Маҳалла – обод уйимиз

- Маҳалла – катта-кичик оилаларни бирлаштирган катта хонадон. Унда ҳамма нарса – маҳалла аҳлининг турмуш тарзи, орзу-интилишлари, муаммо ва ташвишлари кафтдагидек намоён бўлиб туради. Ҳамма бир-бирини танийди, бир-бирининг ғамига елкадош, қувончига шерик. Шунинг учун ҳам маҳалламизни яхши кўрамиз, унга интилиб яшаймиз, қиёфасини янада обод ва кўркам кўришни истаймиз.

Ўтган 2013 йилда аҳолининг тоза ичимлик сувига бўлган эҳтиёжини ҳисобга олган ҳолда "Обод турмуш йили” Давлат Дастурига мувофиқ 2800 метр узунликда сув тармоқлари – трубалар тортилди. "Учқун”, "Истиқлол”, Муқимий ҳамда Бобур номли кўчаларга тош ётқизилди. Айниқса, қор-ёмғирли кунларда қийналиб келаётган 1-боши берк "Учкун” кўчасига тош ётқизилганидан аҳоли хурсанд.

Маҳалламизда ҳафтанинг маълум кунларида ўз фаолиятларини олиб борувчи "Саломатлик” сектори, "Оилага кириш сектори”, "Бандлик сектори” "Жиноятчилик профилактикаси сектори”, "Таълим ва тарбия сектор”лари аъзолари маҳаллада соғлом турмуш тарзини шакллантириш мақсадида давлат ва жамоат ташкилотлари билан ҳамкорликда тизимли иш олиб бормоқдалар. Шу боис, маҳалламизда инсон омилига оид ҳар қандай муаммо ёки масала секторлар аъзоларининг назаридан четда қолмайди. Нуронийлар  аҳволидан хабар олиш, янги оилалар ҳаётига дахлдор муаммоларни ҳал этиш, эрта турмуш қуришнинг олдини олиш, ичкиликбозликка, гиёҳвандлик ва одам савдосига қарши курашиш, аҳолининг иш билан бандлигини янада яхшилаш, ёш авлод таълим-тарбияси, она ва бола соғломлиги каби масалалар доимий эътиборда.

Маҳалламизда истиқомат қилувчи турли миллат вакиллари бир оила аъзоларидек аҳил-иноқ яшаётганларининг боиси эса инсон омилига эътиборнинг, миллатлараро тенглик-тотувлик туйғуларининг буюклигидан. Чунки қаерда ҳамжиҳатлик, аҳиллик бўлса, ўша ерда тараққиёт бўлади, инсонлар бахт-саодатга эришадилар.

Ў.Саъдуллаев,

Ойбек номли МФЙ раиси.

(Фото - http://mahallafond.uz)