FUQAROLAR MUROJAATLARI: u albatta oʻrganilishi kerak

Har bir shaxs bevosita oʻzi va boshqalar bilan birgalikda vakolatli davlat organlariga, muassasalariga yoki xalq vakillariga ariza, taklif va shikoyatlar bilan murojaat qilish huquqiga ega.

Oʻzbekiston Respublikasi Konstitutsiyasining

35-moddasidan.

Tuman hokimligida Oʻzbekiston Respublikasi, Qoraqalpogʻiston Respublikasi Qonunlariga asosan fuqarolarning murojaatlarini belgilangan muddatlarda koʻrib chiqish, ariza mualliflariga oʻz vaqtida javoblarni berish boʻyicha bir qator amaliy ishlar olib borilmoqda.

2013-yilning 9 oyida tuman hokimligiga fuqarolardan 95 ta shikoyat mazmunidagi, 316 ta shikoyat mazmuniga ega boʻlmagan yozma murojaatlar kelib tushdi. Murojaatlar Qonun talablari asosida roʻyxatdan oʻtkazilib, ijrochilarga oʻz vaqtida yetkazildi va belgilangan muddatlarda qarab chiqilib, arizagoʻylarga tegishli javoblar berildi.

Tuman hokimi va uning oʻrinbosarlari tomonidan 145 nafar fuqarolar uy-joy qurishga yer olish, bank, kredit, nafaqa olish, moddiy yordam tayinlash, oila va boshqa masalalarda qabul qilindi.

Joriy yilda fuqarolarning murojaatlari bilan ishlashish ahvoli tegishli organlar, korxona va tashkilotlar rahbarlari, fuqarolarning oʻzini-oʻzi boshqarish organlari masʼul xodimlari ishtirokidagi yigʻilishlarda uch marotaba muhokama qilindi. Shuningdek, joriy yilda tuman Davlat soliq inspektsiyasi, «Shimolgaztaʼminot» unitar korxonasi tuman filiali, «Mangʻit pochta» korxonasida ijro intizomi va fuqarolarning murojaatlari bilan ishlash ahvoli oʻrganilib, tahliliy maʼlumotlar tayyorlandi.

Hokimlikda kelib tushgan murojaatlarning har oylik, choraklik tahlillari olib borildi, tahlillar yuzasidan chora-tadbirlar belgilandi, tegishli qarorlar qabul qilindi.

Tuman hokimligi tomonidan fuqarolarning oʻzini-oʻzi boshqarish organlarida fuqarolar bilan uchrashuvlar oʻtkazish, mavjud muammolarni joylarning oʻzida bartaraf qilish ishlari yetarlicha tashkil etilganligi, tushuntirish ishlari vaqtida olib borilganligi natijasida "Oʻrta qalʼa”, Bobur, Amir Temur nomli ovul fuqarolar yigʻinlari, "Olmazor”, "Yangiobod” mahalla fuqarolar yigʻinlari hududlarida yashovchi fuqarolardan shikoyat arizalar sonining kamayishiga erishildi.

Mamlakatimiz Prezidenti I.A.Karimovning 2012-yil 16 martda Xalq deputatlari Toshkent shahar Kengashining navbatdan tashqari sessiyasida qilgan maʼruzasida fuqarolarning murojaatlari bilan ishlash ahvoli tanqid etilganligi bejiz emas.

«..Har qaysi murojaatning ortida tirik jon turibdi, ularda kimningdir arz-dodi, kerak boʻlsa, dardi, ayrim amaldorlar tomonidan yoʻl qoʻyilgan adolatsizlik turganini hech qachon unutmaslik lozim. Bu masalalar boʻyicha biz qancha loqayd va betaraf boʻlib yursak, odamlarning noroziligi shuncha koʻpayadi. Takror aytaman, yuzaga kelgan biron-bir muammo oʻz-oʻzidan hal boʻladi, degan kayfiyat bilan yurish juda katta xato boʻladi. Agarki har qaysi rahbar, yetakchi oʻzi duch kelgan muammoni bugun yechmasa, ertaga kech boʻladi. Rahbarning asosiy burchi va vazifasi ham aynan shundan iborat.

Yana bir masala shuki, bunday murojaatlarni koʻrib chiqayotganda, arizalarni joylarga borib tekshirayotganda, birinchi navbatda kimga suyanish kerak? Avvalombor, jamoatchilikka, mahalla faollariga. Shuning uchun ham bunday murojaatlarni joylarda qancha koʻp ochiq, oshkora muhokama qiladigan boʻlsak, ularning yechimi boʻyicha amaliy choralar koʻradigan boʻlsak, ariza va shikoyatlarning soni shuncha kamayadi. Qaysi bir shikoyatda haqiqat, qaysi birida esa shaxsiy adovat borligi aynan shunday muhokamalar paytida ayon boʻladi».

Murojaatlarni adolatli, xolisona, oʻz muddatlarida va qonuniy yechish har bir masʼul xodimning asosiy vazifasidir. Bu borada tumanimizdagi oʻzini-oʻzi boshqarish organlari, korxona va tashkilotlar rahbarlari, masʼul xodimlarning joylarda fuqarolar bilan uchrashuvlarini yanada koʻproq tashkil etishlariga, ular tomonidan aynan qaysi masalalarda muammolar hosil boʻlayotganligini chuqur oʻrganishlariga, ushbu muammolarni joyning oʻzida hal etish choralarini koʻrishlariga, hal etilishida qiyinchiliklar boʻlayotgan masalalar yuzasidan tuman hokimligiga maʼlumotlar taqdim etib borishlariga erishmogʻimiz zarur.

Agarda shu kabi ishlarni birgalikda, bir yoqadan bosh chiqarib amalga oshira olsak, murojaatlar sonini kamaytirish, fuqarolarning murojaatlaridagi muammolarni oʻz vaqtida yechish ishlarini yanada samaraliroq yoʻlga qoʻya olamiz.

A.Xoʻjamurodov,

tuman hokimligi devonxonasi mudiri.