“BAHOR NAVOLARI – SIZGA ARMUGʻON!” DEB NOMLANGAN SINF KONTsERTI OʻTKAZILDI

Musiqa inson ruhiyatini tetiklashtiradi. Ibn Sino oʻzining “Tib qonunlari”kitobida bir oʻrinda musiqaning ruhiy taʼsir kuchiga baho berib, goʻdakning tarbiyasidagi ahamiyatini shunday taʼriflaydi: “Goʻdakning organizmi chiniqishi uchun ikki narsa zarur: biri uni asta qimirlatib tebratish, ikkinchisi esa onaning qoʻshigʻi, yaʼni alladir. Birinchisi bolaning tanasiga, ikkinchisi ruhiga tegishlidir”. Demak, musiqa insonga maʼnaviy ozuqa boʻlishi bilan birga uni tarbiyalashda ham ahamiyatli.

9-sonli Bolalar musiqa va sanʼat maktabi tumanimizning sanʼatga ixlosmand yoshlariga ilk soha taʼlimini berib, iqtidorlarini namoyon etishlarida muhim ijodiy pillapoya boʻlayotgan maskandir. Ushbu muassasada taʼlim-tarbiya olib, oʻz ijodi bilan xalqimizni xushnud qilayotgan taniqli sanʼatkor, mohir murabbiy boʻlib yetishganlar koʻpchilikni tashkil etadi.

Maktabda oʻquv yili rejasiga muvofiq maʼlum muddatlarda turli boʻlimlar sinflarida sanʼat sir-asrorlarini qunt bilan oʻrganayotgan oʻquvchilarning sinf kontsertlari oʻtkazilib turiladi.

Anʼanaga muvofiq shu yilning 5-martida oʻtkazilgan fortepiano boʻlimi sinf kontserti moʻʼtabar onaxonlar, lobar ayol-qizlarga bagʻishlandi.

Ushbu boʻlim rahbari Dilfuza Rahimova boshchiligida oʻquvchilar tadbirga jiddiy va puxta tayyorgarliklar koʻrishdi. Bu bejiz emas. Shu oʻrinda aytish joizki, sinf kontsertlari muassasa majlislar xonasida barcha oʻqituvchilar koʻz oʻngida ijro etiladi. Oʻz-oʻzidan maʼlumki, bunda boʻlim oʻqituvchilarining ham, shogirdlarining ham oʻtgan davrdagi mehnati koʻzga yaqqol tashlanadi. Bu esa sahnaga chiqishda oʻzgacha masʼuliyat yuklaydi. Qolaversa, mazkur tadbirga oʻquvchilar ota-onalarining ham taklif etilgani ijro masʼuliyatini yana ham oshirdi. Aslida boʻlim sinf kontsertlarini oʻtkazishdan koʻzlangan maqsad sanʼat olamiga qadam qoʻygan yoshlarda sahna madaniyatini tarbiyalash, tomoshabinlar oldida oʻzini erkin tutib, ularga mahoratini namoyish eta olish koʻnikmasini shakllantirish, ularni yangi ijodiy ishlarga ruhlantirish, ragʻbatlantirishdan iborat.

“Bahor navolari - sizga armugʻon” deb nomlangan mazkur sinf kontserti ikki qismda oʻtkazildi. Birinchi qismda oʻquvchilar fortepiano, skripka, truba asboblarida oʻzbek va chet el kompozitorlarining ayolni, koʻklam faslini madh etuvchi kuylarini ijro etdilar. Shu boʻlimning 1-7-sinflarida taʼlim olayotgan oʻquvchilar ijrosini barcha ustozlar, ota-onalar qiziqib tingladilar va qarsaklar bilan olqishladilar.

Kontsertning ikkinchi qismida  oʻquvchilar ayol-qizlar, onalar shaʼniga taniqli shoirlarimiz bitgan sheʼrlarni mahorat bilan ijro etdilar.

Shuningdek, barchaga bahoriy koʻtarinki kayfiyat bagʻishlovchi milliy kuy-qoʻshiqlarimiz yangradi. Fortepianoda ijro etilgan. “Chamanda gul”, “Guldasta”, “Bahor valsi” kabi milliy kuylar barchaga manzur boʻldi. Shuningdek estrada xonandaligi boʻlimi oʻquvchi-qizlari ijro etgan “Kabutar”, “Lolagullar” kabi qoʻshiqlari, raqs boʻlimi qizlarining jozibali raqslari tadbir shukuhini oshirdi.

Oʻtkazilgan “Bahor navolari - sizga armugʻon” deb nomlangan sinf kontserti tadbiri moʻʼtabar va munis ayol-qizlar bayramiga bagʻishlanganligi ijrochilarga ham oʻzgacha masʼuliyat va koʻtarinki kayfiyat bagʻishladi, mahorat bilan ijro etishga undadi.
9-sonli Bolalar musiqa va sanʼat maktabi oʻqituvchilari jamoasi hamkorligida tayyorlangan ushbu tadbir oʻquvchilarning ota-onalariga ham juda manzur boʻldi.

O.RAJABOVA.