Очиқ сайёр суд мажлисида бюджет маблағларини талон-торож қилиш ҳолати кўриб чиқилди

Коррупция ва мансаб ваколатларидан ноқонуний фойдаланишга қарши курашиш бугунги кунда давлат сиёсатининг устувор йўналишларидан бири бўлиб қолмоқда. Айниқса, бюджет маблағларининг мақсадли сарфланиши, аҳолига кўрсатилаётган ижтимоий хизматларда қонунийлик ва шаффофликни таъминлаш жамият ҳаётида муҳим аҳамият касб этади. Шу мақсадда жойларда ўтказилаётган очиқ ва сайёр суд мажлислари нафақат қонун бузилиш ҳолатларига ҳуқуқий баҳо бериш, балки аҳоли ўртасида коррупцияга нисбатан муросасиз муносабатни шакллантиришга ҳам хизмат қилмоқда.

Амударё туманида ҳам ана шундай очиқ сайёр суд мажлиси бўлиб ўтди. Жиноят ишлари бўйича Амударё туман суди раиси Жасурбек Балтабаев бошчилигида туман Тиббиёт бирлашмасининг маъмурий биносида ташкил этилган мажлисда аутсорсинг хизмати доирасида содир этилган қонунбузилиш ҳолатлари кўриб чиқилди.

Судда аниқланишича, Туман тиббиёт бирлашмасининг масъул шахслари бир гуруҳ бўлиб ҳаракат қилган ҳолда, соғлиқни сақлаш тизимида аутсорсинг хизматлари кўрсатиш тартибига оид меъёрий ҳужжатларда назарда тутилган 20 фоизлик устама ҳақи шартларини асос қилиб, туманда фаолият юритувчи масъулияти чекланган жамиятларидан бири томонидан юборилган ҳисоб-китоблар асосида ортиқча маблағ ўтказилишига йўл қўйган.

Ҳужжатларга кўра, 2024 йил сентябридан 2025 йил март ойигача бўлган даврда беморларга кўрсатилган овқатланиш хизмати учун амалда 1 миллиард 224 миллион 387 минг сўм миқдорида тўлов амалга оширилиши лозим бўлган. Бироқ ҳисоб-китоблар 20 фоизгача устама қўшилган ҳолда расмийлаштирилиб, жами 1 миллиард 325 миллион 444 минг 657 сўм маблағ ажратилган. Оқибатда 101 миллион 56 минг 931 сўм бюджет маблағи растрата йўли билан талон-торож қилинган.

Суд қарорига кўра, туман Тиббиёт бирлашмасининг тегишли мансабдор шахслари Ўзбекистон Республикаси Жиноят кодексининг 167-моддаси 2-қисми “в” ҳамда “г” бандларида назарда тутилган жиноятни содир этганликда айбли деб топилди. Айбдорлар Жиноят Кодексининг 70-моддасига асосан чин кўнгилдан пушаймонлиги ва етказилган зарарни қоплагани сабабли жазо тайинланмасдан, жиноий жавобгарликдан озод қилинди.

Сайёр суд мажлиси давомида иштирокчиларга “Коррупцияга қарши курашиш тўғрисида”ги Қонуннинг мазмун-моҳияти ҳам кенг тушунтирилди. Жумладан, коррупция тушунчаси, коррупцияга оид ҳуқуқбузарлик, манфаатлар тўқнашуви каби ҳуқуқий атамаларнинг мазмуни очиб берилди. Шунингдек, қонунийлик, очиқлик ва шаффофлик, фуқаролар ҳуқуқларининг устуворлиги, жавобгарликнинг муқаррарлиги каби тамойиллар коррупцияга қарши курашишнинг асосий пойдевори экани таъкидланди.

Мажлисда аҳолининг ҳуқуқий онги ва ҳуқуқий маданиятини ошириш, жамиятда коррупцияга нисбатан муросасиз кайфиятни шакллантириш, ҳуқуқбузарликлар ҳақида хабар берган шахсларни ҳимоя қилиш масалаларига ҳам алоҳида эътибор қаратилди. Шу билан бирга, коррупцияга оид ҳолатлар ҳақида атайлаб ёлғон ахборот тақдим этган шахслар ҳам қонун олдида жавоб бериши қайд этилди.

Бундай очиқ суд жараёнлари жамиятда адолат тамойилини мустаҳкамлаш, давлат маблағларининг талон-торож қилинишига қарши курашиш ҳамда ҳар бир раҳбар ва масъул ходимда қонун олдидаги масъулият ҳиссини кучайтиришда муҳим аҳамият касб этади. Зеро, коррупцияга қарши курашиш — фақат ҳуқуқни муҳофаза қилувчи органлар эмас, балки бутун жамиятнинг умумий вазифасидир.

Жасурбек Балтабаев, Жиноят ишлари бўйича Амударё туман судининг раиси