ORASTALIK - BAXTGA ELTAR YOʻL

Odamlarni bir-biriga yaqinlashtirishga, bir-biriga suyanib hayot kechirishga zamin boʻlguvchi oʻziga xos xususiyatlar xalqimizning turmush va tafakkur tarzida necha asrlar davomida shakllanib, sayqallanib kelgan. Kishilarning bir-biri bilan, qoʻshnining qoʻshni, oilaning oila bilan ahil-inoq, hamjihatlikda, eng muhimi, shaxsning jamiyat  bilan uygʻun yashashi shuurimizdagi chuqur oʻrin olgan buyuk qadriyatlarimizning amaliy ifodasidir. Mehr-oqibat, birdamlik ham xalqimizning qon-qoniga singib ketgan ana shunday qadriyatlarimizdan sanaladi.

Shu boisdan kimning uyida toʻy boʻlsa, kimning boshiga ish tushsa, mahalla, qoʻni-qoʻshnilar shu yerda jam boʻladi. Quvonchini ham, tashvishini ham birga koʻtaradi.

Xalqimizga xos anʼana, urf-odat va udumlarni saqlab, rivojlantirishga hissa qoʻshib kelayotgan bizning ovulimizda 5 mingdan ziyod aholi istiqomat qiladi. Shuning 2800 nafarini ayollar, 600 dan ziyodrogʻini 6 yoshgacha boʻlgan bolalar, 931 nafarini 17 yoshgacha boʻlgan oʻsmir yoshlar tashkil etadi.

Ovul fuqarolar yigʻinimizda oʻsib kelayotgan yosh avlodning sogʻlom, yuksak maʼnaviyatli, el-yurt koriga yelka tuta oladigan oʻgʻil-qizlar boʻlib voyaga yetishiga ulkan ahamiyat berilmoqda.

Yoshlarning boʻsh vaqtlarini koʻngilli oʻtkazishiga erishish maqsadida hududimizdagi taʼlim muassasalarida va kasb-hunar kollejida turli toʻgaraklar faoliyat olib borayapti. Bolalarning intellektual qobiliyatini aniqlash, rivojlantirishga koʻmaklashish, kasb-hunarga yoʻnaltirish maqsadida taʼlim muassasasi, oila, mahalla hamkorligi yoʻlga qoʻyilgan va samarali faoliyat olib borayapti.

Oilalarda sogʻlom turmush tarzining barqarorligi shu oilada voyaga yetayotgan farzandlar kamoliga samarali taʼsir oʻtkazadi.

Axir qush uyasiga qarab uchadi, degan maqol bejiz aytilmaganda. Shuni inobatga olgan holda ovulimizdagi mavjud 837 ta xonadonlarda sogʻlom turmush tarzining, oʻzaro mehr-oqibat va hamjihatlikning barqaror boʻlishi uchun targʻibot-tashviqot ishlarini olib borayapmiz.

Xalqimiz milliy mentalitetiga xos boʻlgan shunday odatlari borki, turmushimizni fayzli, koʻngillarimizni charogʻon etadi. Bular – obodlik, orastalik, saranjom-sarishtalik  va mehnatsevarlikdir.

Oilada farzandlarimizga, qizlarimiz ongiga bu buyuk tuygʻularning singdirilishi chor-atrofimizning, xonadonimizning ozoda, koʻrkam va obod boʻlishini taʼminlaydi.

Darhaqiqat, biror xonadonga kirib kelgan kishi ostonadayoq shu yerda yashovchi kishilar haqida biroz tushunchaga ega boʻladi. Odamlarning oʻtirish-turishi ularning maʼnaviyatining koʻzgusidir.

Shunisi quvonarliki, keyingi yillarda xonadonlar, atrofini toza, orasta saqlashga, koʻkalamzorlashtirishga, tomorqa yerlardan unumli foydalanishga eʼtibor kuchaymoqda. Odamlarning oʻzlari bu odatlarni turmush meʼyoriga aylantirishmoqda.

Bugungi kunda ovulimizning 833 nafar fuqarosi uy mehnati bilan band. Ularning koʻpchiligi xotin-qizlardir. Bu ham albatta xonadonlar iqtisodiga ijobiy taʼsirini oʻtkazishi tabiiy.

Hayotda baxtiyor, farovon va mazmunli yashashni hamma ham istaydi. Biroq bunday turmush darajasiga erishishning oʻzi boʻlmaydi. Ha, baxt kaliti oʻz qoʻlimizda, unga eltar yoʻl esa sogʻlom turmush tarzi va mehnatdir.

Bizning faoliyatimiz esa ovulimiz xonadonlarida baxt-iqbol, toʻkin-sochinlik, osoyishtalik barqaror boʻlishiga erishishga qaratilgandir.

Raʼno JUMANIYoZOVA,

"Qilichboy” OFYning diniy maʼrifat va maʼnaviy-axloqiy tarbiya masalalari boʻyicha maslahatchisi.