Maʼnaviy boylik ham kerak

Bozor munosabatlariga oʻtilishi bilanoq katta-yu kichikda pul topishga – moddiy boyliklar egasi boʻlishga qiziqishning kuchayganligi bor haqiqat. Davr talabi ham shuni taqozo etmoqda. Ammo maʼnaviy boylik ham juda zarur. Moddiy va maʼnaviy boylik tarozining ikkipallasiga, elektr toki zaryadlariga oʻxshab ketadi nazarimizda.

Muhtaram Prezidentimiz I.A.Karimov barcha maʼruza va nutqlarida jamiyat taraqqiyotida maʼnaviyatning roli katta ekanligini qayta-qayta taʼkidlaydilar.

Sababi yosh avlod tarbiyasida, jamiyat rivojlanishida maʼnaviyatning, adabiyotning roli katta. Adabiyot esa matbuot, televideniye, radio orqali keng targʻib etiladi. Shu jumladan turli sanalarga bagʻishlab oʻtkaziladigan adabiy kecha, sheʼriyat kechasi hamda ijodkorlar mushoiralari vositasida ham.

Shu narsani alohida taʼkidlash joizki, tumanimizda adabiyotga va ijodiyotga qiziqish azaldan katta boʻlgan va ayni kunda ham bu qiziqish soʻngani yoʻq.

Barchamiz yaxshi bilamiz, oʻtgan asrning oʻrtalarida, 1957 yilning dekabr oyida Qoraqalpogʻiston Respublikasiga qarashli Qipchoq va Xorazm viloyatiga qarashli Mangʻit tumanlari birlashtirilib, yangi Amudaryo tumani tashkil etildi. Qipchoq tumanining "Sotsializm yoʻli” va Mangʻit tumanining "Stalinchi” ijtimoiy-siyosiy gazetalari tahririyatlari birlashtirilib, ikkala tuman qoʻshilganidan soʻng "Amudaryo haqiqati” gazetasi chop etila boshladi.

Nomlari tilga olingan gazetalar tumanimizda adabiyotga, ijodiyotga qiziquvchilarning paydo boʻlishi va saflari ortishida muhim ahamiyat kasb etdigina emas, balki ijod ahlining tajriba maktabiga aylandi.

Kezi kelganida tuman gazetasida oʻz vaqtida sheʼrlari bilan qatnashgan ijodkorlar nomini tilga olish maqsadga muvofiqdir. Bular rahmatli ustozlarimiz Sobir Yusupov, Yoʻldosh Qurboniy, Nurulla Xudoyorov, Yoʻldosh Jumaniyozov, Onnamurod Oyimbetov, Soat Qurbonboyev, Qodir Ollaberganov, Oʻrin Safariy, Tursunboy Davlatboyev, Bobojon Oʻrozmetovlar, shuningdek Boltaboy Bekbaulov, Bogʻdagul Ibrohimova, Gulgʻuncha kabilar. Ularning ijodlari namunalari yuqorida nomlari tilga olingan gazetalar sahifalarida abadiy muhrlanib qoldi.

Koʻp yillardan buyon ijod qilib kelayotgan ijodkorlar bor. Bular Jumaboy Bekchonov, Azim Rajabov, Xolboy Oʻrozmetov, Gulnora Matyoqubova, Hayitgul Yoʻldosheva, Salima Xolboyeva, Jongila Bobojonova, Bektemir Bekchonov, Xushnud Yoqubjonov, Madiyor Boltaboyev, Safarboy Onnamurodov, Xudoybergan Jumamurodov, Xudoybergan Saidmurodov, Farhod Avezov, Ahmad Nafasov, Jumaboy Hidoyatov, Tursunboy Abdullayev, Xonimjon Rajabova, Oygul Rajabova, Robiya Yoʻldosheva, Sanobar Xoʻjamurodova, Zebo Rajabova, Zulfiya Olloyorova, Bahodir Jumamurodov, Oʻlmasbek Xoʻjayev, Tojiboy Doʻsanov, Jabborbergan Qurbonboyevlar.

Keyingi ikki yil ichida tuman miqyosida rahmatlik jurnalist va shoirlar, ustozlarimiz Sobir Yusupov va Tursunboy Davlatboyevlarning yubileylari munosabati bilan xotira kechalarini oʻtkazdik. Shuningdek 4-marta ijodkorlarimizning sheʼriyat va mushoira kechalarini ham tashkil qildik. Bu tadbirlarning barchasi fuqarolarimiz, ayniqsa yoshlarimizning maʼnaviy hayotini boyitishga xizmat etmoqda, deb aytsak haqlimiz.

Moddiy boylik bilan birgalikda barchamizga maʼnaviy boylik ham kerak. Bu muhim ishda tumanimizda katta-yu kichik ijodkorlarimiz bundan keyin ham faol qatnashadilar, ijodiy mehnat mevalarini kitob holiga keltirib nashr qildirishib, adabiyot ixlosmandlariga sovgʻa etishadi, deb umid qilamiz.

Orzuga ayb yoʻq, deyishadi. Tuman ijodkorlarini birlashtiruvchi adabiy uyushma tuzish hamda barcha ijodkorlarning sheʼr va hikoyalarini toʻplab, kitob holida nashr ettirish niyatlarimiz ham bor. Shuningdek rejalashtirib qoʻygan boshqa adabiy-badiiy tadbirlarimiz ham yuksak maʼnaviyat saboqlarini berishiga ishonamiz. Axir, maʼnaviy boylikhech bir toʻfonlar vayron qila olmaydigan, birov zoʻrlik bilan tortib ololmaydigan eng buyuk xazinadir. Chunki bu xazina har birimizning yuragimizdadir.

Saʼdulla XOʻJANIYoZOV,

Qoraqalpogʻistonda xizmat koʻrsatgan jurnalist.