Mahalla – obod uyimiz

- Mahalla – katta-kichik oilalarni birlashtirgan katta xonadon. Unda hamma narsa – mahalla ahlining turmush tarzi, orzu-intilishlari, muammo va tashvishlari kaftdagidek namoyon boʻlib turadi. Hamma bir-birini taniydi, bir-birining gʻamiga yelkadosh, quvonchiga sherik. Shuning uchun ham mahallamizni yaxshi koʻramiz, unga intilib yashaymiz, qiyofasini yanada obod va koʻrkam koʻrishni istaymiz.

Oʻtgan 2013-yilda aholining toza ichimlik suviga boʻlgan ehtiyojini hisobga olgan holda "Obod turmush yili” Davlat Dasturiga muvofiq 2800 metr uzunlikda suv tarmoqlari – trubalar tortildi. "Uchqun”, "Istiqlol”, Muqimiy hamda Bobur nomli koʻchalarga tosh yotqizildi. Ayniqsa, qor-yomgʻirli kunlarda qiynalib kelayotgan 1-boshi berk "Uchkun” koʻchasiga tosh yotqizilganidan aholi xursand.

Mahallamizda haftaning maʼlum kunlarida oʻz faoliyatlarini olib boruvchi "Salomatlik” sektori, "Oilaga kirish sektori”, "Bandlik sektori” "Jinoyatchilik profilaktikasi sektori”, "Taʼlim va tarbiya sektor”lari aʼzolari mahallada sogʻlom turmush tarzini shakllantirish maqsadida davlat va jamoat tashkilotlari bilan hamkorlikda tizimli ish olib bormoqdalar. Shu bois, mahallamizda inson omiliga oid har qanday muammo yoki masala sektorlar aʼzolarining nazaridan chetda qolmaydi. Nuroniylar  ahvolidan xabar olish, yangi oilalar hayotiga daxldor muammolarni hal etish, erta turmush qurishning oldini olish, ichkilikbozlikka, giyohvandlik va odam savdosiga qarshi kurashish, aholining ish bilan bandligini yanada yaxshilash, yosh avlod taʼlim-tarbiyasi, ona va bola sogʻlomligi kabi masalalar doimiy eʼtiborda.

Mahallamizda istiqomat qiluvchi turli millat vakillari bir oila aʼzolaridek ahil-inoq yashayotganlarining boisi esa inson omiliga eʼtiborning, millatlararo tenglik-totuvlik tuygʻularining buyukligidan. Chunki qayerda hamjihatlik, ahillik boʻlsa, oʻsha yerda taraqqiyot boʻladi, insonlar baxt-saodatga erishadilar.

Oʻ.Saʼdullayev,

Oybek nomli MFY raisi.

(Foto - http://mahallafond.uz)