ИЖТИМОИЙ КЎМАК ХОТИН-ҚИЗЛАР ҲАЁТИНИ ЯХШИЛАШГА ХИЗМАТ ҚИЛМОҚДА

28 август санасида туманимиздаги ижтимоий ҳимояга муҳтож, оғир шароитга тушиб қолган, эҳтиёжманд хотин-қизларни ҳар томонлама қўллаб-қувватлаш юзасидан хайрли тадбир бўлиб ўтди. Мазкур тадбирда Қорақалпоғистон Республикаси касаба уюшмалари ташкилотлари бирлашмаси Кенгашининг ташкилий ишлар бўлими мудираси Гулнора Илмурадова ҳамда туман ҳокими ўринбосари, Маҳалла ва оилани қўллаб-қувватлаш бўлими бошлиғи Aлишер Йўлдошевлар иштирок этдилар.

Шу куни тумандаги 15 нафар хотин-қизга давлат томонидан ажратилган 22 млн. 500 минг сўм қийматидаги 15 дона тикув машинаси, 20 та оилага  13 млн.  сўм қийматидаги электродуховка, 10 нафар оғир шароитдаги оилада яшаётган, даромад манбаи бўлмаган, тиббий ёрдамга муҳтож  хотин-қизларнинг  ҳар бирига  1 млн. сўмдан жами 10 млн. сўмлик моддий ёрдам топширилди.

Шу ўринда таъкидлаш керакки, бугунги кунда хотин-қизлар бандлигини таъминлаш борасида самарали ишлар амалга оширилмоқда. Хусусан, жорий йилда 807 нафар хотин-қизларни иш билан таъминлаш  чораларини кўриш белгиланган бўлиб, шундан 591 нафар хотин-қизлар туман йўл-қурилиш ва ободонлаштириш бошқармаларида яратилган ҳақ тўланадиган жамоат ишларига жалб этилган, 108 нафари эса қуриб берилган иссиқхонадан даромад кўрмоқда, 3 нафар ногирон фарзанди бор оилаларга тикув машинаси берилган.

Қолаверса, чет элдан қайтиб келган хотин-қизларнинг 54 нафарига туман Бандликка кўмаклашиш маркази томонидан иссиқхоналар қуриб берилиб, уларнинг бандлиги таъминланди. Оғир ижтимоий шароитда яшовчи иш билан банд бўлмаган 32 нафар хотин-қиздан 5 нафари жамоат ишига жалб қилинди, 25 нафари доимий иш ўринларига жойлаштирилди ҳамда бир нафарига Бандликка кўмаклашиш маркази томонидан 2,5 млн. сўмлик иссиқхона қуриб берилди.

Туманимиз бўйлаб давом этаётган ушбу хайрли ишлар хотин-қизларнинг турмуш фаровонлигини оширишга хизмат қилиши шубҳасиздир.

Улуғбек Aбдураҳмонов, Таълим, фан ва маданият ходимлари касаба уюшмаси Aмударё туман Кенгаши раиси.