PREZIDENT QARORI IJROSINI TAʼMINLAShGA BAGʻIShLANGAN YIGʻILISh BOʻLIB OʻTDI

18-dekabr kuni Amudaryo tuman hokimligining majlislar zalida Oʻzbekiston Respublikasi Prezidentining 2020-yil 11-noyabrdagi “2020-2023-yillarda Qoraqalpogʻiston Respublikasini kompleks ijtimoiy-iqtisodiy rivojlantirish chora-tadbirlari toʻgʻrisida”gi Qarori ijrosini taʼminlashga bagʻishlangan yigʻilish boʻlib oʻtdi.

Yigʻilishda Oʻzbekiston Respublikasi Qonunchilik palatasi spikeri oʻrinbosari, Oʻzbekiston Respublikasi Fermer, dehqon xoʻjaliklari va tomorqa yer egalari Kengashi raisi Aktam Hayitov, tuman hokimi Sultonboy Yoʻldashev, tuman hokimi oʻrinbosarlari, tegishli muassas, korxona va tashkilotlar masʼullari, loyiha tashabbuskorlari va ommaviy axborot vositalari vakillari ishtirok etdilar.

Yigʻilish kun tartibidagi masala yuzasidan Amudaryo tumani hokimi Sultonboy Yoʻldashev soʻzga chiqib, Amudaryo tumanida hududiy investitsiya dasturiga muvofiq 77 ta loyiha amalga oshirilishi va 2 616 ta yangi ish oʻrinlari yaratilishi boʻyicha olib borilayotgan ishlar boʻyicha maʼlumotlar maʼlumotlar berib, kelajakdagi rejalar boʻyicha atroflicha toʻxtalib oʻtdi.

Shundan soʻng, tuman hokimi oʻrinbosari, investitsiyalar va tashqi savdo boʻlimi boshligʻi Rashid Salayev tumandagi investitsiya dasturiga kiritilgan 77 ta loyihadan bugungi kunga kelib, 38 mlrd. 695 mln. soʻmlik 33 ta loyihalarning bank kreditlari oʻzlashtirilib, toʻliq ishga tushirilganligi va ular tomonidan 205 ta yangi ish oʻrinlari yaratilganligi xususida gapirib oʻtdi.

Shundan soʻng, Oʻzbekiston Respublikasi Qonunchilik palatasi spikeri oʻrinbosari, Oʻzbekiston Respublikasi Fermer, dehqon xoʻjaliklari va tomorqa yer egalari Kengashi raisi Aktam Hayitov investitsiya loyihalarini amalga oshirishda yuzaga kelayotgan muammolar toʻgʻrisida mazkur loyihalar tashabbuskorlari bilan suxbatlashdi.

Jumladan,“Mangit Matbaasi” xususiy korxonasi tomonidan 772 mln. soʻm, shundan 70 ming dollarlik xorijiy kredit liniyasi mablagʻi hisobiga bosmaxona tashkil qilish loyihasini amalga oshirish uchun bank tomonidan 49 ming dollari ajratilganligi, qolgan 21 ming dollar mablagʻ ajratilishi kechikayotganligi, “Amudaryo tomorqa xizmati” MChJ tomonidan tomorqa xizmati klasteri loyihasini amalga oshirishga 5 mlrd. 27 mln. soʻmdan 2 mlrd. 500 mln. soʻmi ajratilganligi va qolgan 2 mlrd. 527 mln. soʻm qismi ajratilishi muammo boʻlayotganligi, shuningdek, qishloq xoʻjaligi loyihalarini amalga oshirish uchun zarur deb topilgan 26,6 ga yer maydonlarini ajratish masalasida tashabbuskorlar bilan birma-bir gaplashib, mazkur muammolarni hal etish choralari xususida toʻxtaldi.

Loyihalarga zarur boʻlgan tijorat bank kreditlarining oʻz vaqtida ajratilishi boʻyicha mavjud muammolar oʻrganilib, kredit mablagʻlarini qisqa muddatlarda ajratilishini taʼminlash boʻyicha zarur topshiriq va koʻrsatmalar berildi.

Amudaryo tuman Investitsiyalar va tashqi savdo boʻlimi, tuman Iqtisodiy taraqqiyot va kambagʻallikni qisqartirish boʻlimi va loyiha tashabbuskorlari bilan birgalikda investitsiya loyihalarini amalga oshirish dasturiga kiritilgan barcha maqsadli dasturlardagi loyihalarni moliyalashtirish va ularni oʻz vaqtida ishga tushirishda yuzaga kelayotgan muammolarni bartaraf etish, rejada belgilangan muddatlarda loyihalarning toʻliq va soʻzsiz amalga oshirilishini taʼminlash topshirildi.

Shuningdek, tijorat banklarining tuman filiali rahbarlariga mavjud loyihalarga ajratilgan kreditlar maqsadli ishlatilishiga eʼtibor qaratish va ajratilmagan kredit mablagʻlarini qisqa muddatlarda ajratish choralarini koʻrish yuzasidan tavsiyalar berildi.

Yigʻilishda tumanda amalga oshirilishi rejalashtirilayotgan qishloq xoʻjaligi loyihalariga yer maydonlari ajratish, Soliq inspektsiyasi, Statistika boʻlimi hamda Aholi bandligiga koʻmaklashish markazi rahbarlari zimmasiga ushbu loyihalar ishga tushirilgach, koʻrsatiladigan xizmatlar hajmini, yaratilgan ish oʻrinlarining hisobotlarda toʻliq aks ettirilishini nazorat qilib borish vazifalari yuklatildi.

Robiya YOʻLDOShEVA.