Gʻalla ekish mavsumi boshlanishi munosabati bilan koʻrgazmali seminar oʻtkazildi
Yurtimizda oziq-ovqat xavfsizligini taʼminlash, xalqimiz dasturxonini sifatli va arzon non mahsulotlari bilan toʻldirish maqsadida gʻallachilik sohasiga doimiy ravishda alohida eʼtibor qaratib kelinmoqda. Har bir qarich yerdan unumli va oqilona foydalanish, ilgʻor agrotexnologiyalarni amaliyotga keng tatbiq etish hamda moʻl hosil yaratish – bugungi kun dehqonlari oldidagi eng dolzarb vazifalardan hisoblanadi. Shu maqsadda, joylarda boʻlgʻusi hosil poydevorini mustahkamlashga qaratilgan muhim tadbirlar qizgʻin davom etmoqda. Xususan, Amudaryo tumanida 2027-yil hosili uchun kuzgi boshoqli don ekinlarini ekish mavsumiga tayyorgarlik ishlari doirasida koʻrgazmali seminar tashkil etildi.
Tadbir Amudaryo tumanining Oq oltin ovuli hududida joylashgan "Yakubova Gavhar" fermer xoʻjaligi maydonlarida boʻlib oʻtdi. Seminarda Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari, Qishloq xoʻjaligi vaziri Komiljon Aytbayev, Oʻzagroinspektsiyaning Qoraqalpogʻiston Respublikasi boshqarmasi boshligʻi Yerpolat Qayipbergenov hamda tuman hokimi Sobir Xoʻjametovlar ishtirok etib, mavsum oldidan bajarilishi lozim boʻlgan vazifalar haqida soʻz yuritdilar. Shuningdek, tadbirda koʻplab soha mutaxassislari, fermer va dehqon xoʻjaliklari rahbarlari qatnashib, oʻzaro tajriba almashdilar.
Tadbir davomida kuzgi bugʻdoy ekinlarini maqbul muddatlarda ekish masalasi kun tartibidagi eng asosiy mavzulardan biriga aylandi. Mutaxassislar tomonidan yerga sifatli ishlov berish, har bir hududning iqlim va tuproq sharoitiga mos keluvchi urugʻni toʻgʻri tanlash hamda ekish meʼyorlariga qatʼiy amal qilish boʻyicha zarur tavsiyalar berildi. Chunki, urugʻ qadash jarayonidagi har bir kichik detal kelajakdagi hosildorlikka bevosita taʼsir koʻrsatadi. Bundan tashqari, ekinlarning dastlabki rivojlanish davrida agrotexnik talablar asosida parvarishlash masalalariga ham alohida eʼtibor qaratilib, muhim koʻrsatmalar berildi.
Seminarning eng ahamiyatli qismi esa, shubhasiz, amaliy mashgʻulotlar boʻldi. Dala maydonida fermer xoʻjaligi misolida gʻalla ekish ishlari amaliy jihatdan koʻrsatib berildi. Bunda yerga urugʻ qadash jarayonida texnikalardan unumli va toʻgʻri foydalanish jihatlari namoyish etildi. Mutaxassislar yuqori va sifatli hosil yetishtirish uchun zamonaviy agrotexnologiyalardan samarali foydalanish boʻyicha oʻzlarining qimmatli tavsiyalarini fermerlarga yetkazishdi.
Tadbirda barcha masalalar atroflicha tahlil qilinib, gʻalla ekish mavsumini yuqori saviyada va uyushqoqlik bilan tashkil etish rejalari belgilab olindi. Mutasaddi rahbarlarga belgilangan agrotexnik muddatlarda ekish ishlarini sifatli yakunlash yuzasidan tegishli topshiriq va koʻrsatmalar berildi. Zero, bugungi mehnat va toʻgʻri tashlangan qadamlar kelgusi yilgi hosilning moʻl va barakali boʻlishini taʼminlaydi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
