Намуна маҳалласи хонадонларига тоза ичимлик сув тармоғи тортилмоқда

Мамлакатимизда барча соҳаларда амалга оширилаётган изчил ислоҳотлар халқимиз ҳаётида ўз аксини топмоқда. Бу, айниқса, маҳалла институтини ривожлантириш, аҳолининг фаровонлигини оширишга қаратилган саъй-ҳаракатларда яққол намоён бўлаётир.

Хусусан, қишлоқ аҳолисининг турмуш маданиятини ошириш, шаҳар билан қишлоқ орасидаги тафовутларни қисқартириш, замон талаблари даражасидаги инфратузилма иншоотларини бунёд этиш борасидаги кенг қамровли ишлар туфайли энг чекка ҳудудлардаги қишлоқ ва маҳаллалар қиёфаси тубдан ўзгариб, янада кўркам қиёфа касб этмоқда.

Амударё туманидаги қишлоқ ва маҳаллаларда истиқомат қилувчи аҳолининг ҳаётдан рози яшашини таъминлаш мақсадида ишлаб чиқилган “Йўл харитаси”да белгиланган режага кўра, тумандаги Намуна маҳалла фуқаролар йиғинида ҳам кенг миқёсда ободонлаштириш ва кўкаламзорлаштириш ишлари олиб борилиб, ички йўллар, кўчалар тартибга келтирилди. Маҳалла аҳлининг ўзаро ҳамжиҳатлиги туфайли уй-жойларнинг ички ва ташқи фасад қисмлари сифатли таъмирланиб, кўчалар бўйларига мевали ва манзарали дарахтлар ҳамда гул кўчатлари экилди.

Кундан-кунга чирой очиб бораётган маҳаллада айни кунларда аҳоли фаровонлиги учун хизмат қилувчи яна бир хайрли иш амалга оширилмоқда. Намуналиклар учун 11,5 километр узунликдаги тоза ичимлик суви тармоғини тортиш ишлари жадал суръатларда олиб борилмоқда.

Мавжуд 288та хонадонни тоза ичимлик суви билан таъминлашга қаратилган мазкур инфратузилма иншоотини пудратчи ташкилот “Mang‘it mega hamkor” МЧЖ қурувчилари амалга оширишмоқда. Жорий йилнинг 9 сентябрь кунигача маҳалла ҳудудидаги жами 288та хонадонни тоза ичимлик суви билан таъминлаш учун зарур бўлган режадаги 11,5 километрлик сув тармоғининг 820 метр қисми тўлиқ тортилиб, 20 та хонадон тармоққа уланган бўлса, бугунги кунга келиб салкам 1,5 километрлик сув тармоғи тортилиб, тармоққа уланган хонадонлар сони 175тага етди.

Шу кунларда пудратчи ташкилот қурувчилари томонидан белгиланган режага мувофиқ хонадонлар жойлашган ҳудудларнинг шарт-шароитлари ўрганилиб, сув тармоғини тортиш, ёнғинга қарши гидрантлар ўрнатиш, қудуқлар тайёрлаш ва хонадонларни кетма-кет сув тармоғига улаш ишлари жадал суръатларда амалга оширилмоқда.

Маҳалла аҳли халқ фаровонлигини таъминлаш, обод ва файзли турмуш шароитини яратишга қаратилган бундай эзгу ишлардан, давлатимизнинг инсон омилига юксак эътиборидан ниҳоятда мамнун.

Робия Йўлдошева.