Salomatning yutugʻi

Mamlakatimizda faoliyatyuritayotgan siyosiy partiyalar davlatimiz siyosatining ogʻishmay amalga oshirilishiga, tinchlik, osoyishtalikning barqaror boʻlishiga, har bir fuqaroning hayotda baxtiyor va farovon yashashiga erishishga, intellektual salohiyatini rivojlantirishga munosib hissa qoʻshib kelmoqda.

Oʻzbekiston "Milliy tiklanish” demokratik partiyasi yosh mutaxassis kadrlar uchun taʼsis etgan "Donolik va tashabbuskorlik-siyosiy yetakchilik mezoni” koʻrik-tanlovi ham shu maqsadga qaratilgan edi.

31-umumtaʼlim maktabining ona tili va adabiyoti fani oʻqituvchisi Salomat Eshchonova mazkur koʻrik-tanlovning tuman, Qoraqalpogʻiston respublikasi bosqichlarida barcha raqiblarini yengib, Oʻzbekiston Respublikasi bosqichida qatnashish huquqini qoʻlga kiritgan edi.

Yaqinda boʻlib oʻtgan yakuniy bosqichda ham Salomat muvaffaqiyatli qatnashib, tanlovning "Eng iqtidorli ishtirokchi” nominatsiyasi gʻolibi boʻldi.

2011-yilda Nukus Davlat Pedagogika institutini bitirib, mehnat faoliyatini boshlagan Salomat Eshchonovaning erishgan bu gʻalabasi butun tumanimiz uchun faxrdir.

- Tanlovdan olgan taassurotlarim bir umr yodimdan chiqmaydi, - deydi Salomat mamnun kulimsirab, - eng asosiysi, mamlakatimizda yoshlarning yetuk inson boʻlib voyaga yetishi, oʻz iqtidorini toʻla namoyon eta olishi uchun barcha sharoitlar muhayyo. Mening muvaffaqiyatlarim ham shularning natijasi.

Yoshlik – joʻshqin fasl. Yoshlik gʻayrat-shijoati bilan Salomat Eshchonova yangi-yangi yutuqlarni qoʻlga kiritadi, deb umid qilib qolamiz.

Oygul RAJABOVA.