Alla yangrab tursin, zamin ustida!

Ona. Bu soʻz bizga moʻʼtabar va aziz. Chunki u bizni oq yuvib, oq tarab, voyaga yetkazgan insondir. Dunyoda har qanday ulugʻ zotni – paygʻambarlarni ham, podshohlarni ham ona tuqqan. Bolaning tili "Ona” soʻzi bilan chiqadi. Onaga boʻlgan ehtirom barcha insonlarga xos fazilatdir.

Bir kuni bir kishi paygʻambarning oldiga kelib, yaxshilikni kimga qilsam boʻladi, deb soʻrabdi. Shunda paygʻambar onangga, deb javob beribdi. U kishi uch marotaba soʻrabdi. Uch marotaba ham onangga, deb javob qaytaribdi.

Ona farzandini voyaga yetkazgandan keyin undan mehr kutadi. Lekin baʼzi bir farzandlar borki, hatto onasining dilini ogʻritadi. Aqlli bolalar onalarini hurmat qilishadi. Bu ijodiy tomon barcha bolalarda boʻlsa edi. Onamiz bizlar uchun nimalarga qoʻl urmaydi, deysiz. Biz buning qadriga yetayapmizmi? Balki biz bunga harakat qilayotgandirmiz, lekin onaning farzandiga qilgan yaxshiligini hech nimaga tenglab boʻlmaydi. Shuning uchun ul zotga har vaqt ehtirom koʻrsatish lozim.

Ona qanday kasb egasi boʻlmasin, u eng avvalo oilasi uchun, farzandlari uchun, jon kuydirib yashaydi. Xalqimizda: "ayolni eʼzozlagan millatning qadri hamisha baland boʻladi” degan ajoyib naql bor. Mamlakatimiz davlat va jamiyat qurilishida yil sayin ayollar faolligi oshib bormoqda. Bu esa ayolning qadr-qimmatini yuksaklarga koʻtarishdir. Onani avaylash bu farzand burchi. Har qanday farzand bu burchni bajarishga majburdir. Ona – ulugʻlik, goʻzallik, donolik timsoli. Ona hayot chashmasi. Ona buyukligi bilan va goʻzal fazilati bilan eʼzozlanib keladi.

Oʻzbek ayollari dunyodagi eng bolajon ayollardan hisoblanadi. Kechalari uxlamasdan beshik tebratib, bolasiga alla aytayotgan ona chin mehr timsolidir. Ona allasida farzandini baland togʻlarga, bepoyon bogʻlarga oʻxshatadi. Farzandlar aytilgan bu sehrli allani avlodlarga yetkazib beradi. Ona farzandiga alla aytayotgan paytida begʻubor chaqaloqqa boʻlgan mehrini qoʻshadi. Ona allasi boshqa kuy-qoʻshiqlardan ana shu jihati bilan ajralib turadi. Alla farzandlarni yaxshilikka, goʻzallikka chorlaydi. Alla eshitib oʻsgan bola aql farosatli boʻladi, - deydilar. Ammo dunyoda alla eshitmay, onasiz oʻsayotgan bolalar ham yoʻq emas, biz onamiz bagʻrida Vatanimiz ardogʻida ekanligimizdan quvonishimiz kerak, albatta.

Jannat onalarning poyida deb bejizga aytishmaydi. Buning boisi shundaki, ona qadam bosgan dargoh shunchalar nurafshon boʻlib ketadi. Onaning hurmatini joyiga qoʻysang, savobga qolasan, degan hikmat ham shundan. Ularning yurgan har bir qadamida jannat bor, baxt bor. Demak, oʻsha baxt onalarning poyida. Ularning poyidagi jannatni his qila bilishimiz lozim. Ona mehrini quyoshdan taralayotgan nurga ham oʻxshatishadi. Biz ana shu mehr ummoniga choʻmib ulgʻayamiz.

8-mart - Onajonlar bayrami bilan barcha onalarni, opa-singillarni va dugonalarimni chin qalbimdan muborakbod etaman. Ularga sihat-salomatlik, ishlarida rivoj, oʻqishlarida omad tilayman. Hech qachon yuzlaridan kulgu arimasin. Tolei baland, rizq-u nasibasi ziyoda boʻlsin, har bir Ayolning! Oilasi bagʻrida, farzandlari davrasida baxt nashidasini surib yashasinlar.

Aziz onajonlar! Bagʻringiz beshikdan aslo ayro tushmasin. Dunyodagi eng zulmkor insonning ham yuragini eritib yuboruvchi otashin qoʻshiq – Alla yangrab tursin mangu zamin ustida!

Yulduz Madadova,

44-sonli maktabning 6-sinf oʻquvchisi, tanlov gʻolibi.

(Foto - http://www.afisha.uz)