ХИРМОН ТЎЛИБ, ТЎКИЛДИ ДОН

Деҳқон меҳнатининг самараси хирмонда  билинади, дейдилар. Етиштирилган ҳосилни нест-нобуд қилмай йиғиштириб олиш,  заҳира  омборларига ташиш ва уни талофатсиз, сифатли сақлаш – ҳосил хирмонининг салмоғини янада ошириш имконини беради. Бу борада “Тахиатошдон маҳсулотлари” АЖ билан туманимиз фермер хўжаликлари ўртасида ҳар йили туман ҳокимининг қарори асосида  контрактация шартномалари тузилиб, “Манғит дон” филиали омборхонаси дон маҳсулотларини қабул қилиш ва сифатли сақлаш учун тайёрлаб қўйилади. Чунки деҳқонлар етиштирган ҳосилнинг сифат ва салмоғи кўп жиҳатдан ғаллани қабул қилиш ва сақлаш бўйича олиб бориладиган чора-тадбирларга боғлиқ.
2020 йил ҳосили учун туман ҳокимининг қарорига асосан “Тахиатош дон маҳсулотлари” АЖ билан туманимиздаги 332 та фермер хўжаликлари ўртасида 6465 тонна товар дон ва 700 тонна уруғлик буғдой – жами 7303 тонна ғаллани қабул қилиш ва сифатли сақлаш бўйича ўз вақтида контрактация шартномалари тузилди ва “Манғит дон” филиали 2020 йил ҳосилини қабул қилиш мавсумига ўз вақтида тахт қилиб қўйилди.
Ёнғинга қарши кураш жамияти туман  ҳудудий бўлинмаси томонидан филиал омборхонасида ёнғиндан ҳимоя қилувчи махсус суюқлик билан ёғоч қурилмаларга ишлов берилиб, омборхона бўлмалари бирламчи ўт ўчириш воситалари билан тўлиқ таъминланди.
Эътиборлиси шундаки, ғаллани қабул қилиш масканидаги тарози, лаборатория асбоб-анжомлари давлат қиёслаш кўригидан ўтказилиб, қайд қилиш китобчалари тахт қилиб қўйилди. Ғаллани қуритиш майдонида  муаммо бўлмаслиги учун ёритиш тизимлари техник назоратдан ўтказилди.
Ишчилар учун намунали меҳнат ва дам олиш шароити яратилишига  алоҳида эътибор қаратилди. Ювиниш ва дам  олиш хоналари сифатли таъмирланди. Шу боис, ғаллани қабул қилиш масканида ишлар  кўнгилдагидек олиб борилмоқда.
Хусусан, келгуси йил ҳосили учун уруғлик тайёрлаш цехи ва уруғликни сақлаш омборхоналари Ўзбекистон Республикаси “Дон маҳсулотларини ҳимоя қилиш экспедицияси” ДУК томонидан кимёвий препаратлар воситасида  дезинфекция ва фумигация қилиниб, уруғлик буғдой навларини  алоҳида қабул қилиш ва сақлашда махсус тўсиқлар ўрнатилгани ишчилар ва мутахассислар учун қулайлик яратмоқда. Юклаш техникалари ва узатиш анжомлари сифатли таъмирлангани, эҳтиёт қисмлар заҳираси яратилгани эса ишимизда сифат ва самарадорлик ошишини таъминлаётир.
Ғаллани қабул қилиш масканида фаолият юритаётган ҳар бир ишчи ва мутахассис пандемия шароитида жорий этилган карантин қоидаларига қатъий амал қилиши учун зарур антисептик воситалар, тиббий ниқоб ва қўлқоплар билан таъминланган. Ишчи ва мутахассисларнинг ҳарорати махсус асбоб ёрдамида тиббиёт ходимлари томонидан  ўлчаб кўрилгач, ишлашга рухсат берилаётгани, ҳар бир инсоннинг бехавотир, соғ-саломат ишлашига имкон бермоқда.
Бу йилги “қирмизи дон” карвонини Қипчоқ ММТПга қарашли “Жумамуратов Шокир”, “Оқ олтин” ММТП тасарруфидаги “Кенжаева Шаҳло”, Қиличбой ММТПдан “Ражапов Омонбой” фермер хўжаликлари бошлаб беришди.
Шуниси эътиборлики, туманимиздаги 4 та сектор ҳудудидаги барча фермер хўжаликларида ўрим-йиғим ишлари белгиланган тартиб-қоидалар асосида олиб борилмоқда ва ғаллани қабул қилиш масканимизга талофатсиз етказилмоқда. Маромида пишиб-етилган ғалла маҳсулоти “Даладан – умумий хирмонга” тамойили асосида пешма-пеш етказиб берилаётгани боис, туманимизнинг ғалла хирмони кун сайин юксалмоқда. Ҳар бир сектор ҳудудидан кунига йиллик 12-15 фоиз, яъни туман бўйича бир кунда 900-912 тоннадан зиёд ғалла маҳсулоти тайёрланиб, “Манғит дон” филиали омборхонасига етказиб берилмоқда.
Туманимиз ғаллазорларида ҳосил ўрим-йиғими эса авж паллада. Меҳнаткаш ва лафзи ҳалол деҳқонларимиз қисқа фурсатларда 2020 йилнинг юксак “қирмизи дон” хирмонини яратиш мақсадида фидойилик билан меҳнат қилишмоқда.

Икром КЕНЖАЕВ,
“Тахиатош дон маҳсулотлари АЖ “Манғит дон” филиали раҳбари.