафари уйларига қайтгани ва миграциядан қайтганларни манзилли равишда иш билан таъминлашга қаратилган саъй-ҳаракатлар бундан кейин ҳам энг устувор вазифа бўлиб қолиши таъкидланди.

Шу билан бирга, “маҳалла еттилиги”нинг мурожаатида “Хорижга иш –маҳалладан” тамойилига кўра, аҳолини шартнома асосида яхши ҳақ тўланадиган ишларга тартибли тарзда юбориш бўйича манзилли режалар ишлаб чиқилгани, уларнинг тил ўрганиш, касб-ҳунар эгаллаш учун сарфланадиган харажатлари қоплаб берилиши, меҳнатга яроқли аҳоли ўртасида яхши даромад олиш, яхши яшашга интилиш, касб-ҳунар ўрганиш, тадбиркорликни йўлга қўйиш, томорқадан фойдаланиш ҳаракатларини ривожлантириш орқали камбағал оилалар билан манзилли ишлаб, уларга имтиёзли кредит ва субсидиялардан фойдаланиш маданиятини ўргатишга эътибор янада кучайтирилиши қайд этилди.

 Шунингдек, маҳаллада ўтган давр мобайнида 15 нафар аёлга имтиёзли кредит ва субсидиялар берилгани, 26 нафар йигит-қизнинг ташаббуслари қўллаб-қувватлангани, 8 та оиланинг олий таълим муассасасида таҳсил олаётган фарзандларига шартнома пуллари тўлаб берилгани, 66 нафар хотин-қиз ва 39 нафар ёшнинг бандлиги таъминлангани алоҳида эътироф этилиб, бу борадаги ишлар аҳоли иштирокида бундан кейин ҳам янгича мазмунда давом эттирилиши, аёл-қизлар ва ёшларни касб-ҳунар ўрганишга жалб этиш, ҳудуддаги тадбиркорлар, ишбилармонлар билан кўпроқ мулоқотни йўлга қўйиш, томорқадан самарали фойдаланиш маданиятини ошириш эътибор марказидаги масала бўлиб қолиши учрашув иштирокчиларига манзур бўлди.

Жорий йилда илк маротаба “камбағал оилалар портрети” яратилгани учрашув иштирокчилари томонидан мамнуният билан кутиб олинди. Хусусан, бу борада маҳаллада 10 та оила танлаб олиниб, бу оилаларни камбағалликдан олиб чиқиш чоралари кўрилаётгани, энг аввало, уларнинг бандлигини таъминлаш, касб-ҳунарга йўналтириш, имтиёзли кредитлар асосида тадбиркорлигини бошлашига кўмаклашишга қаратилган саъй-ҳаракатлар туфайли жорий йил охиригача маҳаллада бирорта ҳам камбағал оила қолмаслиги ҳақидаги ишлаб чиқилган чора-тадбирлардан маҳалла фуқаролари мамнун бўлдилар.

Аҳолида тадбиркорлик руҳини уйғотиш, инсоннинг ички куч-қуввати ва салоҳиятини тўлиқ рўёбга чиқаришга интилиш, бунинг учун уларга имтиёзли кредит ва субсидиялардан фойдаланиш маданиятини ўргатиш, бугун ишсиз, кимнингдир кўмагига муҳтож ўтирган фуқароларга эртага иш ўринлари яратиши учун шароитлар яратиш, маҳалла аҳлини ишли қилишга қаратилган “маҳалла еттилиги” аъзоларининг мурожаати учрашув иштирокчиларини янада жипслик билан ҳаракат қилишга, Фаровон маҳалласини камбағалликдан, ишсизликдан холи, обод ва фаровон гўшага айлантиришга ҳақиқий чорлов бўлди.

Равшан Баҳромов