ФУҚАРОЛАР МУРОЖААТЛАРИ: у албатта ўрганилиши керак

Ҳар бир шахс бевосита ўзи ва бошқалар билан биргаликда ваколатли давлат органларига, муассасаларига ёки халқ вакилларига ариза, таклиф ва шикоятлар билан мурожаат қилиш ҳуқуқига эга.

Ўзбекистон Республикаси Конституциясининг

35-моддасидан.

Туман ҳокимлигида Ўзбекистон Республикаси, Қорақалпоғистон Республикаси Қонунларига асосан фуқароларнинг мурожаатларини белгиланган муддатларда кўриб чиқиш, ариза муаллифларига ўз вақтида жавобларни бериш бўйича бир қатор амалий ишлар олиб борилмоқда.

2013 йилнинг 9 ойида туман ҳокимлигига фуқаролардан 95 та шикоят мазмунидаги, 316 та шикоят мазмунига эга бўлмаган ёзма мурожаатлар келиб тушди. Мурожаатлар Қонун талаблари асосида рўйхатдан ўтказилиб, ижрочиларга ўз вақтида етказилди ва белгиланган муддатларда қараб чиқилиб, аризагўйларга тегишли жавоблар берилди.

Туман ҳокими ва унинг ўринбосарлари томонидан 145 нафар фуқаролар уй-жой қуришга ер олиш, банк, кредит, нафақа олиш, моддий ёрдам тайинлаш, оила ва бошқа масалаларда қабул қилинди.

Жорий йилда фуқароларнинг мурожаатлари билан ишлашиш аҳволи тегишли органлар, корхона ва ташкилотлар раҳбарлари, фуқароларнинг ўзини-ўзи бошқариш органлари масъул ходимлари иштирокидаги йиғилишларда уч маротаба муҳокама қилинди. Шунингдек, жорий йилда туман Давлат солиқ инспекцияси, «Шимолгазтаъминот» унитар корхонаси туман филиали, «Манғит почта» корхонасида ижро интизоми ва фуқароларнинг мурожаатлари билан ишлаш аҳволи ўрганилиб, таҳлилий маълумотлар тайёрланди.

Ҳокимликда келиб тушган мурожаатларнинг ҳар ойлик, чораклик таҳлиллари олиб борилди, таҳлиллар юзасидан чора-тадбирлар белгиланди, тегишли қарорлар қабул қилинди.

Туман ҳокимлиги томонидан фуқароларнинг ўзини-ўзи бошқариш органларида фуқаролар билан учрашувлар ўтказиш, мавжуд муаммоларни жойларнинг ўзида бартараф қилиш ишлари етарлича ташкил этилганлиги, тушунтириш ишлари вақтида олиб борилганлиги натижасида "Ўрта қалъа”, Бобур, Амир Темур номли овул фуқаролар йиғинлари, "Олмазор”, "Янгиобод” маҳалла фуқаролар йиғинлари ҳудудларида яшовчи фуқаролардан шикоят аризалар сонининг камайишига эришилди.

Мамлакатимиз Президенти И.А.Каримовнинг 2012 йил 16 мартда Халқ депутатлари Тошкент шаҳар Кенгашининг навбатдан ташқари сессиясида қилган маърузасида фуқароларнинг мурожаатлари билан ишлаш аҳволи танқид этилганлиги бежиз эмас.

«..Ҳар қайси мурожаатнинг ортида тирик жон турибди, уларда кимнингдир арз-доди, керак бўлса, дарди, айрим амалдорлар томонидан йўл қўйилган адолатсизлик турганини ҳеч қачон унутмаслик лозим. Бу масалалар бўйича биз қанча лоқайд ва бетараф бўлиб юрсак, одамларнинг норозилиги шунча кўпаяди. Такрор айтаман, юзага келган бирон-бир муаммо ўз-ўзидан ҳал бўлади, деган кайфият билан юриш жуда катта хато бўлади. Агарки ҳар қайси раҳбар, етакчи ўзи дуч келган муаммони бугун ечмаса, эртага кеч бўлади. Раҳбарнинг асосий бурчи ва вазифаси ҳам айнан шундан иборат.

Яна бир масала шуки, бундай мурожаатларни кўриб чиқаётганда, аризаларни жойларга бориб текшираётганда, биринчи навбатда кимга суяниш керак? Авваломбор, жамоатчиликка, маҳалла фаолларига. Шунинг учун ҳам бундай мурожаатларни жойларда қанча кўп очиқ, ошкора муҳокама қиладиган бўлсак, уларнинг ечими бўйича амалий чоралар кўрадиган бўлсак, ариза ва шикоятларнинг сони шунча камаяди. Қайси бир шикоятда ҳақиқат, қайси бирида эса шахсий адоват борлиги айнан шундай муҳокамалар пайтида аён бўлади».

Мурожаатларни адолатли, холисона, ўз муддатларида ва қонуний ечиш ҳар бир масъул ходимнинг асосий вазифасидир. Бу борада туманимиздаги ўзини-ўзи бошқариш органлари, корхона ва ташкилотлар раҳбарлари, масъул ходимларнинг жойларда фуқаролар билан учрашувларини янада кўпроқ ташкил этишларига, улар томонидан айнан қайси масалаларда муаммолар ҳосил бўлаётганлигини чуқур ўрганишларига, ушбу муаммоларни жойнинг ўзида ҳал этиш чораларини кўришларига, ҳал этилишида қийинчиликлар бўлаётган масалалар юзасидан туман ҳокимлигига маълумотлар тақдим этиб боришларига эришмоғимиз зарур.

Агарда шу каби ишларни биргаликда, бир ёқадан бош чиқариб амалга ошира олсак, мурожаатлар сонини камайтириш, фуқароларнинг мурожаатларидаги муаммоларни ўз вақтида ечиш ишларини янада самаралироқ йўлга қўя оламиз.

А.Хўжамуродов,

туман ҳокимлиги девонхонаси мудири.