MOʻL HOSILGA PUXTA ZAMIN YaRATILMOQDA

Mustaqillik yillarida mamlakatimizda oziq-ovqat mahsulotlarini yetishtirishga katta eʼtibor berildi. Ayniqsa, rizq-roʻzimiz manbai hisoblangan gʻallachilik jadal surʼatlar bilan rivojlandi.

Bir necha yildirki, tumanimizda faoliyat koʻrsatayotgan 400 dan ziyod fermer xoʻjaliklari jami 3000 gektar maydonda gʻalla yetishtirib keladi. Fermer xoʻjaliklari rahbarlarining dehqonchilik sir-sinoatlarini oʻrganishdagi harakatlari ularning bu boradagi tajribalarining oshishiga omil boʻlayapti. Shu boisdan ham ularning koʻpchiligi gʻalla hosildorligini 60-70 foizga koʻtarishga muvaffaq boʻlmoqdalar.

Bu yil tumanimizda faoliyat koʻrsatayotgan 423 ta fermer xoʻjaliklarida dastlab 3000 gektar maydonga kuzgi bugʻdoy ekildi. Shundan keyin yana mavjud imkoniyatlar oʻrganib chiqilib, tuman hokimining shu yil 5-oktyabrdagi 602-sonli qaroriga asosan 350 gektar maydonga qoʻshimcha ravishda gʻalla ekish belgilandi.

Hozirgi kunga tumanda jami ekilgan kuzgi bugʻdoy 3350 gektarni tashkil etadi.

Ayni kunda tumanda bugʻdoy ekilgan dalalarga mahalliy oʻgʻit tashib chiqarish ishlari qizgʻin davom etayapti. Bu ishda “Mangʻit don” filiali, “QR Agrokimyohimoya” AJ tuman filiali va tuman Veterinariya boʻlimi jamoalari barakali mehnat qilmoqdalar. Shu kungacha “Mangʻit don” filiali tomonidan 5025 tonna, “QR Agrokimyohimoya” AJ tuman filiali tomonidan 5025 tonna va tuman Veterinariya boʻlimi tomonidan 1675 tonna mahalliy oʻgʻit jamgʻarildi.

Shu kunlarda gʻalla ekilgan maydonlarni sugʻorish ishlari ham belgilangan rejaga muvofiq amalga oshirilmoqda. Unib chiqqan bugʻdoy maysalarini sharbatli suv bilan sugʻorish maqsadida har 3 gektar maydonda bittadan, jami 1115 ta handak tayyorlandi.

Sugʻorish ishlarini oʻz vaqtida va sifatli amalga oshirish maqsadida fermer xoʻjaliklaridan 600 nafar suvchi ajratildi va fermer xoʻjaliklariga amaliy yordam koʻrsatish maqsadida suv xoʻjaligi tashkilotlaridan 317 nafar, SIUlardan 35 nafar xodim masʼul qilib biriktirildi.

Ayni kunda kuzgi gʻalla ekilgan barcha dalalarimizda unib chiqqan bugʻdoy maysalarini parvarishlash ishlari yuksak agrotexnika qoidalari asosida amalga oshirilayapti.

Dehqonlarimizning bunday harakatlarini koʻrib, kelgusi yilda ham bugʻdoy xirmonlarimizning yanada yuksak boʻlishiga ishonchimiz ortadi, albatta.

Uyshin mahallasidagi “Nurulla Xidirov” fermer xoʻjaligida kelgusi yil hosili uchun 12 gektar yerga bugʻdoy ekilgan edi. Ayni kunlarda ushbu maydonlarda toʻliq nihol olindi va parvarishi boshlab yuborildi.

Suratda: mazkur fermer xoʻjaligi raisi Nurulla Xidirov (oʻngda) “Abdusobirov Madiyor“ fermer xoʻjaligi raisi M.Abdusobirov bilan bugʻdoy nihollarini koʻzdan kechirmoqda.

Allambergan JUMANIYoZOV.