QILIChBOYLIKLAR NAVROʻZ BAYRAMINI KOʻTARINKI KAYFIYaTDA NIShONLAShDI

Navroʻz – yangilanish, yasharish ayyomi. Yurtimizga bahor fasli kirib kelishi bilan barcha hududlarda, el orasida Navroʻz shukuhi keza boshlaydi. Har gal orziqib kutadigan va katta xursandchilik, shodiyona bilan oʻtkazadigan Navroʻz bayrami hayot abadiyligi, tabiatning qudrati va cheksiz saxovatining, xalqimizning koʻp ming yillik milliy qiyofasi, olijanob urf-odatlarimizning betakror ifodasidir.

Barcha joylarda boʻlgani kabi Amudaryo tumanida ham Navroʻzi olam tantanalari keng nishonlanib, bayram tadbirlari barchaga koʻtarinki kayfiyat baxsh etdi.

23-mart kuni tumanning Qilichboy ovulida ham “Olam nurga toʻlsin sen bilan, Navroʻz!” shiori ostida joʻshqinlik bilan oʻtkazilgan bayram sayli koʻngillarga bahoriy iliqlik va goʻzallik olib kirdi.

Bayram saylida Oʻzbekiston mahallalar uyushmasi tuman boʻlimi boshligʻi Bahrom Qodirov, fuqarolar yigʻini raisi vazifasini vaqtincha bajaruvchi Amina Yusupova hamda boshqa masʼullar, hududdagi maktablar, maktabgacha taʼlim tashkilotlari jamoalari qatnashishdi.

Sayilgoh bayram tomosha qilish uchun kelgan ovuldagi katta-yu kichik aholi, yoshlar, otaxonu-onaxonlar bilan toʻldi. Azaliy urf-odatlarimizga muvofiq sayilgohda dasturxonlar bezatilib, bahoriy taomlar, shirmoy kulchalar-u patirlar, sumalak tortildi. Koʻklam goʻzalligiga mos atlas-u adras kiygan qizlar oʻzbekona odatlarga binoan kelinsalomlar bilan kelganlarni kutib oldilar.

Sayilga kelganlar maktab va maktabgacha taʼlim tashkilotlari, koʻchalar faollari tomonidan tashkil etilgan milliy taomlar koʻrgazmasini zavq bilan tomosha qilishdi. Ularga milliy taomlar, Navroʻzning shoh taomi – sumalaklar tortiq qilindi.

Tadbirni ochib berish uchun soʻzga chiqqan Oʻzbekiston mahallalar uyushmasi tuman boʻlimi boshligʻi Bahrom Qodirov barcha qilichboyliklarni bayram bilan tabrikladi va bayram arafasida ovul hududida har bir xonadon, koʻchalar obodonlashtirilib, koʻchatlar oʻtqazilgani, qishloq mutlaqo yangicha qiyofa kasb etgani, bemorlar, koʻmakka muhtojlar holidan xabar olingani haqida soʻzladi.

Shuningdek, soʻzga chiqqan boshqa masʼullar ham ovul ahlini bayram bilan tabrikladi va dehqonlar eli boʻlgan Qilichboyning mehnatkash bobodehqonlari yuksak xirmon umidida allaqachon dalaga chiqib, ishga kirishgani, dastlabki qadalgan urugʻlar unib chiqa boshlaganini aytib, baraka tiladilar.

Shundan soʻng, ovuldagi Qilichboy madaniyat markazi tomonidan hududdagi 15-, 83-, 69-sonli maktablar va 22-, 27-sonli maktabgacha taʼlim tashkilotlari bilan hamkorlikda tayyorlangan musiqiy dastur namoyish etildi. Dastur davomida turli xalq va sport oʻyinlari, lapar-u aytishuvlar, ayniqsa, boqiy qadriyatlarimizni namoyish etishga keng oʻrin berildi.

Markazdagi badiiy havaskorlik toʻgaragi aʼzolari, maktablar oʻquvchilari, maktabgacha taʼlim tashkilotlari tarbiyalanuvchilarining chiqishlari, ijro etilgan xalq ogʻzaki ijodi termalaridan namunalar, ona-Vatanni, tinchlikni, obod va ozod yurtimizni madh etuvchi kuy-qoʻshiqlar barchaga quvonch ulashdi. Dasturdan oʻrin olgan turli tomoshalar, sport oʻyinlari, milliy kurash va arqon tortishish oʻyinlari ham barchaga manzur boʻldi.

Sayilda qatnashgan qilichboyliklar mana shunday ulkan shodiyonalarga yoʻl ochib bergan, elimizni taraqqiyotning yorqin yoʻliga olib chiqqan istiqlolga shukronalar aytdilar. Bunday tantanavor kunlarning bardavom boʻlishini tilab, duoga qoʻl ochdilar.

“Olam nurga toʻlsin sen bilan, Navroʻz!” shiori ostida oʻtkazilib, har bir kishining ruhiyatini yangilagan shu kungi Navroʻz sayli butun ovulga oʻzgacha tarovat baxsh etdi.

O.Xudoyberganova.