XIRMON TOʻLIB, TOʻKILDI DON

Dehqon mehnatining samarasi xirmonda  bilinadi, deydilar. Yetishtirilgan hosilni nest-nobud qilmay yigʻishtirib olish,  zahira  omborlariga tashish va uni talofatsiz, sifatli saqlash – hosil xirmonining salmogʻini yanada oshirish imkonini beradi. Bu borada “Taxiatoshdon mahsulotlari” AJ bilan tumanimiz fermer xoʻjaliklari oʻrtasida har yili tuman hokimining qarori asosida  kontraktatsiya shartnomalari tuzilib, “Mangʻit don” filiali omborxonasi don mahsulotlarini qabul qilish va sifatli saqlash uchun tayyorlab qoʻyiladi. Chunki dehqonlar yetishtirgan hosilning sifat va salmogʻi koʻp jihatdan gʻallani qabul qilish va saqlash boʻyicha olib boriladigan chora-tadbirlarga bogʻliq.
2020-yil hosili uchun tuman hokimining qaroriga asosan “Taxiatosh don mahsulotlari” AJ bilan tumanimizdagi 332 ta fermer xoʻjaliklari oʻrtasida 6465 tonna tovar don va 700 tonna urugʻlik bugʻdoy – jami 7303 tonna gʻallani qabul qilish va sifatli saqlash boʻyicha oʻz vaqtida kontraktatsiya shartnomalari tuzildi va “Mangʻit don” filiali 2020-yil hosilini qabul qilish mavsumiga oʻz vaqtida taxt qilib qoʻyildi.
Yongʻinga qarshi kurash jamiyati tuman  hududiy boʻlinmasi tomonidan filial omborxonasida yongʻindan himoya qiluvchi maxsus suyuqlik bilan yogʻoch qurilmalarga ishlov berilib, omborxona boʻlmalari birlamchi oʻt oʻchirish vositalari bilan toʻliq taʼminlandi.
Eʼtiborlisi shundaki, gʻallani qabul qilish maskanidagi tarozi, laboratoriya asbob-anjomlari davlat qiyoslash koʻrigidan oʻtkazilib, qayd qilish kitobchalari taxt qilib qoʻyildi. Gʻallani quritish maydonida  muammo boʻlmasligi uchun yoritish tizimlari texnik nazoratdan oʻtkazildi.
Ishchilar uchun namunali mehnat va dam olish sharoiti yaratilishiga  alohida eʼtibor qaratildi. Yuvinish va dam  olish xonalari sifatli taʼmirlandi. Shu bois, gʻallani qabul qilish maskanida ishlar  koʻngildagidek olib borilmoqda.
Xususan, kelgusi yil hosili uchun urugʻlik tayyorlash tsexi va urugʻlikni saqlash omborxonalari Oʻzbekiston Respublikasi “Don mahsulotlarini himoya qilish ekspeditsiyasi” DUK tomonidan kimyoviy preparatlar vositasida  dezinfektsiya va fumigatsiya qilinib, urugʻlik bugʻdoy navlarini  alohida qabul qilish va saqlashda maxsus toʻsiqlar oʻrnatilgani ishchilar va mutaxassislar uchun qulaylik yaratmoqda. Yuklash texnikalari va uzatish anjomlari sifatli taʼmirlangani, ehtiyot qismlar zahirasi yaratilgani esa ishimizda sifat va samaradorlik oshishini taʼminlayotir.
Gʻallani qabul qilish maskanida faoliyat yuritayotgan har bir ishchi va mutaxassis pandemiya sharoitida joriy etilgan karantin qoidalariga qatʼiy amal qilishi uchun zarur antiseptik vositalar, tibbiy niqob va qoʻlqoplar bilan taʼminlangan. Ishchi va mutaxassislarning harorati maxsus asbob yordamida tibbiyot xodimlari tomonidan  oʻlchab koʻrilgach, ishlashga ruxsat berilayotgani, har bir insonning bexavotir, sogʻ-salomat ishlashiga imkon bermoqda.
Bu yilgi “qirmizi don” karvonini Qipchoq MMTPga qarashli “Jumamuratov Shokir”, “Oq oltin” MMTP tasarrufidagi “Kenjayeva Shahlo”, Qilichboy MMTPdan “Rajapov Omonboy” fermer xoʻjaliklari boshlab berishdi.
Shunisi eʼtiborliki, tumanimizdagi 4 ta sektor hududidagi barcha fermer xoʻjaliklarida oʻrim-yigʻim ishlari belgilangan tartib-qoidalar asosida olib borilmoqda va gʻallani qabul qilish maskanimizga talofatsiz yetkazilmoqda. Maromida pishib-yetilgan gʻalla mahsuloti “Daladan – umumiy xirmonga” tamoyili asosida peshma-pesh yetkazib berilayotgani bois, tumanimizning gʻalla xirmoni kun sayin yuksalmoqda. Har bir sektor hududidan kuniga yillik 12-15 foiz, yaʼni tuman boʻyicha bir kunda 900-912 tonnadan ziyod gʻalla mahsuloti tayyorlanib, “Mangʻit don” filiali omborxonasiga yetkazib berilmoqda.
Tumanimiz gʻallazorlarida hosil oʻrim-yigʻimi esa avj pallada. Mehnatkash va lafzi halol dehqonlarimiz qisqa fursatlarda 2020-yilning yuksak “qirmizi don” xirmonini yaratish maqsadida fidoyilik bilan mehnat qilishmoqda.

Ikrom KENJAYeV,
“Taxiatosh don mahsulotlari AJ “Mangʻit don” filiali rahbari.