Туманимиз фермерлари қасамёд қилди

Мустақиллик йилларида мамлакатимиз аграр соҳасига жиддий эътибор қаратилаётгани боис, соҳа ходимлари, айниқса, деҳқон ва фермерларнинг ерга муносабати тубдан ўзгарди, қишлоқ хўжалик маҳсулотлари етиштириш борасидаги тажрибалари янада такомиллашиб, деҳқоннинг қадр-қиммати ошди. Президентимизнинг Фармони билан ҳар йили 10 декабрь санаси қишлоқ хўжалик ходимлари куни сифатида нишонланиши эса соҳа ходимларининг ғайратига-ғайрат қўшди.

Туманимизда ҳам меҳнатидан қадр топиб, эл-юрт, она Ватан олдида юзлари ҳамиша ёруғ, лафзи ҳалол шижоатли фермер ва ижарачи деҳқонлар ерни суйиб, ардоқлаб ҳар йили мўл ҳосил етиштираётганлари боис, халқимизнинг дастурхонлари тўкин, ризқ-у насибалари улуғ. Айниқса, ғаллачилик соҳасида фермерларимиз уйган хирмонлар ҳамиша баланд.

Айни пайтда туманимиздаги 18 та ММТПлар хизмат кўрсатадиган 423 та фермер хўжаликларида 3350 гектар майдонга экилган кузги буғдой баравж ривожланмоқда. Ушбу майдонларда етиштириладиган 2019 йилги ғалла хирмонини 6695 тоннага, ҳосилдорликни эса камида 60-70 центнерга етказишни ният қилган марди-майдон фермерларимизнинг шаҳди баланд.

Янги 2019 йилда ғалладан мўл ҳосил етиштиришга азму қарор қилган туманимиз фермерлари 15 ноябрь куни ўз зиммаларидаги шартнома-режаларини шараф билан бажариш, лафзларида ҳамиша собит эканликларини ҳамда фермерлик шарафини фидойи меҳнатлари билан оқлаш ва бу йўлда шон-у шавкатли деҳқон деган улуғ номларига ҳамиша содиқликларини ифодалаб, Ватанимиз тараққиётига ҳалол меҳнатлари билан муносиб ҳисса қўшишни, ҳеч қачон нопок ишларга қўл уриб халқни, Ватанни алдамасликни эзгу ният қилиб қасамёд қабул қилдилар.

Қасамёд қабул қилиш маросимлари туманимизнинг учта – Жумуртов, Қипчоқ ҳамда Манғит ҳудудларида ўтказилди. Мелиорация ва сув хўжалиги касб-ҳунар коллежи, Амударё Агробизнес касб-ҳунар коллежи ҳамда Манғит Иқтисодиёт коллежлари биноларида бўлиб ўтган ушбу маросимларда Ўзбекистон байроғи қаршисида қасамёд қабул қилган фермерлар 2019 йил ҳосили учун давлат эҳтиёжларига ғалла етиштиришда барча агротехник тадбирларни ўз вақтида ўтказиш орқали ҳар гектар ҳисобига ҳосилдорликни 60-70 центнерга етказишга, ўз аҳдларида собит туришга чин дилдан ваъда бердилар.

P.ЙЎЛДОШЕВА.