Namuna mahallasi xonadonlariga toza ichimlik suv tarmogʻi tortilmoqda

Mamlakatimizda barcha sohalarda amalga oshirilayotgan izchil islohotlar xalqimiz hayotida oʻz aksini topmoqda. Bu, ayniqsa, mahalla institutini rivojlantirish, aholining farovonligini oshirishga qaratilgan saʼy-harakatlarda yaqqol namoyon boʻlayotir.

Xususan, qishloq aholisining turmush madaniyatini oshirish, shahar bilan qishloq orasidagi tafovutlarni qisqartirish, zamon talablari darajasidagi infratuzilma inshootlarini bunyod etish borasidagi keng qamrovli ishlar tufayli eng chekka hududlardagi qishloq va mahallalar qiyofasi tubdan oʻzgarib, yanada koʻrkam qiyofa kasb etmoqda.

Amudaryo tumanidagi qishloq va mahallalarda istiqomat qiluvchi aholining hayotdan rozi yashashini taʼminlash maqsadida ishlab chiqilgan “Yoʻl xaritasi”da belgilangan rejaga koʻra, tumandagi Namuna mahalla fuqarolar yigʻinida ham keng miqyosda obodonlashtirish va koʻkalamzorlashtirish ishlari olib borilib, ichki yoʻllar, koʻchalar tartibga keltirildi. Mahalla ahlining oʻzaro hamjihatligi tufayli uy-joylarning ichki va tashqi fasad qismlari sifatli taʼmirlanib, koʻchalar boʻylariga mevali va manzarali daraxtlar hamda gul koʻchatlari ekildi.

Kundan-kunga chiroy ochib borayotgan mahallada ayni kunlarda aholi farovonligi uchun xizmat qiluvchi yana bir xayrli ish amalga oshirilmoqda. Namunaliklar uchun 11,5 kilometr uzunlikdagi toza ichimlik suvi tarmogʻini tortish ishlari jadal surʼatlarda olib borilmoqda.

Mavjud 288ta xonadonni toza ichimlik suvi bilan taʼminlashga qaratilgan mazkur infratuzilma inshootini pudratchi tashkilot “Mang‘it mega hamkor” MChJ quruvchilari amalga oshirishmoqda. Joriy yilning 9-sentyabr kunigacha mahalla hududidagi jami 288ta xonadonni toza ichimlik suvi bilan taʼminlash uchun zarur boʻlgan rejadagi 11,5 kilometrlik suv tarmogʻining 820 metr qismi toʻliq tortilib, 20 ta xonadon tarmoqqa ulangan boʻlsa, bugungi kunga kelib salkam 1,5 kilometrlik suv tarmogʻi tortilib, tarmoqqa ulangan xonadonlar soni 175taga yetdi.

Shu kunlarda pudratchi tashkilot quruvchilari tomonidan belgilangan rejaga muvofiq xonadonlar joylashgan hududlarning shart-sharoitlari oʻrganilib, suv tarmogʻini tortish, yongʻinga qarshi gidrantlar oʻrnatish, quduqlar tayyorlash va xonadonlarni ketma-ket suv tarmogʻiga ulash ishlari jadal surʼatlarda amalga oshirilmoqda.

Mahalla ahli xalq farovonligini taʼminlash, obod va fayzli turmush sharoitini yaratishga qaratilgan bunday ezgu ishlardan, davlatimizning inson omiliga yuksak eʼtiboridan nihoyatda mamnun.

Robiya Yoʻldosheva.