SOʻZ – MARRAGA YeTGANLARGA

Bu yilgi paxta yigʻim-terim mavsumini paxtakor dehqonlar oʻzgacha kayfiyatda, koʻtarinki ruhda boshladilar. Ovul va mahallalarda istiqomat qiluvchi aholi vakillari tashabbus koʻrsatib, koʻngillilardan iborat hasharchilar guruhlarini tuzdilar. Bu tashabbusni xatto Mangʻit shahri, Qipchoq va Jumurtov shaharchalari fuqarolar yigʻinlari ahli ham qoʻllab-quvvatlashdi. Qangli va Qipchoq MMTP tarkibidagi fermer xoʻjaliklari dalalarida ham ana shunday tashabbuskorlar harakatiga qoʻshilgan oʻnlab koʻngilli hasharchilar guruhlari yetishtirilgan hosilni yigʻib, terib olishda paxtakorlarga yaqindan yordam berishmoqda. Natijada koʻplab ilgʻor fermer xoʻjaliklari shartnoma-rejalarini muddatidan ilgari bajarib, majburiyat hisobiga paxta topshirishmoqda.

Bizning bugungi suhbatdoshlarimiz kun sayin marraga yaqinlashayotgan va marradan oshgan ilgʻor fermer xoʻjaliklari rahbarlari boʻlishdi.

Yoʻldosh Yeshniyozov, Qipchoq MMTP tarkibidagi “Yoʻldosh Yeshniyozov” fermer xoʻjaligi rahbari: - Erta bahorda 29 gektar yerga katta umidlar bilan baraka urugʻi qadadik. Gʻoʻza unib chiqqanidan to hosil pishib-yetilguncha butun oila aʼzolarimiz va xoʻjaligimiz ishchilari tinimsiz mehnat qilishdi. Bilasiz, gʻoʻza nihoyatda parvarishtalab ekin. Buni yaxshi bilgan ijarachilarimiz mavsum davomida barcha agrotexnika qoidalariga qatʼiy amal qilishdi. Koʻrib turibsiz, dalalarimizda moʻl hosil toʻplandi. Ayni kunda ovulimiz yoshlaridan iborat koʻngilli hasharchilar ijarachi-dehqonlarimizga yaqindan yordam berishmoqda. Bugungi kungacha shartnoma-rejamizda belgilangan 67 tonnalik xirmonning 60 tonnadan ziyodini tayyorladik. Dalalarimizda kuniga 2400-2500 kilogramm paxta terilib, davlatga topshirilmoqda. Nasib qilsa, 5-oktyabrga zimmamizdagi shartnoma-rejamizni oshirib uddalaymiz.

Ilgʻor terimchilarimizdan Salomat Bekimbetova, Raʼno Polvonniyozova, Ulboʻsin Qurbonboyeva, Mohira Yoʻldosheva, Salomat Xolboyeva hamda Aqljon Qurboniyozovalar kuniga 130-140 kilogrammdan paxta terishmoqda. Terilgan har bir kilogramm paxta uchun 850 soʻmdan naqd pul berilishi terimchilar ishining yanada unumli boʻlishini taʼminlayotir.

Terimchi-hasharchilar uchun dala boshida tushlik choy, issiq ovqat tashkil etilgan. Mexanizatorlarimiz Ozod Toʻraboyev, Gulmirza Polvonov va Davlatboy Qurbonboyevlar terilgan paxtani oʻz vaqtida qabul punktlariga eltishayotir.

Dalalarimizda hosil moʻl. Maqsadimiz, yetishtirilgan hosilni nest-nobud qilmay yigʻib-terib davlatga topshirish va tumanimizning yuksak xirmoniga munosib hissa qoʻshish.

Rufat Nurullayev, Qangli MMTP tarkibidagi “Behzod - Gʻanisher” fermer xoʻjaligi raisi: - Bu yilgi yigʻim-terim mavsumiga biz ancha oldindan puxta taraddud koʻrdik. Paxta yetishtirish bilan bogʻliq barcha mavsum ishlari vaqtida bajarildi. Terimga tushishdan oldin gʻoʻza qatorlari begona oʻtlardan tozalanib, sifatli defoliatsiya qilingani bois, pishib-yetilgan koʻsaklar bir tekis ochildi. Fermer xoʻjaligimiz hududida yashovchi uyushmagan yoshlar hisobidan tuzilgan hasharchilar guruhi aʼzolari va xoʻjaligimiz ishchilarining fidokorona mehnatlari evaziga Qangli MMTPda birinchi boʻlib zimmamizdagi shartnoma-rejamizni oshirib uddaladik. Davlatga 34 gektar paxta maydonining har gektaridan salkam 30 tsentnerdan 84 tonna yuqori sifatli paxta topshirib, rejamizni YuZ foizga bajardik. Bu shartnoma-rejadagidan 7 tonna ortiq degani. Dalalarimizdan kuniga 1800-2000 kilogrammdan paxta terib olinmoqda. Ilgʻor terimchilarimiz Dilorom Jumamurodova va Zulfiya Davlatboyevalar kuniga 180-200 kilogrammdan, Matluba Jumaniyozova, Munira Qurbonboyeva, Omonboy Murodboyev, Nilufar Murodboyeva hamda Dilorom Jumamurotovalar har kuni 150-180 kilogrammdan paxta terishmoqda. Ilgʻor terimchilar orasida mavsum boshidan beri 4-5 mln soʻm daromad olganlari ham bor. Terilgan har bir kilogramm paxta uchun mavsum boshidanoq 750-800 soʻmdan ish haqi berildi. Xoʻjaligimizning paxta tayyorlash rejasi oshib borgan sari terimchilarga beriladigan ish haqini ham oshirib borganimiz oʻzining samarali natijasini berdi va yetishtirilgan hosilning barchasini birinchi navga topshirdik.

Terimchilarimizning kayfiyati baland. Chunki ayni kunda har bir kilogramm paxta uchun oʻrtacha 1100 soʻmdan haq toʻlayapmiz. Oʻz mehnati samarasidan mamnunlik hissi bilan mehnat qilayotgan terimchilarimiz fidoyiligi tufayli xoʻjaligimizda terim surʼati hamon yuqori. Mexanizatorlar Davron Nurullayev, Quvat Jumaniyozov, “Jumurtov” neftebazasiga qarashli hudud boʻyicha yonilgʻi-moylash shaxobchasi operatori Xudoybergan Chakanovlarning oʻz vazifalarini sidqidildan bajarayotganlari, terimchilar uchun dala boshida issiq ovqat tashkil etilib, doimiy ravishda choy qaynatib berilayotgani bois, ish unumi yanada yuqori boʻlmoqda.

Mavsum oxirigacha yana 10 tonna hosil yigʻishtirib olib, tumanimizning, mamlakatimizning ulkan paxta xirmoniga oʻz hissamizni qoʻshamiz.

Robiya YOʻLDOShEVA suhbatlashdi.