SANSALORLIKKA ChEK QOʻYILDI

2014-yilning 31 dekabrida Oʻzbekiston Respublikasi Prezidentining 2014-yil 7-apreldagi "Oʻzbekiston Respublikasida investitsiya iqlimi va ishbilarmonlik muhitini yanada takomillashtirishga doir qoʻshimcha chora-tadbirlar toʻgʻrisida”gi PF – 4609-sonli farmoniga muvofiq, shuningdek, tadbirkorlik subʼektlariga davlat xizmatlari koʻrsatish  tartibini yanada takomillashtirish va soddalashtirish maqsadida  Oʻzbekiston Respublikasi Vazirlar Mahkamasining "Tadbirkorlik subʼektlariga davlat xizmatlari koʻrsatish tartibini yanada takomillashtirish choratadbirlari toʻgʻrisida”gi 377-sonli qarori qabul qilindi.

Ushbu qarorda 2015-yilning 1-yanvaridan boshlab davlat xizmatlari koʻrsatishda davlat organlari va boshqa organlar tomonidan tadbirkorlik subʼektlaridan davlat boshqa organlarida va oʻzga tashkilotlarda mavjud boʻlgan hujjatlarni va axborotlarni, shu jumladan soliq qarzdorligi yoki kommunal toʻlovlar boʻyicha qarzlarning mavjud emasligi toʻgʻrisidagi maʼlumotnomalarning, tadbirkorlik subʼekti taʼsis hujjatlarining, litsenziyalar va ruxsat beruvchi tusdagi hujjatlar nusxalarining talab qilinishi taqiqlanganligi koʻrsatilgan.

Shuningdek, mazkur qarorda 2015-yilning 1-yanvaridan boshlab:

 tadbirkorlik subʼektlarining davlat xizmatlari koʻrsatish yuzasidan murojaatlari mavjud boʻlganda ushbu davlat xizmatlarini koʻrsatishda davlat xizmatlari koʻrsatuvchi davlat organlari va boshqa organlar davlat boshqa organlarida va tashkilotlarda mavjud boʻlgan zarur hujjatlarni va axborotlarni oʻzaro axborot hamkorligi yoʻli bilan, shu jumladan elektron tarzda mustaqil ravishda olishlari;

tadbirkorlik subʼektlariga davlat xizmatlari koʻrsatish uchun zarur boʻlgan hujjatlar va axborotlar mavjud boʻlgan davlat organlari va boshqa tashkilotlar ushbu hujjatlar va axborotlarni (arxiv maʼlumotlari bundan mustasno) davlat xizmatlari koʻrsatuvchi davlat organlari va boshqa organlardan tegishli idoralararo soʻrov olingan vaqtdan boshlab bir ish kuni mobaynida taqdim etishlari shartligi;

davlat xizmatlari koʻrsatish uchun zarur boʻlgan hujjatlar va axborotlarning ushbu hujjatlar va axborotlar mavjud boʻlgan davlat organlari va boshqa tashkilotlar tomonidan idoralararo soʻrov boʻyicha taqdim etilmasligi yoki oʻz vaqtida taqdim etilmasligi tadbirkorlik subʼektiga davlat xizmati koʻrsatishni rad etish uchun asos hisoblanmasligi;

davlat xizmatlari koʻrsatish uchun zarur boʻlgan hujjatlar va axborotlarning taqdim etilmaganligi yoki oʻz vaqtida taqdim etilmaganligi, shuningdek ularning tadbirkorlik subʼektlariga davlat xizmatlari koʻrsatuvchi davlat organi yoki  boshqa tashkilot tomonidan olinmaganligi uchun aybdor boʻlgan tegishli mansabdor shaxslarning javob berishlari belgilab qoʻyildi.

Yaratilgan bunday imkoniyatlar albatta tadbirkorlarning ishini yanada osonlashtirib, soha rivojiga katta taʼsir koʻrsatadi.