Ishda ham, hayotda ham faol

Hali yangi yil bayrami shodiyonalari nihoyasiga yetmay, Omongul opa yana olam-olam tabriklarga, quvonchlarga belandi. Qishki taʼtilni maroqli oʻtkazgan oʻquvchilari oʻquv yilining yangi chorakligi – ilk dars kuni:

- Tabriklaymiz, ustoz! – deya uni maktab hovlisida kutib olishdi.

- Rahmat, bolalarim! – yuzi quvonchdan  yashnab ketdi opaning.

Oʻquvchilari davrasida sinfga kirgan Omongul opa oʻz farzandlariday boʻlib qolgan oʻquvchilar bilan birma-bir soʻrashib chiqqach, bugungi quvonchining sababkori, 9-sinf oʻquvchisi Nasiba Otamurodovani "Bilimlar bellashuvi”ning tuman bosqichida gʻolib boʻlganligi bilan tabrikladi.

- Nasibaning tumanda faxrli 1-oʻrinni egallab, respublika bosqichiga yoʻllanma olgani hammamizning yutugʻimiz boʻldi, - deydi u mamnuniyat bilan.

- Shuni aytadilar-da, "oʻqigan - oʻzar”, deb.

Omongul Adilboyeva faoliyat yuritayotgan 55-sonli maktabda Nasiba singari bilimga chanqoq oʻquvchilar talaygina. 8-sinf oʻquvchisi Shahlo Qozoqboyeva matematika fanidan yuqori natijalarga erishgan boʻlsa, Sohiba Rajabboyeva informatika fanidan "Bilimlar bellashuvi”ning tuman bosqichida faxrli 1-oʻrinni egallab, Qoraqalpogʻiston Respublikasi bosqichiga yoʻllanma oldilar.

Omongul opa faxrlanib gapirganicha bor. Maktabda barcha fanlar boʻyicha yetuk mutaxassis fan oʻqituvchilari darslarni maroqli oʻtadilar. Ayniqsa, informatika va qoraqalpoq tili va adabiyoti, matematika fanlariga qiziquvchilar koʻpchilikni tashkil qiladi. Informatika fani oʻqituvchisi Rustam Rahmatullayevning har bir darsi innovatsion texnologiyalar asosida, qiziqarli savol-javoblar, amaliy va nazariy mashgʻulotlarning uzviyligi asosida olib boriladi.

Qoraqalpoq tili va adabiyoti fani darslarini Omongul opa Adilboyeva alohida mehr bilan oʻtayotgani bois, uning oʻquvchilari qoraqalpoq tilida bemalol gaplashadilar, qoraqalpoq yozuvchilari ijodiga mansub adabiyotlarni chuqur tushunadilar.

Omongul opa oilada ham mehribon, pishiq-puxta, tadbirkor ona. Atigi 5 sotix tomorqasida kamida 10 xil mevali daraxtlar oʻstirgan. Dasturxoni oʻz bogʻida yetishtirilgan meva-chevalardan fayzli. Har yili opa bahorda bozordan mayda joʻjalar sotib olib, parvarishlaydi. Joʻjalar kuzga borib har biri 1,5-2 kilo tosh bosadigan darajada yetiladi. Qish boʻyi xonadonida tuxum va tovuq goʻshti serob boʻladi. Oylik maoshdan tashqari tomorqasidan unayotgan goʻsht, sut, tuxum, meva-cheva farzandlarining vitaminlarga boy ovqatlar tanovul qilib, sogʻlom oʻsishini taʼminlayotganidan Omongul opa xursand.

Opa oʻzi yashaydigan Oybek nomli mahallada jamoatchilik va davlat idoralarining hamkorlikdagi ishchi guruhi aʼzosi sifatida yosh oilalar, turmush qurishga tayyorlanayotgan yoshlar oʻrtasida maʼnaviy-maʼrifiy mavzularda suhbatlar oʻtkazib turadi. 55-sonli maktab xotin-qizlar qoʻmitasi raisi sifatidagi faoliyat koʻlami yanada keng. Voyaga yetmagan qiz bolalar bilan sogʻlom turmush tarzini qaror toptirishda yoshlarning tutgan oʻrni, erta turmush qurishning zarari haqida tushuntirish ishlari olib boradi. Bu borada unga umr yoʻldoshi, tajribali shifokor Roʻzimboy Nurimbetov yaqindan yordam berib, inson salomatligiga oid risolalar, suratli bukletlar bilan taʼminlab turadi.

- Inson eng avvalo sogʻlom boʻlishi kerak, - deydi opa. – Har jihatdan sogʻlom odamning fikri sogʻlom va teran boʻladi.

Shu bois, Omongul opa oʻquvchilarining ham maʼnaviy, ham jismoniy jihatdan kamol topishi uchun erinmay izlanadi. Chunki oʻqituvchilar teran fikrli, bilimli, mulohazali boʻlsalar taʼlimda muvaffaqiyatga erishiladi. Sogʻlom bolani voyaga yetkazish deganda, eng avvalo uning maʼnaviy va jismoniy barkamolligi nazarda tutiladi. Maʼnan va jismonan yetuk bola fanlarni tez oʻzlashtiradi, dunyoqarashi keng va qobiliyatli boʻladi. Omongul opa Adilboyeva oʻz oʻquvchilari bilan ishlashishda  taʼlim va tarbiyaning ana shunday uzviyligiga alohida eʼtibor beradigan, ishlab charchamaydigan muallima.

Zuhra AHMEDOVA,

55-sonli maktab kutubxonasi mudirasi.