Интернет туфайли тўкилган кўз ёш

XXI аср ахборот асри эканлиги ҳаммамизга маълум. Интернет бизга чексиз имкониятларни инъом этади. Бир сўз билан айтганда, дунё бўйичаўргимчак тўри, дея таърифланаётган интернет – чексиз-чегарасиз ахборот хазинасидир. У бизнинг олтиндан афзал вақтимизни тежаши билан тенг даражада уни оғирлаштираётганини, шу туфайли кўплаб муаммоларга сабаб бўлаётганини, ёшлар орасида турли маънавиятимизга ёт бўлган иллатларнинг тез суръатларда тарқалаётганини ҳам унутмаслигимиз керак. Интернетдан фойдаланишда маълум бир чегара чизиқларидан ўтмаган ҳолда, оқилона иш тутишимиз зарур, деб ўйлайман. Тун-у кун "агент”, "одноклассники” каби мулоқот воситаларидан фойдаланувчи ёшлар сафи янада ортиб бормоқда.

Сўзимнинг далили сифатида ушбу ҳаётий воқеани мисол келтирмоқчиман. Бир куни бозордан қайтаётгандим. Кун иссиқ, ҳамма уйига ошиқмоқда. Машина энди юраётган ҳам эдики, йиғидан кўзлари қизариб кетган чиройли қиз, ёнида эса 12 ёшлар чамаси синглисибилан орқа ўриндиққа ўтирди. Ҳамманинг эътибори шу қизларда. Маршрут такси жойидан қўзғалди ҳамки, қиз йиғидан тўхтамасди. Шунда ёши каттароқ опалардан бири ҳол сўраб, қизни юпатган бўлди. Қиз йиғидан тўхтамагач, ўша опа кичикина қизчадан опасига нима бўлганини сўраб, ҳеч қаери оғримаётганмикан, деб хавотирлана бошлади. Шунда синглиси: "йўқ опамнинг ҳеч қаери оғримаяпти, фақат уни бир йигит хафа қилди, шунга йиғлаяпти”, - деди ва бўлган воқеани айта бошлади. Айтишича, опаси "одноклассники”да бир йигит билан танишиб, уни ёқтириб қолган экан, улар бир-бирларини кўрмасдан деярли 1 йилдан буён телефон орқали гаплашиб юришган экан. Бугун эса интернет кўприги орқали танишган ошиқлар учрашишга қарор қилишган экан. Йигит ўртоқлари билан қизни кутиб турганида, узоқдан 16 ёшли, юзлари оппоққина, жуда чиройли қизга кўзи тушади. Бу орада қиз уларнинг ёнига етиб келади. Қизнинг саломлашиш учун узатган қўлига назар солган йигитнинг ранги ўзгариб, тузукроқ сўрашмай ҳам кетиб қолади. Чунки қизнинг қўлида куйишдан қолган доғ бор экан. Қиз эса зор йиғлаганча қолаверган.

Йўл бўйи ўйланиб бордим. Энди бу қизнинг ҳаёти қандай кечади? Ҳаётга ва муҳаббатга бўлган ишончини ким қайтаради? Унинг қўлидаги доғ вақт ўтиб, йўқолишига, унга халақит бермаслигига ким ишонтиради. Бу сизга оддий ҳолдек туюлаётган бўлиши мумкин. Аммо синган ёш кўнгилни қайта тиклаш мушкул эканлигини англаш қийин эмас. Мана шунга ўхшаш воқеалар кундалик ҳаётимизда тез-тез учраётганлигига сабаб - ёшлар тобора интернет аталмиш уммон тубига шўнғиётганидир. Дўстларим, келинг, интернетдан ўз ўрнида фойдаланайлик. Ота-онамиз ва атрофдагиларга қолаверса, жамиятга зиён етказадиган иллатлардан холи бўлайлик.

Муҳайё РАҲИМБОЕВА,

ҚДУ журналистика факультетининг 2-босқич талабаси.

(Фото - http://tech.uz)