Tarixsiz kelajak yoʻq

Hozirgi kunda yoshlarning har tomonlama yetuk, sogʻlom va barkamol boʻlib oʻsishida barcha shart-sharoitlar mavjud.

Mangʻit iqtisodiyot kollejida jihozlangan kompyuter sinflari, lingafon xona, kutubxonalar, sport zallari zarur boʻlgan inventar bilan taʼminlangan. Yaratilgan bunday sharoitlar oʻquvchilarning oʻzlari tanlagan kasbi boʻyicha chuqur bilim olishlariga xizmat qiladi. Kollejda turli xil toʻgaraklar ham ishlab turibdi. Oʻquvchilar dars jarayonida va toʻgaraklarda oʻz bilimlarini chiniqtirib bormoqda. Oʻquvchilar oʻqish bilan bir qatorda turli bayramlarga va tarixiy shaxslarning tavallud kunlariga bagʻishlab tadbirlar oʻtkazib kelmoqda. Shunday tadbirlardan biri 9-aprel kuni Sohibqiron Amir Temur tavalludining 678 yilligi va Qoraqalpogʻiston Respublikasi Konstitutsiyasining 21 yilligi munosabati bilan oʻtkazildi.

Tadbirda 1-bosqich oʻquvchilaridan "Temur tuzuklari", "Amir Temur izdoshlari", "Sohibqiron avlodlari", "Adolat sohibi", "Sohibqiron" guruhlari qatnashdi. Ular 5 ta shart boʻyicha bellashdilar. Oʻquvchilarga Sohibqiron Amir Temur qachon va qayerda tugʻilgan? Amir Temur kimlarni oʻzining piri deb bilgan? Amir Temurga qanday faxrli nomlar berilgan? Amir Temur va Temuriylar davrida olingan soliqlar, Qoraqalpogʻiston Respublikasi Konstitutsiyam, bayrogʻi, gerbi va madhiyasi qachon qabul qilingan kabi savollar berildi. Oʻquvchilar har bir savollarga toʻgʻri aniq javob berdilar.

Ushbu besh jamoaning ichidan yaxshi tayyorlanganligi va bilimdonligi, savollarga toʻgʻri javob berganligi sababli "Sohibqiron" guruhi 1-oʻrinni, "Adolat sohibi” guruhi 2-oʻrinni, "Temur tuzuklari” guruhi 3-oʻrinni egallab kollej maʼmuriyati tomonidan faxriy yorliq va esdalik sovgʻalari bilan taqdirlandi.

Kollejlararo va kollejlarda guruhlararo shunday tadbirlar boʻlib tursa, oʻquvchilar buyuk siymolar haqida koʻplab maʼlumotlarga ega boʻladi va ularda yaxshi taassurotlar qoldiradi.

Kollejimiz oʻquvchilari bilimga chanqoq kelajakda shu buyuk bobolarimiz izidan borib barkamol va har tomonlama rivojlangan shaxslar boʻlib yetishib chiqishiga ishonchimiz komil.

G.Ahmedova,

Mangʻit iqtisodiyot kolleji ingliz tili fani oʻqituvchisi,

Oʻzbekiston Xalq taʼlimi aʼlochisi,

Xalq deputatlari tuman kengashi deputati.