FAROVON MAHALLASI “YeTTILIGI” “KAMBAGʻALLIKDAN — FAROVONLIK SARI” GʻOYaSI ASOSIDA AHOLIGA MUROJAAT QILDI

Muhtaram Prezidentimiz mamlakatimizda kambagʻallikka qarshi samarali kurashish maqsadida oʻzining 2022-yil 20-dekabrdagi Oliy Majlis va Oʻzbekiston xalqiga Murojaatnomasida “Yangi Oʻzbekistonni ijtimoiy davlat tamoyili asosida qurish” degan ustuvor maqsadni belgilab, “Kambagʻallikdan – farovonlik sari” gʻoyasini ilgari surgan edi. Bugungi kunda mamlakatimizda kambagʻallikni qisqartirish, odamlar turmush darajasini oshirish umummilliy harakatga aylandi. Yurtboshimiz aytganidek, ijtimoiy davlat, bu — eng avvalo, inson salohiyatini roʻyobga chiqarish uchun teng imkoniyatlar, odamlar munosib hayot kechirishiga zarur sharoitlar yaratish, kambagʻallikni qisqartirish, demakdir.

Joriy yilning 26-sentyabr sanasida Amudaryo tumanining Farovon mahalla fuqarolar yigʻini “yettiligi” aʼzolari – fuqarolar yigʻini raisi Madamin Kazakov, hokim yordamchisi Muqaddas Beknazarova, mahalla xotin-qizlar faoli Sayyora Karabayeva, yoshlar yetakchisi Shohruh Roʻzmetov, profilaktika inspektori Pirboy Auyezov, ijtimoiy xodim Mavluda Qalandarova hamda soliq inspektori Ravshan Arikovlar keng aholi vakillari bilan uchrashib, mahalla hududida kambagʻallikni qisqartirish, odamlar turmush darajasini oshirish maqsadida “Kambagʻallikdan ­– farovonlik sari” gʻoyasini har bir fuqaroga, har bir xonadonga hamda oilaga yetkazish maqsadida murojaat bilan chiqdilar.

Tumandagi 40-sonli umumtaʼlim maktabining faollar zalida boʻlib oʻtgan uchrashuv tadbirida mahalla fuqarolar yigʻini raisi Madamin Kazakov rahbarligidagi “mahalla yettiligi” aʼzolari oʻz murojaatlarida soʻnggi yillarda mahalla hududida istiqomat qiluvchi ogʻir turmush sharoitida kun kechirayotgan, oʻzgalar koʻmagiga muhtoj aholi vakillarining turmushiga farovonlik olib kirishga qaratilgan keng koʻlamli islohotlar natijasi amalda namoyon boʻlayotganini alohida taʼkidladilar.

Avvalo shuni alohida qayd etish joizki, “mahalla yettiligi” aʼzolari tomonidan aholining turmush sharoitlari uyma-uy kirib borib, mufassal oʻrganilib, xatlovdan oʻtkazildi. Ushbu xatlov asosida ijtimoiy himoyaga muhtoj aholi roʻyxati shakllantirildi. Endilikda mahalladagi kambagʻal oilalar, kim nimaga muhtoj, ularga qanday yordam turlarini koʻrsatish mumkin, barcha-barchasi bilan manzilli ishlash imkoniyati yaratildi. Bu esa har bir muammoli xonadon, oila va fuqaro bilan alohida dastur asosida manzilli ishlash orqali muammolarni mahallaning oʻzida hal qilish imkoniyatini yanada oshirdi.

Shuningdek, “mahalla yettiligi” aʼzolarining aholiga murojaatida mahallada ishsizlikni bartaraf etish, yoshlar muammolarini manzilli oʻrganish va hal etishga qaratilgan vazifalar koʻlami, tadbirkorlikni yanada rivojlantirish, kambagʻal oilalarning uy-joylarini taʼmirlash, uy-joyga muhtoj aholi vakillariga yangidan imorat qurib berish, hududdagi xonadonlar atrofini, butun mahalla hududini koʻkalamzor goʻshaga aylantirish masalalari ilgari surildi.

Bundan tashqari, aholining obodonlashtirish va tozalik bilan bogʻliq muammolarini joyida bartaraf etish “mahalla yettiligi”ning doimiy diqqat-markazida turishi, yil boshidagi xatlovga koʻra aniqlangan, chet elga ishlashga ketgan mahallaning 45 nafar fuqarosi bilan “mahalla yettiligi”ning doimiy aloqasi yoʻlga qoʻyilgani bois, ularning 18 nafari uylariga qaytgani va migratsiyadan qaytganlarni manzilli ravishda ish bilan taʼminlashga qaratilgan saʼy-harakatlar bundan keyin ham eng ustuvor vazifa boʻlib qolishi taʼkidlandi.

Shu bilan birga, “mahalla yettiligi”ning murojaatida “Xorijga ish –mahalladan” tamoyiliga koʻra, aholini shartnoma asosida yaxshi haq toʻlanadigan ishlarga tartibli tarzda yuborish boʻyicha manzilli rejalar ishlab chiqilgani, ularning til oʻrganish, kasb-hunar egallash uchun sarflanadigan xarajatlari qoplab berilishi, mehnatga yaroqli aholi oʻrtasida yaxshi daromad olish, yaxshi yashashga intilish, kasb-hunar oʻrganish, tadbirkorlikni yoʻlga qoʻyish, tomorqadan foydalanish harakatlarini rivojlantirish orqali kambagʻal oilalar bilan manzilli ishlab, ularga imtiyozli kredit va subsidiyalardan foydalanish madaniyatini oʻrgatishga eʼtibor yanada kuchaytirilishi qayd etildi.

 Shuningdek, mahallada oʻtgan davr mobaynida 15 nafar ayolga imtiyozli kredit va subsidiyalar berilgani, 26 nafar yigit-qizning tashabbuslari qoʻllab-quvvatlangani, 8 ta oilaning oliy taʼlim muassasasida tahsil olayotgan farzandlariga shartnoma pullari toʻlab berilgani, 66 nafar xotin-qiz va 39 nafar yoshning bandligi taʼminlangani alohida eʼtirof etilib, bu boradagi ishlar aholi ishtirokida bundan keyin ham yangicha mazmunda davom ettirilishi, ayol-qizlar va yoshlarni kasb-hunar oʻrganishga jalb etish, hududdagi tadbirkorlar, ishbilarmonlar bilan koʻproq muloqotni yoʻlga qoʻyish, tomorqadan samarali foydalanish madaniyatini oshirish eʼtibor markazidagi masala boʻlib qolishi uchrashuv ishtirokchilariga manzur boʻldi.

Joriy yilda ilk marotaba “kambagʻal oilalar portreti” yaratilgani uchrashuv ishtirokchilari tomonidan mamnuniyat bilan kutib olindi. Xususan, bu borada mahallada 10 ta oila tanlab olinib, bu oilalarni kambagʻallikdan olib chiqish choralari koʻrilayotgani, eng avvalo, ularning bandligini taʼminlash, kasb-hunarga yoʻnaltirish, imtiyozli kreditlar asosida tadbirkorligini boshlashiga koʻmaklashishga qaratilgan saʼy-harakatlar tufayli joriy yil oxirigacha mahallada birorta ham kambagʻal oila qolmasligi haqidagi ishlab chiqilgan chora-tadbirlardan mahalla fuqarolari mamnun boʻldilar.

Aholida tadbirkorlik ruhini uygʻotish, insonning ichki kuch-quvvati va salohiyatini toʻliq roʻyobga chiqarishga intilish, buning uchun ularga imtiyozli kredit va subsidiyalardan foydalanish madaniyatini oʻrgatish, bugun ishsiz, kimningdir koʻmagiga muhtoj oʻtirgan fuqarolarga ertaga ish oʻrinlari yaratishi uchun sharoitlar yaratish, mahalla ahlini ishli qilishga qaratilgan “mahalla yettiligi” aʼzolarining murojaati uchrashuv ishtirokchilarini yanada jipslik bilan harakat qilishga, Farovon mahallasini kambagʻallikdan, ishsizlikdan xoli, obod va farovon goʻshaga aylantirishga haqiqiy chorlov boʻldi.

Ravshan Bahromov