Ochiq sayyor sud majlisida byudjet mablagʻlarini talon-toroj qilish holati koʻrib chiqildi

Korruptsiya va mansab vakolatlaridan noqonuniy foydalanishga qarshi kurashish bugungi kunda davlat siyosatining ustuvor yoʻnalishlaridan biri boʻlib qolmoqda. Ayniqsa, byudjet mablagʻlarining maqsadli sarflanishi, aholiga koʻrsatilayotgan ijtimoiy xizmatlarda qonuniylik va shaffoflikni taʼminlash jamiyat hayotida muhim ahamiyat kasb etadi. Shu maqsadda joylarda oʻtkazilayotgan ochiq va sayyor sud majlislari nafaqat qonun buzilish holatlariga huquqiy baho berish, balki aholi oʻrtasida korruptsiyaga nisbatan murosasiz munosabatni shakllantirishga ham xizmat qilmoqda.

Amudaryo tumanida ham ana shunday ochiq sayyor sud majlisi boʻlib oʻtdi. Jinoyat ishlari boʻyicha Amudaryo tuman sudi raisi Jasurbek Baltabayev boshchiligida tuman Tibbiyot birlashmasining maʼmuriy binosida tashkil etilgan majlisda autsorsing xizmati doirasida sodir etilgan qonunbuzilish holatlari koʻrib chiqildi.

Sudda aniqlanishicha, Tuman tibbiyot birlashmasining masʼul shaxslari bir guruh boʻlib harakat qilgan holda, sogʻliqni saqlash tizimida autsorsing xizmatlari koʻrsatish tartibiga oid meʼyoriy hujjatlarda nazarda tutilgan 20 foizlik ustama haqi shartlarini asos qilib, tumanda faoliyat yurituvchi masʼuliyati cheklangan jamiyatlaridan biri tomonidan yuborilgan hisob-kitoblar asosida ortiqcha mablagʻ oʻtkazilishiga yoʻl qoʻygan.

Hujjatlarga koʻra, 2024-yil sentyabridan 2025-yil mart oyigacha boʻlgan davrda bemorlarga koʻrsatilgan ovqatlanish xizmati uchun amalda 1 milliard 224 million 387 ming soʻm miqdorida toʻlov amalga oshirilishi lozim boʻlgan. Biroq hisob-kitoblar 20 foizgacha ustama qoʻshilgan holda rasmiylashtirilib, jami 1 milliard 325 million 444 ming 657 soʻm mablagʻ ajratilgan. Oqibatda 101 million 56 ming 931 soʻm byudjet mablagʻi rastrata yoʻli bilan talon-toroj qilingan.

Sud qaroriga koʻra, tuman Tibbiyot birlashmasining tegishli mansabdor shaxslari Oʻzbekiston Respublikasi Jinoyat kodeksining 167-moddasi 2-qismi “v” hamda “g” bandlarida nazarda tutilgan jinoyatni sodir etganlikda aybli deb topildi. Aybdorlar Jinoyat Kodeksining 70-moddasiga asosan chin koʻngildan pushaymonligi va yetkazilgan zararni qoplagani sababli jazo tayinlanmasdan, jinoiy javobgarlikdan ozod qilindi.

Sayyor sud majlisi davomida ishtirokchilarga “Korruptsiyaga qarshi kurashish toʻgʻrisida”gi Qonunning mazmun-mohiyati ham keng tushuntirildi. Jumladan, korruptsiya tushunchasi, korruptsiyaga oid huquqbuzarlik, manfaatlar toʻqnashuvi kabi huquqiy atamalarning mazmuni ochib berildi. Shuningdek, qonuniylik, ochiqlik va shaffoflik, fuqarolar huquqlarining ustuvorligi, javobgarlikning muqarrarligi kabi tamoyillar korruptsiyaga qarshi kurashishning asosiy poydevori ekani taʼkidlandi.

Majlisda aholining huquqiy ongi va huquqiy madaniyatini oshirish, jamiyatda korruptsiyaga nisbatan murosasiz kayfiyatni shakllantirish, huquqbuzarliklar haqida xabar bergan shaxslarni himoya qilish masalalariga ham alohida eʼtibor qaratildi. Shu bilan birga, korruptsiyaga oid holatlar haqida ataylab yolgʻon axborot taqdim etgan shaxslar ham qonun oldida javob berishi qayd etildi.

Bunday ochiq sud jarayonlari jamiyatda adolat tamoyilini mustahkamlash, davlat mablagʻlarining talon-toroj qilinishiga qarshi kurashish hamda har bir rahbar va masʼul xodimda qonun oldidagi masʼuliyat hissini kuchaytirishda muhim ahamiyat kasb etadi. Zero, korruptsiyaga qarshi kurashish — faqat huquqni muhofaza qiluvchi organlar emas, balki butun jamiyatning umumiy vazifasidir.

Jasurbek Baltabayev, Jinoyat ishlari boʻyicha Amudaryo tuman sudining raisi