“MAHALLA YeTTILIGI”NING HAMKORLIKDAGI FAOLIYaTI TUFAYLI ChOYKOʻL OVULI OBOD VA FAROVON GOʻShAGA AYLANMOQDA

Biz hammamiz mahallada yashaymiz, uning har bir qarich yerini obod qilish, mahalla ahlining muammolariga yelka tutish, yaxshi-yomon kunlarida mahalladoshlar bilan birga boʻlish, oʻzimiz yashab turgan hududning kelajagi, yanada taraqqiy etishi uchun masʼullik tuygʻusi bilan yashash – azaliy qadriyat. Shu bois, har gal Yangi yil arafasida mahalla masʼullari kelgusi yil rejalari, belgilanayotgan yangi vazifalar, mahalla hayotida kutilayotgan oʻzgarishlar yuzasidan xalq vakillari oldida hisobot berishni, yechimini kutayotgan muammolar boʻyicha fikrlashib olishni oʻzlarining zimmalaridagi burchi deb biladilar. Zero, davlatimizning mahalla institutini rivojlantirish va uni eng demokratik va xalqona, ijtimoiy tuzilmaga aylantirish borasidagi talabi ham shu.

“Fuqarolarning oʻzini-oʻzi boshqarish organlari toʻgʻrisida”gi Oʻzbekiston Respublikasi Qonuniga muvofiq hokimiyat organlari rahbarlarining fuqarolar yigʻinlari faoliyati sohasiga kiruvchi masalalar yuzasidan hisobotlarini eshitishi ham belgilab qoʻyilgan. Bu esa mahalliy darajadagi muammolarga oʻz vaqtida yechim topish, jamoatchilik nazorati amalga oshirilishini, davlat hokimiyati va boshqaruvi organlari faoliyatining ochiqligini taʼminlash, fuqarolarning davlat va jamiyat ishlarini boshqarishda faol ishtirok etishi hamda davlat organlari, nodavlat notijorat tashkilotlari va fuqarolarning oʻzini-oʻzi boshqarish organlari oʻrtasidagi ijtimoiy sheriklik munosabatlarini mustahkamlash imkonini bermoqda.

Yangi 2025-yilning ilk kunlarida ijodiy guruhimiz bilan Amudaryo tumanidagi Choykoʻl ovul fuqarolar yigʻinida boʻlganimizda “Mahalla yettiligi”ning aholi murojaatlari bilan ishlash, mahalliy darajadagi muammolarni samarali hal etishga qaratilgan saʼy-harakatlari tufayli xalq hayotidagi oʻzgarishlar va yangilanishlardan koʻzimiz quvondi. Chunki har choraklik yakuni boʻyicha hokimiyat organlari rahbarlari va ovul fuqarolar yigʻini vakillari tomonidan yigʻin faoliyati vakolatiga kiruvchi masalalar yuzasidan hisobotlarni eshitib borilishi bois ovul ahli hayotiga oid barcha muammolar tizimli ravishda hal etilib borilmoqda. “Mahalla yettiligi” aʼzolari uchun aholi murojaatlari, ariza va takliflar bilan ishlash faqat joylarda amalga oshirilayotgan ishlarning samarasini belgilash vositasi emas, necha-necha odamlarning arz-dodi, taklif va shikoyatlarini joyiga chiqqan holda ijobiy hal etishga qaratilgan ezgu qadamdir.

Bugungi kunda ovul hududida 1 ming 192 xonadon tarkibidagi 1 ming 293ta oilada 7 ming 123 nafar fuqaro istiqomat qiladi. Tarixga aylangan 2024-yil davomida 1 ming 192 xonadonga “Mahalla yettiligi” aʼzolari tomonidan uyma uy yurib, elektr energiyasi va tabiiy gazni tejash, xonadonlarga quyosh paneli, quyosh suv isitish uskunasi, tejamkor lampalar oʻrnatish buyicha olib borilgan suhbatlar, targʻibot tadbirlari va uchrashuvlar tufayli koʻpdan-koʻp muammolar joyida hal etildi.

Xususan, yer va mol-mulk soligʻi, kommunal toʻlovlar oʻz vaqtida amalga oshirilgani bois, bu borada belgilangan reja 1 milliard 426 million soʻm oʻz vaqtida toʻlandi va aholining soliqlar boʻyicha qarzdorligi umuman yoʻq hisobi.

Aholi bandligini taʼminlashga qaratilgan chora-tadbirlar tufayli 186 nafar fuqarolar doimiy daromad manbaiga ega boʻldilar. 1 ming 105ta xonadon egalari tomorqalaridan samarali foydalanishlari evaziga oʻz oilalari farovon, yanada obod boʻlishiga erishayotganlari esa eʼtiborga va eʼtirofga munosib.

Bundan tashqari, 95ta xonadonda 10 va undan ortiq chorva mollari parvarishlanayotgani tufayli mazkur oilalar aʼzolari ham doimiy daromad manbalariga ega boʻldilar. “Yashil makon” umummilliy harakati doirasida choykoʻlliklar mahalla binosi atrofida 20 sotix yer maydoniga 150 tup mevali daraxt koʻchatlari ekishib, “Mahalla bogʻi”ni tashkil qilishgani ovul obodligini taʼminlashga qaratilgan yana bir ezgu qadam boʻldi. Bundan ham muhimi, ovul hududini koʻkalamzor goʻshaga aylantirish maqsadida 800 ta tomorqa yeri mavjud xonadonning har birida 10 tupdan, jami 8000 mevali va manzarali daraxt koʻchatlari ekildi.

Aholini ijtimoiy qoʻllab-quvvatlash, ularning ogʻirini yengil, mushkulini oson qilish, qiyin paytda yelkadosh boʻlish “Mahalla yettiligi”ning doimiy vazifasiga aylangan. Birgalikdagi saʼy-harakatlar, tufayli yil boshida “Ijtimoiy himoya” reyestriga kiritilgan fuqarolarning barchasining turmush sharoitlari ijobiy tomonga oʻzgargani bois, 2025 yining 1-yanvar holatiga “Yoshlar daftari”, “Ayollar daftari”, “Temir daftar” roʻyxatidagi fuqarolar mazkur daftarlardan toʻliq chiqarildi. Shayx qalʼa koʻchasida yashovchi Nurbek Jumatovning yashash uyi yonib ketganligi sababli homiylar va koʻni-qoʻshnilari tomonidan hovli-joyi hashar yoʻli bilan taʼmirlab berildi.

Oʻzbekiston Respublikasi Prezidentining “Mahalla institutining jamiyatdagi rolini tubdan oshirish va uning aholi muammolarini hal etishda birinchi boʻgʻin sifatida ishlashini taʼminlashga karatilgan chora-tadbirlar toʻgʻrisida”gi Farmonida belgilab berilgan vazifalarni amalga oshirish, qolaversa, ovul infratuzilmasini yanada rivojlantirish maqsadida ovulda 2025-yilda bajariladigan ishlar ham ayni paytda “Mahalla yettiligi” aʼzolarining eʼtibor markazidagi vazifaga aylangan.

Unga koʻra, Os ovul aholi punktiga oʻquvchilarning maktabga xavfsiz qatnashi uchun 900 metr, Chorvador aholi punktiga 300 metr masofadagi piyodalar yoʻlakchasini qurish, tadbirkorlikni yanada rivojlantirish, pillachilik sohasida kasanachilik faoliyatini keng joriy etish, ovul yoshlarini sport-sogʻlomlashtirish inshootlariga yanada koʻproq jalb qilish, toʻylar, oilaviy marosimlarni kamchiqim, isrofgarchiliklarsiz oʻtkazish, hududdagi umumtaʼlim maktablari bilan hamkorlikda kitobxon yoshlar safini oshirish, milliy-maʼnaviy qadriyatlarni mustahkamlashga qaratilgan kitobxonlik kechalari, taniqli yozuvchi va shoirlar bilan uchrashuvlar oʻtkazish rejalashtirilgan.

“Mahalla yettiligi” aʼzolarining Mahalla Kengashi aʼzolari hamda fuqarolar yigʻini komissiyalari bilan hamkorlikdagi faoliyati tufayli oʻtgan yil davomida ovul hududida huquqbuzarlik, jinoyatchilik, oilaviy ajrashishlar va oʻzaro nizolar umuman qayd etilmadi. Bundan ayonki, haqiqatdan ham choykoʻlliklar turmush tarzida osoyishtalik va xotirjamlik hokim. Biz buni tobora goʻzallashib, infratuzilmasi jadal rivojlanayotgan ovul qiyofasida koʻrib, yaqqol his etdik.

Robiya Yoʻldosheva.