QILIChBOYLIKLAR XIRMONI KUN SAYIN YuKSALMOQDA

“Qilichboy” muqobil mashina-traktor parki jami 2911 gektar ekin maydoniga ega 77 ta, shundan paxtachilik bilan shugʻullanadigan 44 ta fermer xoʻjaliklariga xizmat koʻrsatadi.

Mazkur xoʻjaliklarda joriy yilda 380 quti ipak qurti parvarishlanib, bu boradagi reja ortigʻi bilan bajarildi. 285 gektar bugʻdoy maydonidan ham yuqori hosil olindi.

Ayni kunlarda koʻklamda urugʻ ekilgan 1548 gektar paxta maydonlarida hosil yigʻim-terimi kun sayin avj olayapti.

Kuzakning qulay va iliq kunlaridan unumli foydalanib, terim mavsumini uyushqoqlik bilan oʻtkazayotgan “Nurimbetov Xudoybergan”, “Farhodov Ozodbek”, “Amirxon”, “Dushanbek Yoqubboyevich”, “Ulugʻbek Siytimov”, “Shirinbuloq” fermer xoʻjaliklarida yillik reja 110-120 foiz atrofida ado etildi. Shu kungacha bizning MMTP xizmat koʻrsatayotgan fermer xoʻjaliklarining 25 tadan ziyodi yillik shartnomaviy rejalarini ortigʻi bilan ado etishdi. Yuqori hosil yetishtirishga erishgan xoʻjaliklarning 1 mlrd. soʻmgacha daromad olishi kutilmoqda.

Qoʻlga kiritilayotgan bu natijalarda yerlarni ekishga tayyorlashdan tortib, unib chiqqan nihollarga oʻz vaqtida ishlov berib, to hosilini yigʻib-terib, davlat xirmoniga topshirishgacha boʻlgan jarayonlarda dehqonlarga qoʻl-qanot boʻlgan texnikaning roli ulkan.

Muqobil mashina-traktor parkimiz mexanizatorlari va ishchilari ayni kunda ham texnikalarning betoʻxtov ishlashlarini taʼminlab, terilgan paxtalarni oʻz vaqtida tashib berayapti.

Mehnat jamoamiz tumanimiz paxta xirmoni yuksalib, yillik rejasi ortigʻi bilan ado etilishiga oʻzlarining munosib hissalarini qoʻshish yoʻlida fidokorona mehnat qilishmoqda.

Yoqubboy AShIROV, “Qilichboy” MMTP raisi.