Rajapbay Yoʻldashev hayoti va faoliyatiga bagʻishlangan “El farzandi” nomli hujjatli film taqdimoti boʻlib oʻtdi

2022-yil 16-avgust kuni Amudaryo tumani Madaniyat boʻlimi binosida Oʻzbekiston kinematografiya agentligi buyurtmasi asosida “Dilshoh media” kinostudiyasi tomonidan suratga olingan Amudaryo tumanining sobiq hokimi, davlat va jamoat arbobi, xalqimizning suyukli farzandi marhum Rajapbay Yoʻldashev haqidagi “El farzandi” nomli hujjatli film taqdimoti boʻlib oʻtdi.

“Yangi Oʻzbekiston – maʼrifatli jamiyat” shiori ostida oʻtkazilayotgan “Maʼnaviyat festivali” doirasida tashkil qilingan ushbu tadbir avvalida Rajapbay Yoʻldashevning hayoti va mehnat faoliyatiga doir fotosuratlar koʻrgazmasi namoyish etildi.

Taqdimotda Oʻzbekiston kinematografiya agentligi, “Dilshoh media” kinostudiyasi xodimlari, Toshkent shahridan tashrif buyurgan kino hamda teatr aktyor va aktrisalari, sanʼat ustalari, film qahramonining oila aʼzolari, doʻstlari, tuman ziyolilari, keng jamoatchilik vakillari hamda ommaviy axborot vositalari vakillari ishtirok etdi.

Filmda Rajapboy Yoʻldashevning doʻstlari va yaqinlari, hamkasblari, Qoraqalpogʻiston Respublikasi miqyosida birgalikda mehnat faoliyatini olib borgan davlat va jamoat arboblari film qahramonining shaxsiy hayoti, ish faoliyati, insoniylik jihatlari haqida fikrlarini bayon qilishgan.

Shuningdek, filmda Rajabboy Yoʻldoshev mehnat faoliyatidagi eng mashaqqatli va masʼuliyatli pallalar kinoijodkorlar tomonidan mohirona sahnalashtirilgan.

Taqdimot marosimida dastlab film ijodkorlari, amudaryolik ziyolilar, film qahramonining oila aʼzolari soʻzga chiqib, Rajapbay Yoʻldashevning el-yurt obodligi va xalq farovonligi yoʻlida qilgan xizmatlarini yodga olishdi.

Film qahramoni Rajapboy Yoʻldashev 1998-yilda Amudaryo tumani hokimi lavozimiga tayinlangandan soʻng tuman hayotida katta ijobiy oʻzgarishlar qildi. U rahbarlik qilgan yillarda aholining bandlik darajasi oshdi. 1998-2016-yillarda 58 mingdan ortiq yangi ish oʻrinlari yaratildi. Uning tashabbusi bilan 2005-yilda Amudaryo daryosi ostidan 700 metr uzunlikdagi tabiiy gaz tarmogʻi tortilib, tuman kafolatli ravishda tabiiy gaz bilan taʼminlandi.

Rajapboy Yoʻldashev qishloq xoʻjaligida iqtisodiy islohotlarni chuqurlashtirish, shirkat xoʻjaliklarini fermer xoʻjaliklariga aylantirish, haqiqiy mulk egaligini qaror toptirish borasida keng qamrovli tadbirlarni amalga oshirdi.

1998-yilgacha tumanda birorta ham mahsulot xorijga eksport qilinmagan boʻlsa, 2016-yilga kelib 10 dan ortiq eksportyor korxonalar tomonidan 15 turdagi mahsulotlar eksporti yoʻlga qoʻyildi.

Shundan keyin kino va teatr aktyorlari hamda aktrisalar soʻzga chiqib, “Yangi Oʻzbekiston – maʼrifatli jamiyat” shiori ostida “Maʼnaviyat festivali”ni oʻtkazishdan koʻzlangan maqsad, yangi Oʻzbekistonda inson qadrini ulugʻlash yoʻlida amalga oshirilayotgan ishlar xususida toʻxtalib oʻtdilar. Sanʼatkorlar taʼkidlaganlaridek, Vatan va xalq manfaati yoʻlida xizmat qilgan insonlarning xotirasi abadiydir.

Elimizning ana shunday fidoyi farzandlaridan biri Rajapboy Yoʻldashevning buyuk xizmatlari ham eʼtirof etilib, 1999-yilda “Shuhrat” medali, 2003-yilda Qoraqalpogʻiston Respublikasida xizmat koʻrsatgan iqtisodchi faxriy unvoni, 2014-yilda “Mehnat shuhrati” ordeni bilan mukofotlangan.

Rajapboy Yoʻldashevning xotirasiga hurmat bajo keltirish maqsadida uning hayot yoʻli va faoliyati haqida hujjatli film ishlash loyihasi oʻtgan yillarda Oʻzbekiston kinematografiya agentligining ish rejasiga kiritildi va moliyalashtirildi.

Mazkur film taqdimotida Rajapboy Yoʻldashevning farzandi, tumanimiz hokimi Sultonboy Yoʻldoshev ham soʻzga chiqib, davlatimiz rahbari va hukumatimizga, film ijodkorlariga minnatdorchilik bildirdi.

Chindan ham, Rajapboy Yoʻldashev ishning koʻzini biladigan tashkilotchi rahbar, xalq tashvishini oʻz dardi deb biladigan haqiqiy elparvar yoʻlboshchi edi.

U Amudaryo tumani hokimi lavozimida faoliyat yuritgan yillarda tuman fermer xoʻjaliklari va qishloq xoʻjaligi korxonalari balansiga lizing va kredit asosida mingdan ortiq turli rusumdagi texnikalar xarid qilinib, yerdan yuqori hosil olishga zamin yaratildi. Natijada tuman 2008-yildan beri deyarli har yili davlatga paxta, gʻalla sotish boʻyicha shartnomaviy rejalarini Oʻzbekiston Respublikasida birinchilar qatori bajarib kelmoqda.

Rajapbay Yoʻldashev oʻzining tashkilotchiligi, rahbarlik mahorati, qatʼiyati va talabchanligi, odamlar bilan muomalasi, teran aql-idroki bilan tumanda barcha sohalarda yuksak natijalar qoʻlga kiritilishida bosh-qosh boʻldi. Natijada tuman ijtimoiy-iqtisodiy, maʼnaviy-maʼrifiy va boshqa sohalarda nafaqat Qoraqalpogʻiston Respublikasi, balki mamlakatimizning boshqa tumanlari orasida ham oʻz oʻrniga ega boʻldi.

Rajapbay Yoʻldashev xalqqa, el-yurtga xizmat qilishni oʻzining farzandlik burchi, oʻzi uchun eng oliy saodat deb bildi va umrining oxiriga qadar Vatan, el-yurt manfaati yoʻlida fidoyi mehnat qildi.

Rejissyor Dilmurod Masaidov, prodyuser Mahmud Erkaboyev, operator Jahongir Ibragimov, montaj ustasi Timur Piyozov, rassom Xusaynboy Eshniyozov, direktor Azizbek Ozodboyevlar ishtirokidagi ijodiy va texnik jamoa filmda Rajabboy Yoʻldoshevning hayot yoʻli va mehnat faoliyatini, Vatan, el-yurt oldidagi samarali xizmatlarini yorqin epizodlar orqali ochib berishga harakat qilishgan.

Film taqdimotida qatnashgan har bir ishtirokchi Rajabboy Yoʻldoshevning porloq xotirasini yana bir bora koʻz oldida jonlantirib, ulugʻvor ishlarini yodga oldilar.

Tuman hokimligining axborot xizmati.

"Taraqqiyot koʻzgusi" gazetasi tahririyati.