Tumanimiz fermerlari qasamyod qildi

Mustaqillik yillarida mamlakatimiz agrar sohasiga jiddiy eʼtibor qaratilayotgani bois, soha xodimlari, ayniqsa, dehqon va fermerlarning yerga munosabati tubdan oʻzgardi, qishloq xoʻjalik mahsulotlari yetishtirish borasidagi tajribalari yanada takomillashib, dehqonning qadr-qimmati oshdi. Prezidentimizning Farmoni bilan har yili 10-dekabr sanasi qishloq xoʻjalik xodimlari kuni sifatida nishonlanishi esa soha xodimlarining gʻayratiga-gʻayrat qoʻshdi.

Tumanimizda ham mehnatidan qadr topib, el-yurt, ona Vatan oldida yuzlari hamisha yorugʻ, lafzi halol shijoatli fermer va ijarachi dehqonlar yerni suyib, ardoqlab har yili moʻl hosil yetishtirayotganlari bois, xalqimizning dasturxonlari toʻkin, rizq-u nasibalari ulugʻ. Ayniqsa, gʻallachilik sohasida fermerlarimiz uygan xirmonlar hamisha baland.

Ayni paytda tumanimizdagi 18 ta MMTPlar xizmat koʻrsatadigan 423 ta fermer xoʻjaliklarida 3350 gektar maydonga ekilgan kuzgi bugʻdoy baravj rivojlanmoqda. Ushbu maydonlarda yetishtiriladigan 2019-yilgi gʻalla xirmonini 6695 tonnaga, hosildorlikni esa kamida 60-70 tsentnerga yetkazishni niyat qilgan mardi-maydon fermerlarimizning shahdi baland.

Yangi 2019-yilda gʻalladan moʻl hosil yetishtirishga azmu qaror qilgan tumanimiz fermerlari 15-noyabr kuni oʻz zimmalaridagi shartnoma-rejalarini sharaf bilan bajarish, lafzlarida hamisha sobit ekanliklarini hamda fermerlik sharafini fidoyi mehnatlari bilan oqlash va bu yoʻlda shon-u shavkatli dehqon degan ulugʻ nomlariga hamisha sodiqliklarini ifodalab, Vatanimiz taraqqiyotiga halol mehnatlari bilan munosib hissa qoʻshishni, hech qachon nopok ishlarga qoʻl urib xalqni, Vatanni aldamaslikni ezgu niyat qilib qasamyod qabul qildilar.

Qasamyod qabul qilish marosimlari tumanimizning uchta – Jumurtov, Qipchoq hamda Mangʻit hududlarida oʻtkazildi. Melioratsiya va suv xoʻjaligi kasb-hunar kolleji, Amudaryo Agrobiznes kasb-hunar kolleji hamda Mangʻit Iqtisodiyot kollejlari binolarida boʻlib oʻtgan ushbu marosimlarda Oʻzbekiston bayrogʻi qarshisida qasamyod qabul qilgan fermerlar 2019-yil hosili uchun davlat ehtiyojlariga gʻalla yetishtirishda barcha agrotexnik tadbirlarni oʻz vaqtida oʻtkazish orqali har gektar hisobiga hosildorlikni 60-70 tsentnerga yetkazishga, oʻz ahdlarida sobit turishga chin dildan vaʼda berdilar.

P.YOʻLDOShEVA.