Internet tufayli toʻkilgan koʻz yosh

XXI asr axborot asri ekanligi hammamizga maʼlum. Internet bizga cheksiz imkoniyatlarni inʼom etadi. Bir soʻz bilan aytganda, dunyo boʻyichaoʻrgimchak toʻri, deya taʼriflanayotgan internet – cheksiz-chegarasiz axborot xazinasidir. U bizning oltindan afzal vaqtimizni tejashi bilan teng darajada uni ogʻirlashtirayotganini, shu tufayli koʻplab muammolarga sabab boʻlayotganini, yoshlar orasida turli maʼnaviyatimizga yot boʻlgan illatlarning tez surʼatlarda tarqalayotganini ham unutmasligimiz kerak. Internetdan foydalanishda maʼlum bir chegara chiziqlaridan oʻtmagan holda, oqilona ish tutishimiz zarur, deb oʻylayman. Tun-u kun "agent”, "odnoklassniki” kabi muloqot vositalaridan foydalanuvchi yoshlar safi yanada ortib bormoqda.

Soʻzimning dalili sifatida ushbu hayotiy voqeani misol keltirmoqchiman. Bir kuni bozordan qaytayotgandim. Kun issiq, hamma uyiga oshiqmoqda. Mashina endi yurayotgan ham ediki, yigʻidan koʻzlari qizarib ketgan chiroyli qiz, yonida esa 12 yoshlar chamasi singlisibilan orqa oʻrindiqqa oʻtirdi. Hammaning eʼtibori shu qizlarda. Marshrut taksi joyidan qoʻzgʻaldi hamki, qiz yigʻidan toʻxtamasdi. Shunda yoshi kattaroq opalardan biri hol soʻrab, qizni yupatgan boʻldi. Qiz yigʻidan toʻxtamagach, oʻsha opa kichikina qizchadan opasiga nima boʻlganini soʻrab, hech qayeri ogʻrimayotganmikan, deb xavotirlana boshladi. Shunda singlisi: "yoʻq opamning hech qayeri ogʻrimayapti, faqat uni bir yigit xafa qildi, shunga yigʻlayapti”, - dedi va boʻlgan voqeani ayta boshladi. Aytishicha, opasi "odnoklassniki”da bir yigit bilan tanishib, uni yoqtirib qolgan ekan, ular bir-birlarini koʻrmasdan deyarli 1-yildan buyon telefon orqali gaplashib yurishgan ekan. Bugun esa internet koʻprigi orqali tanishgan oshiqlar uchrashishga qaror qilishgan ekan. Yigit oʻrtoqlari bilan qizni kutib turganida, uzoqdan 16 yoshli, yuzlari oppoqqina, juda chiroyli qizga koʻzi tushadi. Bu orada qiz ularning yoniga yetib keladi. Qizning salomlashish uchun uzatgan qoʻliga nazar solgan yigitning rangi oʻzgarib, tuzukroq soʻrashmay ham ketib qoladi. Chunki qizning qoʻlida kuyishdan qolgan dogʻ bor ekan. Qiz esa zor yigʻlagancha qolavergan.

Yoʻl boʻyi oʻylanib bordim. Endi bu qizning hayoti qanday kechadi? Hayotga va muhabbatga boʻlgan ishonchini kim qaytaradi? Uning qoʻlidagi dogʻ vaqt oʻtib, yoʻqolishiga, unga xalaqit bermasligiga kim ishontiradi. Bu sizga oddiy holdek tuyulayotgan boʻlishi mumkin. Ammo singan yosh koʻngilni qayta tiklash mushkul ekanligini anglash qiyin emas. Mana shunga oʻxshash voqealar kundalik hayotimizda tez-tez uchrayotganligiga sabab - yoshlar tobora internet atalmish ummon tubiga shoʻngʻiyotganidir. Doʻstlarim, keling, internetdan oʻz oʻrnida foydalanaylik. Ota-onamiz va atrofdagilarga qolaversa, jamiyatga ziyon yetkazadigan illatlardan xoli boʻlaylik.

Muhayyo RAHIMBOYeVA,

QDU jurnalistika fakultetining 2-bosqich talabasi.

(Foto - http://tech.uz)