Zamonaviy maktab — islohotlar samarasi va kelajak bunyodkorlari uchun mustahkam poydevor

Bugun yurtimizda taʼlim sohasiga qaratilayotgan yuksak eʼtibor oʻzining amaliy natijalarini bermoqda. Hududlarda zamonaviy maktab va maktabgacha taʼlim muassasalarining bunyod yetilishi, mavjud binolarning kapital taʼmirlanishi va jihozlanishi — bularning barchasi kelajak avlod kamoloti yoʻlida amalga oshirilayotgan keng koʻlamli islohotlarning yorqin ifodasidir.

Amudaryo tumani Maktabgacha va maktab taʼlimi boʻlimiga qarashli, “Boʻzyop” OFY hududida joylashgan 68-sonli umumiy oʻrta taʼlim maktabida ana shunday bunyodkorlik ishlari amalga oshirildi. Pudratchi “QIZKETKEN MAXSUS QURILISh” MChJ tomonidan qiymati 5 mlrd 950 mln soʻmlik loyiha asosida 330 oʻquvchi oʻrniga moʻljallangan qoʻshimcha oʻquv binosi hamda 12×24 oʻlchamdagi zamonaviy sport zal binosi qurilib, foydalanishga topshirildi.

Ochilish marosimida Oliy Majlis Qonunchilik palatasi deputat Sapargul Utemuratova, tuman hokimi oʻrinbosari Nodirbek Kamolov, mahalla faollari hamda maktab jamoasi ishtirok etdi.

Tadbir davomida masʼullar va mahalla faollari soʻzga chiqib, barchani yangi binoning ochilishi bilan samimiy tabrikladilar. Taʼkidlanganidek, aynan shunday zamonaviy loyihalar asosida barpo yetilayotgan maktab va bogʻcha binolari davlatimiz rahbari tomonidan taʼlim sohasida olib borilayotgan mislsiz islohotlarning yaqqol samarasidir.

Yangi oʻquv binosi 3 qavatdan iborat boʻlib, barcha zamonaviy talablarga toʻliq javob beradi. Maktab binosiga maxsus lift oʻrnatilib, inklyuziv taʼlim talablari asosida zarur shart-sharoitlar yaratildi. Bu imkoniyati cheklangan oʻquvchilarning ham teng va qulay sharoitda taʼlim olishini taʼminlaydi.

Bino isitish tizimi zamonaviy chiller–fankoil uskunalari asosida tashkil yetilgan boʻlib, xonalarda yil davomida meʼyoriy haroratni saqlash imkonini beradi. Isitish radiatorlari termostatik harorat sozlagichlari bilan jihozlangan, har bir xonada haroratni alohida tartibga solish imkoniyati mavjud. Bu yesa energiya tejamkorligini taʼminlash bilan birga, oʻquvchilar va pedagog xodimlar uchun yanada qulay muhit yaratadi.

Hozirgi kunda maktabda 227 nafar oʻquvchi taʼlim-tarbiya olmoqda. Ularga 27 nafar malakali pedagog saboq bermoqda. Yangi 330-oʻrinli qoʻshimcha bino mavjud quvvatni sezilarli darajada kengaytirib, taʼlim sifatini oshirishga xizmat qiladi.

Maktabda yaratilgan zamonaviy shart-sharoitlar yosh avlodning sifatli taʼlim olishi, jismonan sogʻlom va har tomonlama barkamol boʻlib voyaga yetishi uchun yaratilgan mustahkam poydevordir.

Xulosa qilib aytganda, bugun barpo yetilayotgan har bir yangi maktab — bu oddiy bino yemas, balki kelajak sari qoʻyilgan dadil qadamdir. Taʼlim sohasidagi bunday keng koʻlamli bunyodkorlik ishlari yosh avlod uchun mustahkam poydevor yaratib, Yangi Oʻzbekiston taraqqiyotiga xizmat qilmoqda.

Charos Arslonova, tuman hokimligining Axborot xizmati rahbari.