BOLANI YoShLIGIDAN JISMONIY ChINIQTIRISh – UNI YeTUKLIKKA UNDAYDI
Jismoniy chiniqish insonni yanada faollashtiradi, qalbi joʻshqin hislarga toʻlib, yangi-yangi orzular sari intilib yashashga oʻrgatadi. Koʻpchilik jismoniy chiniqish deganda har kungi badan tarbiya mashqlarini tushunishadi. Toʻgʻri, badan tarbiya mashqlari insonni tetiklashtiradi, ishga, oʻqishga, ijtimoiy foydali mehnatga ragʻbatlantiradi. Lekin jismonan chiqinib borishning ahamiyati yanada katta. Xoʻsh, buni qanday amalga oshiramiz?
Buning uchun insondan biron jiddiy sarf-xarajat yoki koʻp vaqt talab etilmaydi. Kundalik hayot tarzimizdagi odatiy vazifalarimizni toʻgʻri tashkil etsak kifoya. Yaʼni, erta turish, 5-10 daqiqalik badan tarbiyadan soʻng, tanamizni hoʻl sochiq bilan ishqalash, yuz-qoʻlimizni iliq suvda yuvish va nihoyat, hovli boʻylab loʻkillab yurish orqali mushaklarimizga faollik bagʻishlaymiz, bundan butun tanamiz rohatlanadi. Toza havoda tomorqa yumushlarini bajarsak, yanada yaxshi. Agar ishxonangiz yoki oʻqish joyingiz yaqin boʻlsa, albatta, yayov yurishga odatlaning. Inson yayov yurgani sari vujudi orom olib, mushaklari sogʻlomlashadi, nafas olishi yengillashadi.
Men oʻquvchilarimga doimo oʻzlariga eʼtiborli boʻlgan holda oz-ozdan jismoniy mehnat bilan shugʻullanib borishlarini maslahat beraman. Masalan, ertalablari ota-onasining yonida, tomorqa ishlariga qarashish, daraxt tuplarini yumshatish, gullarni parvarishlash, meva terish, hovli sahniga suv sepish kabi ishlarni zavq bilan bajargan bola ertalab xush kayfiyat bilan nonushta qiladi, shu kungi darslarini ham yaxshi oʻzlashtiradi. Uning ongida oʻzi qilgan halol mehnatga munosabat va samimiy mehr tuygʻusi shakllanib boradi. Bola ham ijtimoiy faol, ham oʻz fikriga ega shaxs sifatida shakllanadi. Muhimi, oʻzi uchun ertalabki mashgʻulotlar qanchalik zarur ekanligini anglab yetadi, ham jismonan, ham maʼnan yetuklik sari intilib yashashga oʻrganadi.
Televizor va kompyuter qarshisida mixlanib qolgan bola esa hayotda hech qachon faol boʻlmaydi, har bir savoliga televizordan va kompyuterdan javob izlayverib, charchoq kayfiyatda yuradi. Oʻzini oʻzi jismoniy mashgʻulotlar bilan band qilgan va oʻz mehnatidan rohatlanishni oʻrgangan bola mutolaada fikri teran, maʼnan qalbi boy inson boʻlib ulgʻayadi. Shuning uchun har bir ota-ona farzandini ijtimoiy foydali mehnatga oʻrgatsa va chiniqtirib borsa, bu bolaning yetuk va barkamol inson boʻlib shakllanishiga yordam beradi.
Soliy YOʻLDOShEV, 36-sonli maktabning jismoniy tarbiya fani oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
