“Obod turmush yili“ Davlat dasturi

obodlik va farovonlikka xizmat qiladi

2013 yil 14-fevralda Oʻzbekiston Respublikasi Prezidentining "Obod turmush yili” Davlat dasturi toʻgʻrisida”gi PQ-1920-sonli qarori qabul qilindi. Mazkur qaror bilan "Obod turmush yili” Davlat dasturi tasdiqlandi.

2013 yilning «Obod turmush yili» deb eʼlon qilinganligi munosabati bilan mamlakatimizda xalqning turmush darajasi va sifatini oshirish, farovonlik, tinchlik va totuvlikni taʼminlash vazifalarini amalga oshirishga resurslar va imkoniyatlarni safarbar qilish, davlat, nodavlat va jamoat tashkilotlarini keng jalb etish boʻyicha aniq maqsadga yoʻnaltirilgan chora-tadbirlar kompleksini amalga oshirish maqsadida qabul qilingan ushbu davlat dasturi 8 boʻlim va 86 banddan iborat.

Dasturda Yangi tahrirdagi «Fuqarolarning oʻzini oʻzi boshqarish organlari toʻgʻrisida»gi, «Fuqarolar yigʻini raisi (oqsoqoli) va uning maslahatchilari saylovlari toʻgʻrisida»gi Qonunlarini qabul qilish, «Yuridik va jismoniy shaxslarning murojaatlari toʻgʻrisida»gi, «Jamoatchilik nazorati toʻgʻrisida»gi, «Ijtimoiy sherikchilik toʻgʻrisida»gi, «Ekologik nazorat toʻgʻrisida»gi Oʻzbekiston Respublikasi Qonunlari loyihasini tayyorlash va qator qonun hujjatlariga oʻzgartish va qoʻshimchalar kiritish koʻzda tutilgan.

Dasturning «Aholi farovonligi va real daromadlarining izchil oʻsishini taʼminlash, ish bilan bandlikni oshirish, kichik biznes va xususiy tadbirkorlikni, fermerlikni yanada rivojlantirish, aholini, birinchi navbatda, uning ijtimoiy nochor qatlamlarini va kam taʼminlangan oilalarni davlat tomonidan aniq manzilli muhofaza qilish va ularga ijtimoiy yordam koʻrsatish tizimini takomillashtirish» deb nomlangan 2-bobida byudjet tashkilotlari xodimlari ish haqi, pensiya va nafaqalar, stipendiyalar miqdorini oʻrtacha kamida 23 foizga koʻpaytirish, Davlat byudjeti xarajatlarining kamida 60% ini ijtimoiy ehtiyojlarga yoʻnaltirgan holda aholini ijtimoiy qoʻllab-quvvatlash, yil davomida 972,7 mingta ish oʻrinlari yaratish yoʻli bilan aholi bandligini taʼminlash va boshqa muhim masalalar belgilangan.

Sogʻlom odamgina obod turmush barpo qiladi. Shu maqsadda Dasturda aholi salomatligini saqlash tizimini takomillashtirish, sogʻliqni saqlash muassasalarining moddiy-texnika bazasini mustahkamlash va rivojlantirish, ularni zamonaviy tashxis va davolash asbob-uskunalari bilan jihozlash, kasalliklar profilaktikasini kengaytirish hamda ularni davolashning ilgʻor tibbiy texnologiyalari va metodlarini joriy etish, pirovard natijada — odamlarning, ayniqsa bolalar va onalarning sogʻligini mustahkamlash masalalariga katta eʼtibor berilgan.

Davlat dasturidan shuningdek mahalla institutini va fuqarolarning oʻzini oʻzi boshqarish organlari faoliyatini yanada takomillashtirish, ularning huquqlari va vakolatlarini kengaytirish, oilalarni yanada mustahkamlash, ayollarning oila va jamiyatdagi maqomini oshirish, ularning oʻz iqtidorini namoyon qilishi va uy-roʻzgʻordagi ishlarini yengillashtirish uchun qulay ijtimoiy-maishiy sharoitlar yaratish chora-tadbirlarini amalga oshirish va «Obod turmush yili» Dasturining maqsad va vazifalari toʻgʻrisida keng axborot-tushuntirish ishlarini tashkil etish borasidagi muhim chora-tadbirlarni amalga oshirish koʻzda tutilgan.

Xalq deputatlari tuman Kengashining deputatlariga ham oʻz saylov okruglarida «Obod turmush yili» davlat dasturining mazmun-mohiyatini aholiga yetkazish va uning ijrosiga koʻmaklashish boʻyicha vazifalar berilgan.

Biz, xalq deputatlari tuman Kengashining mahalliy byudjetni shakllantirish va uni ijro etish, iqtisodiy islohotlarni amalga oshirish hamda tadbirkorlikni rivojlantirish masalalari doimiy komissiyasi aʼzolari mazkur Davlat dasturi doirasida qabul qilingan tuman dasturining ijrosiga ham oʻz hissamizni qoʻshamiz.

Madamin KAZAKOV,

xalq deputatlari tuman Kengashining mahalliy byudjetni shakllantirish va uni ijro etish, iqtisodiy islohotlarni amalga oshirish hamda tadbirkorlikni rivojlantirish masalalari doimiy komissiyasi raisi.