IJTIMOIY KOʻMAK XOTIN-QIZLAR HAYoTINI YaXShILAShGA XIZMAT QILMOQDA

28-avgust sanasida tumanimizdagi ijtimoiy himoyaga muhtoj, ogʻir sharoitga tushib qolgan, ehtiyojmand xotin-qizlarni har tomonlama qoʻllab-quvvatlash yuzasidan xayrli tadbir boʻlib oʻtdi. Mazkur tadbirda Qoraqalpogʻiston Respublikasi kasaba uyushmalari tashkilotlari birlashmasi Kengashining tashkiliy ishlar boʻlimi mudirasi Gulnora Ilmuradova hamda tuman hokimi oʻrinbosari, Mahalla va oilani qoʻllab-quvvatlash boʻlimi boshligʻi Alisher Yoʻldoshevlar ishtirok etdilar.

Shu kuni tumandagi 15 nafar xotin-qizga davlat tomonidan ajratilgan 22 mln. 500 ming soʻm qiymatidagi 15 dona tikuv mashinasi, 20 ta oilaga  13 mln.  soʻm qiymatidagi elektroduxovka, 10 nafar ogʻir sharoitdagi oilada yashayotgan, daromad manbai boʻlmagan, tibbiy yordamga muhtoj  xotin-qizlarning  har biriga  1 mln. soʻmdan jami 10 mln. soʻmlik moddiy yordam topshirildi.

Shu oʻrinda taʼkidlash kerakki, bugungi kunda xotin-qizlar bandligini taʼminlash borasida samarali ishlar amalga oshirilmoqda. Xususan, joriy yilda 807 nafar xotin-qizlarni ish bilan taʼminlash  choralarini koʻrish belgilangan boʻlib, shundan 591 nafar xotin-qizlar tuman yoʻl-qurilish va obodonlashtirish boshqarmalarida yaratilgan haq toʻlanadigan jamoat ishlariga jalb etilgan, 108 nafari esa qurib berilgan issiqxonadan daromad koʻrmoqda, 3 nafar nogiron farzandi bor oilalarga tikuv mashinasi berilgan.

Qolaversa, chet eldan qaytib kelgan xotin-qizlarning 54 nafariga tuman Bandlikka koʻmaklashish markazi tomonidan issiqxonalar qurib berilib, ularning bandligi taʼminlandi. Ogʻir ijtimoiy sharoitda yashovchi ish bilan band boʻlmagan 32 nafar xotin-qizdan 5 nafari jamoat ishiga jalb qilindi, 25 nafari doimiy ish oʻrinlariga joylashtirildi hamda bir nafariga Bandlikka koʻmaklashish markazi tomonidan 2,5 mln. soʻmlik issiqxona qurib berildi.

Tumanimiz boʻylab davom etayotgan ushbu xayrli ishlar xotin-qizlarning turmush farovonligini oshirishga xizmat qilishi shubhasizdir.

Ulugʻbek Abdurahmonov, Taʼlim, fan va madaniyat xodimlari kasaba uyushmasi Amudaryo tuman Kengashi raisi.