DOʻRMANLIK YoSh PILLAKORLAR REJANI ORTIGʻI BILAN UDDALAShDI

Bu yilgi pilla mavsumiga doʻrmanliklar ham puxta tayyorgarlik koʻrishdi. Aprel-may oyi davomida mavjud tutzor plantatsiyalari alohida eʼtibor bilan koʻzdan kechirilib, ipak qurti boqiladigan joylar ertadan shay qilib qoʻyildi. Ish jarayonida zarur boʻluvchi jihozlar ham taxt qilindi.
Ovulning ishsiz yoshlari roʻyxati shakllantirilib, 10 nafar yosh yigit-qizlar bilan shartnoma tuzildi. Pilla boqish uchun maʼqul koʻringan ovul hududidagi boʻsh turgan binolardan biri havaskor pillakorlar uchun kasb maktabi vazifasini bajardi. Ular ipak qurtini parvarishlash, pilla yetishtirish sirlari bilan ilk bor shu yerda tanishishdi. Qizgʻin mehnat maydonidagi pillakorlar “Oʻrozboyev Ulugʻbek” fermer xoʻjaligi tomonidan bir mahal issiq ovqat bilan taʼminlandi.
Bu yilgi mavsum ob-havo injiqliklari sabab biroz kech boshlandi. Ammo puxta oʻylangan tadbirlar asosida 560 kg. davlat buyurtmasi ortigʻi bilan bajarilib, 730 kg. mahsulot topshirildi. Bizning bu natijalarimizga yoshlarimizning mehnatkashligi bilan birga, imom-xatiblarimizning, hoji ota-onaxonlarimizning duo-fotihalari kamarbasta boʻldi, albatta. Yana shuni taʼkidlashimiz zarurki, bu yilgi ipak qurti xorijiy nav ekanligi yangilik boʻldi. Uning afzalligi esa barg ajratmasligida. Hosil boʻlgan har bir pilladan taxminan 800 metrga yaqin ancha sifatli tola olinishi ham quvonarli holat hisoblanadi.
Havaskor pillakorlarimizga ish boshlanishida har biriga 240 ming soʻmdan boʻnak puli berildi. Ipak qurtidan hosil boʻlgan chiqindi-goʻng fermer xoʻjaliklari tomonidan shartnoma asosida xarid qilindi.
Biz ayni kunlarda mahallamiz faollari bilan issiqxona qurish rejasi ustida maslahatlashyapmiz. Issiqxona qurib bitkazilsa, ovulimizning yosh mehnatkashlariga topshiriladi. Tinib-tinchimas doʻrmanliklarning hali rejalari koʻp.

Otamurod Yusupov, Doʻrman MFY raisi.