9-BOLALAR MUSIQA VA SANʼAT MAKTABI BOʻLIMLARI HISOBOT KONTsERTI OʻTKAZILDI

Yosh avlodning musiqa va sanʼat turlariga qiziqishi va qobiliyatini rivojlantirish, ijtimoiy faolligini oshirish, ularni xalqimiz anʼanalariga va milliy qadriyatlariga nisbatan hurmat ruhida tarbiyalash va milliy sanʼatimiz durdona asarlarini oʻrganishga jalb etish borasida tumanimizda ikkita Bolalar musiqa va sanʼat maktablari faoliyat yuritmoqda. Ushbu muassasalarda oʻquvchilarning isteʼdodini har tomonlama kamol toptirish, madaniy saviyasini yuksaltirishga keng sharoitlar yaratilgan. Oʻquvchilar milliy va jahon musiqasi, tasviriy sanʼatning yuksak namunalaridan va xalqimizning mumtoz musiqa, ashula merosi durdonalaridan bahramand boʻlib, ularni oʻrganishlariga pedagog murabbiylar sidqidildan intilishadi.

Mangʻit shahrida faoliyat yuritayotgan 9-sonli Bolalar musiqa va sanʼat maktabida 251 nafar oʻquvchilar 12 ta yoʻnalishlarda taʼlim olishmoqda. Ularga 40 nafar oʻqituvchilar musiqa va sanʼatdan chuqur taʼlim berib, iqtidorlarini yuksaltirishga intilishayapti.

Oʻquvchilar iqtidorlariga koʻra xalq cholgʻulari, anʼanaviy xonandalik, anʼanaviy cholgʻuchilik, fortepiano, torli cholgʻular, estarada xonandaligi, baxshichilik, xoreografiya, tasviriy sanʼat yoʻnalishlariga qamrab olinib, isteʼdodini rivojlantirishga, namoyon etishiga toʻla sharoit yaratilgan. Keyingi yillarda zarur mutaxassislar ishga qabul qilingani tufayli teatr va anʼanaviy baxshichilik, amaliy sanʼat yoʻnalishlari ham tashkil etildi.

Muassasada har bir oʻquv yili belgilangan qoidalar asosida tashkil etiladi va oʻquvchilarning musiqa va sanʼatni qay darajada oʻzlashtirayotganliklari sinflar, boʻlimlar, maktab hisobot kontsertlarida, koʻrik-tanlovlarda va sinfdan sinfga koʻchirish imtihonlarida aniqlanadi. Shuningdek, tumanimizda turli muhim sanalar, umumxalq bayramlari, sayllarida ham maktabning iqtidorli oʻquvchilarining chiqishlari xalqimiz tomonidan qizgʻin qarshi olinmoqda.

Musiqa va sanʼat maktab anʼanaviy xonanda va ijro, fortepiano boʻlimlarining anʼanaviy hisobot kontserti ham muassasa oʻquvchilari uchungina emas, oʻqituvchilari uchun ham jiddiy sinov boʻldi, deyish mumkin.

Bunda maktab oʻquv yili rejasiga muvofiq barcha tadbirlar oʻz vaqtida ado etilishiga erishilgani, ustoz-shogird anʼanasiga muvofiq yosh oʻqituvchilarga ulkan tajribaga ega oʻqituvchilarning ustozlik qilib, sifatli taʼlim berilishiga erishilgani yaqqol namoyon boʻldi.

Boʻlimlar hisobot kontsertiga maktab oʻquvchilari, ularning ota-onalari, oʻqituvchilar, soha faxriylari ishtirok etishib, boʻlimlar oʻquvchilari tayyorlagan hisobot kontsertini miriqib tomosha qildilar, oʻquvchilarning musiqa va sanʼat sohasidagi iqtidori, salohiyatini koʻrib quvondilar. Ularni shu darajada tarbiyalayotgan ustozlaridan minnatdor boʻldilar.

Shunisi eʼtiborliki, mazkur muassasada oʻquvchilarning ijodiy qobiliyatini yuksaltirish, kasb-hunarga yoʻnaltirish borasida erishilayotgan natijalar tufayli yil sayin oʻquvchilar qamrovi oshmoqda. 2022-2023 oʻquv yilida birinchi sinfga 94 nafar oʻquvchi, shularning 25 nafari musiqa, 72 nafari sanʼat yoʻnalishiga qabul qilindi.

Muassasada ayni kunda oʻquvchilarning oʻquv yili hisobot kontsertiga qizgʻin hozirlik koʻrilayapti.

Oygul RAJABOVA.