ТУМАНДА ЙИЛЛИК РЕЖАНИ АДО ЭТГАН ФЕРМЕР ХЎЖАЛИКЛАРИ СОНИ ОРТМОҚДА

Амударёлик пахтакорлар кузнинг қуёшли кунларини ғанимат билиб, далаларда оппоқ бўлиб, очилиб турган ҳосилни тезроқ йиғиб-териб олиш мақсадида тинимсиз меҳнат қилмоқдалар. Вақтинча ишсиз аҳоли ҳам ихтиёрийлик асосида ижарачиларга теримда кўмакка чиқишиб, яхшигина даромад олишмоқда.

Ўзбекистон Республикаси Вазирлар Маҳкамасининг “2020 йил пахта ҳосилини йиғиб-териб олиш ишларини уюшқоқлик билан ташкил этиш чора-тадбирлари тўғрисида” қабул қилинган қарорига мувофиқ, биринчи теримда қўлда терилган бир килограмм пахта учун 1000 сўмдан, иккинчи теримда 1400 сўмдан ҳақ тўланаётгани теримчиларнинг моддий манфаатдорлиги юқори бўлишини таъминламоқда. Натижада йиллик режасини адо этган, маррага тобора яқинлашаётган хўжаликлар сони тобора ортмоқда.

Бобур овулида фаолият юритаётган 23 та фермер хўжаликларининг жами 823 гектар даласига пахта экилган.

Шу кунларда ушбу далаларда ҳосил йиғим-терими тобора қизғин тус олаётир. “Маҳбуба-Малоҳат” фермер хўжалигида 17 нафар ижарачилар 23 гектар майдонда пахтадан бқори ҳосил етиштирдилар. 50 нафардан зиёд теримчилар кунига 80-100 килодан пахта териб, хўжалик хирмонини тобора юксалтирмоқда.

Хўжаликда пахтадан ташқари, 1 гектар 30 сотихлик боғ, 1 гектар 20 сотихлик балиқчилик кўли ҳам бор. Хўжалик аъзоларининг ғайрат-шижоатлари туфайли шу кунгача йиллик 59 тонналик марра ортиғи билан адо этилди.

Шу овулдаги “Бозорбоев Зафарбек” фермер хўжалиги пахтакорлари сентябрь ойининг 23 санасида йиллик шартномавий режаларини ортиғи билан адо этдилар. Хўжаликда 23 гектар майдонга экилган пахтадан шу кунгача 59 тоннадан зиёд ҳосил  йиғиштириб олинди.

Туманимизнинг Оқ олтин овулида 15 та фермер хўжаликларининг 841 гектар майдонига эрта баҳорда “Султон” навли пахта экилган эди. Кўкламнинг серёғин, салқин келишига қарамай, ушбу майдонларда мўл ҳосил етиштиришга муваффақ бўлинди. “Якубова Гавҳар” фермер хўжалигининг 90 нафар пудратчисига бириктирилган 84 гектар пахта майдонида ҳам айни кунларда йиғим-терим авжига чиқаяпти.

Хўжаликда теримчиларга унумли ишлари учун дала бошида тушликка иссиқ овқат, қайнатилган сув, чой ташкил этилган. Терим пуллари ўз вақтида ҳисоб-китоб қилинаяпти. Бу кунлик иш суръати юқори бўлишига замин ҳозирлаётир.

Ҳудуддаги “Исмоил ота” фермер хўжалигида эса 33 гектар пахта майдони бор. Далаларга эрта баҳорда эзгу ниятлар билан чигит экиб, мўл ҳосил етиштиришга эришган хўжалик аъзолари йиғим-теримга ўзгача шижоат билан киришиб кетишди. Натижада хўжалик пахта хирмони тобора юксалмоқда.

Далаларда ҳосил мўл. Теримчилар ҳам далалардаги мўл пахтани ёғингарчилик кунларга қолдирмасдан йиғиб олиш мақсадида жадал суръатларда теримни давом эттиришмоқда.

О.РАЖАБОВА.