40-SONLI MAKTABDA “XAYR, BIRINChI USTOZIM!” DEB NOMLANGAN ADABIY-MUSIQIY TADBIR OʻTKAZILDI

Insonning shaxs sifatida shakllanish jarayoni uning bolalikda olgan boshlangʻich taʼlimi sifatiga bogʻliq. Chunki yosh nihol quyosh nuriga qarab oʻsganiday, murgʻak qalbli bolajonlar ham ilm nuriga yoʻgʻrilgan ustoz taʼlimidan bahra olib ulgʻayadilar. Ustozlari suhbati ularni turli moʻʼjizalar olamiga yetaklaydi, mantiqiy fikrlashga, hayotiy xulosalar chiqarishga, oʻz oldlariga aniq maqsadlar qoʻyish va ana shu maqsadlari roʻyobi uchun intilib yashashga oʻrgatadi. Shu bois, bola qoʻliga ilk qalam tutqazib, oʻqish-yozishni oʻrgatgan, qalblarida shirin orzular uygʻotib, ularni ezguliklar sari ruhlantirgan birinchi ustozlarini ajib mehr-muhabbat bilan yaxshi koʻradilar. Ayni kunlarda umumtaʼlim maktablarida, “Soʻnggi qoʻngʻiroq” tadbirlari arafasida boʻlib oʻtayotgan boshlangʻich sinflar bitiruvchilarining “Xayr, birinchi ustozim!” deb nomlangan xayrlashuv kechalarida bu yaqqol namoyon boʻlmoqda.

Amudaryo tumanidagi 40-sonli maktabning 4-“v” sinfi oʻquvchilari va ularning ota-onalari uchun joriy yil 19-may sanasida boʻlib oʻtgan “Xayr, birinchi ustozim!” mavzusidagi adabiy-musiqiy kecha biri-biridan yorqin taassurotlar baxsh etdi. Xayrlashuv kechasida maktabning boshlangʻich sinflar oʻqituvchilari, 4-“v” sinf oʻquvchilariga taʼlim bergan ustozlari hamda ularning ota-onalari ishtirok etishdi.

Avvalo shuni alohida aytish joizki, tadbir oʻtkaziladigan xona oʻquvchilarning toʻrt yil davomida erishgan yutuqlari, bilim va koʻnikmalarini oʻzida mujassam etgan koʻrgazmali vositalar, turfa bahor gullari, suratlar va albomlar, ustozlarni sharaflovchi jarangdor shiorlar bilan bezatilgani ishtirokchilarga joʻshqin kayfiyat bagʻishladi.

Joriy oʻquv yilida maktabning 4-“v” sinfini 33 nafar oʻquvchi bitirishmoqda. Biri-biridan iqtidorli va epchil oʻquvchilar taʼlimda ham, sportda va jamoat ishlarida ham doimo faol. Ular orasida maktab va tuman miqyosida anʼanaviy tarzda oʻtkazilib kelinayotgan turli koʻrik-tanlovlar, boshlangʻich sinf oʻquvchilari orasida boʻlib oʻtgan fanlar olimpiadalari ishtirokchilarining gʻolib va sovrindorlari bor. Ayni paytda mazkur sinfning eng aʼlochi oʻquvchilari Prezident maktabiga oʻqishga kirish uchun tayyorgarlik koʻrishmoqda.

“Xayr, birinchi ustozim!” – xayrlashuv kechasida 4-“v” sinfning barcha oʻquvchilari faol qatnashdilar. Ular jam boʻlishib, Vatan, ustoz va tinchlik-totuvlikni madh etuvchi sheʼrlar aytishdi, ilm va aql-idrokning xosiyatlari, kattalarga hurmat, kichiklarga izzat koʻrsatish odamiylikning eng oliy belgisi ekanligi haqidagi ibratli maqol va hikoyalari bilan milliy-maʼnaviy qadriyatlarning ahamiyati xususida toʻlqinlanib soʻzladilar. Ona Vatan va ustozlarga bagʻishlab kuylagan qoʻshiqlari, biri-biridan goʻzal va jozibali raqslari ishtirokchilarga zavq-shavq bagʻishladi.

Ayniqsa, ota-onalari uchun alohida tayyorlangan va mahorat bilan ijro etilgan, muhtarama onalar, aziz otalarni sharaflovchi qoʻshiqlardan ularning ota-onalari juda mamnun boʻlishdi va farzandlariga munosib taʼlim-tarbiya bergan, ularning xulqini ilm va goʻzal fazilatlar bilan ziynatlagan ustozlariga chin dildan minnatdorchilik bildirdilar.

Shu kuni boshlangʻich sinf bitiruvchilari yanada yangi va ulugʻvor orzular ogʻushida birinchi ustozlari bilan xayrlashdilar. Xayrlashuv onlarida sinf rahbari Muyassar Kamolova sevimli shogirdlariga yuqori sinflarda ham ahillik va ishtiyoq bilan oʻqib, bilim olishlari, ona Vatanga munosib, yuksak salohiyatli va maʼnaviyatli insonlar boʻlib voyaga yetishlari yoʻlida ezgu tilaklar bildirdi.

ROBIYa YOʻLDOShEVA.