TUMANDA YILLIK REJANI ADO ETGAN FERMER XOʻJALIKLARI SONI ORTMOQDA

Amudaryolik paxtakorlar kuzning quyoshli kunlarini gʻanimat bilib, dalalarda oppoq boʻlib, ochilib turgan hosilni tezroq yigʻib-terib olish maqsadida tinimsiz mehnat qilmoqdalar. Vaqtincha ishsiz aholi ham ixtiyoriylik asosida ijarachilarga terimda koʻmakka chiqishib, yaxshigina daromad olishmoqda.

Oʻzbekiston Respublikasi Vazirlar Mahkamasining “2020-yil paxta hosilini yigʻib-terib olish ishlarini uyushqoqlik bilan tashkil etish chora-tadbirlari toʻgʻrisida” qabul qilingan qaroriga muvofiq, birinchi terimda qoʻlda terilgan bir kilogramm paxta uchun 1000 soʻmdan, ikkinchi terimda 1400 soʻmdan haq toʻlanayotgani terimchilarning moddiy manfaatdorligi yuqori boʻlishini taʼminlamoqda. Natijada yillik rejasini ado etgan, marraga tobora yaqinlashayotgan xoʻjaliklar soni tobora ortmoqda.

Bobur ovulida faoliyat yuritayotgan 23 ta fermer xoʻjaliklarining jami 823 gektar dalasiga paxta ekilgan.

Shu kunlarda ushbu dalalarda hosil yigʻim-terimi tobora qizgʻin tus olayotir. “Mahbuba-Malohat” fermer xoʻjaligida 17 nafar ijarachilar 23 gektar maydonda paxtadan bqori hosil yetishtirdilar. 50 nafardan ziyod terimchilar kuniga 80-100 kilodan paxta terib, xoʻjalik xirmonini tobora yuksaltirmoqda.

Xoʻjalikda paxtadan tashqari, 1 gektar 30 sotixlik bogʻ, 1 gektar 20 sotixlik baliqchilik koʻli ham bor. Xoʻjalik aʼzolarining gʻayrat-shijoatlari tufayli shu kungacha yillik 59 tonnalik marra ortigʻi bilan ado etildi.

Shu ovuldagi “Bozorboyev Zafarbek” fermer xoʻjaligi paxtakorlari sentyabr oyining 23 sanasida yillik shartnomaviy rejalarini ortigʻi bilan ado etdilar. Xoʻjalikda 23 gektar maydonga ekilgan paxtadan shu kungacha 59 tonnadan ziyod hosil  yigʻishtirib olindi.

Tumanimizning Oq oltin ovulida 15 ta fermer xoʻjaliklarining 841 gektar maydoniga erta bahorda “Sulton” navli paxta ekilgan edi. Koʻklamning seryogʻin, salqin kelishiga qaramay, ushbu maydonlarda moʻl hosil yetishtirishga muvaffaq boʻlindi. “Yakubova Gavhar” fermer xoʻjaligining 90 nafar pudratchisiga biriktirilgan 84 gektar paxta maydonida ham ayni kunlarda yigʻim-terim avjiga chiqayapti.

Xoʻjalikda terimchilarga unumli ishlari uchun dala boshida tushlikka issiq ovqat, qaynatilgan suv, choy tashkil etilgan. Terim pullari oʻz vaqtida hisob-kitob qilinayapti. Bu kunlik ish surʼati yuqori boʻlishiga zamin hozirlayotir.

Hududdagi “Ismoil ota” fermer xoʻjaligida esa 33 gektar paxta maydoni bor. Dalalarga erta bahorda ezgu niyatlar bilan chigit ekib, moʻl hosil yetishtirishga erishgan xoʻjalik aʼzolari yigʻim-terimga oʻzgacha shijoat bilan kirishib ketishdi. Natijada xoʻjalik paxta xirmoni tobora yuksalmoqda.

Dalalarda hosil moʻl. Terimchilar ham dalalardagi moʻl paxtani yogʻingarchilik kunlarga qoldirmasdan yigʻib olish maqsadida jadal surʼatlarda terimni davom ettirishmoqda.

O.RAJABOVA.